. పెన్షనర్ల కష్టాలు
*********************
(ఆట వెలదులు)
1) పెన్షనరుకు ఉన్న పెనుబాధలన్నియు
ముసలితనమునందు ముంచుకొచ్చు
ఎవరినడుగ లేరు యేడికీ పోలేరు
అండ ఉంటెగాని అడుగు పడదు !
2)
నడవలేని కాళ్ళు నిలువనీయని వొళ్ళు
ప్రకృతి పిలుపులన్ని పడక యందు
ధైర్యమిచ్చువారు దరిలేక తండ్లాట
కాయమరుగు వరకు కంటనీరు !
3)
పెన్షనరుకు హక్కు పెన్షను పొందుట
బిక్షగాదు సేవ భుక్తి యగును
నాయకులకు యేల నాలుగు పెన్షన్లు?
దోచుకొనుటకేన దొరల నీతి !
4)
నాయకుని చికిత్స నయముగాదిచ్చట
అన్యదేశమెళ్ళి హాయి గడుపు
ఎంత ఖర్చునైన ఏలోటు రాకుండ
ఉన్నదంత తిందురుచిత సొమ్ము !
5)
పెన్షనరుకు జబ్బు పెనుబాధను తెచ్చు
ఉచిత వైద్యమునకు ఊత మియరు
పేరుకే ఉచితము పెనుభారమగు చుండు
ముందు డబ్బు లిస్తె మందులిచ్చు !
6)
అంత ఉచితమంటు "ఆరోగ్యశ్రీ" వల్ల
"ఉచిత భీమ" లేమి ధీమ నిచ్చు?
హెల్తుకార్డులేమి హెల్పుచేయుట లేదు
ఆచరించు చోట అమలుగాదు !
........... కోట పెంటయ్య
విశ్రాంత భాషోపాధ్యాయులు. కారేపల్లి. ఖమ్మం జిల్లా.9014977041
కామెంట్లు లేవు:
కామెంట్ను పోస్ట్ చేయండి