గురుత్వాకర్షణ సిద్ధాంతం

 గురుత్వాకర్షణ సిద్ధాంతం కనుగొన్నది ఎవరు? Many Apples had fallen down prior to Newton's Gravity Laws

గురుత్వాకర్షణ సిద్ధాంతం (Law of Gravitation) కనుగొన్నది న్యూటనా!? ఇది పూర్తిగా అసత్యం. ఎందుకంటే ప్రాచీన భారతీయ గ్రంథాల నిండా గురుత్వాకర్షణ సిద్ధాంతం గురించి ప్రస్తావించబడి వుంది.

1. "సూర్య సిద్ధాంతమనే ప్రాచీన గ్రంథంలో ఇలా చెప్పబడింది. "ధారణాత్మక శక్తి కారణంగా భూమి ఆకాశంలో పడిపోకుండా నిలబడుతున్నది. (సూ. సి. 12 అ- 32 శ్లో॥)

శ్లో॥ మధ్యే సమన్తాదణ్ణస్య భూగోలో వ్యోమ్ని తిష్ఠతి। బిభ్రాణః పరమాం శక్తిం బ్రహ్మణో ధారణాత్మికామ్ ||

2. వరాహమిహురుడు (క్రీ. శ. 505) తన "పంచ సిద్ధాంతి" అనే గ్రంథంలో గురుత్వాకర్షణ శక్తి గురించి- "భూతలంలోని ఏ భాగంలో అయినా.. అన్ని జ్వాలలు పైకెగుస్తాయి. పైకి వేసిన వస్తువు కింద పడుతుంది. ఈ అనుభవం అందరికీ తెలిసినదే. సమానమైనదే" అని అంటాడు. (పం. సి. 13 4)

శ్లో॥ గగనముపైతి శిఖిశిఖా క్షిప్తమపి క్షితముపైతి గురు కించిత్| యద్వదిహ మానవానాం అసురాణాం తద్వదేవా!

3. "లీలావతి" అనే గ్రంథంలో “భువనకోశం" అనే సర్గలో భాస్కరాచార్యుడు (క్రీ. శ. 1114) తన పుత్రిక లీలావతికి "భూమి గురుత్వాకర్షణ శక్తి కలిగి ఉంది. ఖగోళంలో గ్రహాల పరస్పర ఆకర్షణ శక్తి వల్లా అవి అక్కడ తమకు తామే ఆధారభూతమై నిలిచి ఉన్నాయని" చక్కగా వివరించాడు.

4. "సిద్దాంత శిరోమణి" (భాస్కరాచార్యుడు) అనే గ్రంథంలో 'భువనకోశం' అనే అధ్యాయంలో 6వ శ్లోకంలో గురుత్వాకర్షణ శక్తి గురించి చాలా చక్కగా వివరించాడు.

శ్లో॥ ఆకృష్టిశక్తిశ్చ మహీతయా యత్ స్వస్థం/ గురు స్వాభిముఖం స్వశక్త్యాం ఆకృష్యతే తత్పతతీవతి/ సమే సమన్తాత్ క్వ పతత్వియం భే॥

భూమి ఆకాశంలో ఉన్న వస్తువులను సహజంగా, స్వశక్తితో.. తన వైపునకు ఆకర్షిస్తుంది. ఈ ఆకర్షణ వలన అన్ని వస్తువులు భూమిమీద పడతాయి. ఆకాశంలోని వివిధ గ్రహాల మధ్య సమాన ఆకర్షణ శక్తి ఉన్నప్పుడు అవి ఎక్కడ పడతాయి?

5. బ్రహ్మగుప్తుడు (క్రీ. శ. 591) రచించిన 'బ్రహ్మస్పుర సిద్ధాంతం'లో "వస్తువులు భూమి వైపు ఆకర్షింప బడతాయి. నీటికి ఎలా సహజ ప్రవాహశక్తి ఉన్నదో. అలా భూమికి సహజమైన ఆకర్షణశక్తి ఉంది. అని చెప్పాడు.

6. జగద్గురువు ఆదిశంకరుల వారు వారి 'ప్రశ్నోపనిషత్' భాష్యంలో 'అపాన'శక్తి గురించి రాస్తూ... "ఒక వస్తువును పైకి ఎగురవేస్తే దానిని ఎట్లు భూమి ఆకర్షిస్తుందో... అటులనే పైకి లాగబడే 'ప్రాణ' శక్తిని 'అపాన'శక్తి కిందకు లాగుతోంది. (3-8 శ్లో॥ అని చెప్పారు.

శ్లో॥ "తథా పృథివ్యామభిమానినీ యా దేవతా ప్రసిద్ధా సైషా పురుషస్య అపానవృత్తిమవష్టఖ్యాకృష్య వశీకృత్యాధ ఏవ అపకర్షణ అనుగ్రహం కుర్వతీ వర్తత ఇత్యర్థ॥ అన్యథా హి శరీరం గురుత్వాత్ పఠేత్ సావకాశే వోద్గచ్ఛేత్||"

ఆ తరువాతి భారతీయ ఖగోళ శాస్త్రజ్ఞుల గ్రంథాలలో కూడా "గురుత్వాకర్షణ" సిద్ధాంతం వివరింపబడి ఉంది. న్యూటను కంటే ఎన్నో వందల సంవత్సరాల పూర్వమే 'గురుత్వాకర్షణ' గురించి భారతీయ విజ్ఞానం ఘోషించింది.(భారతీయ ప్రతిభా విశేషాలు 108 నిజాలు పుస్తక సౌజన్యం)