రామాయణమ్ 327
...
తన పాదములపై దీనముగా వ్రాలిన దధిముఖుని చూసి సుగ్రీవుడు ,ఏమి జరిగినది ఎందులకు నాపాదములపై వ్రాలినావు అని అడిగినాడు.
.
అప్పుడు అంగదుడు ,హనుమంతుడు తదితర వానరులొనరించిన మధువన విధ్వంసము గురించి అడ్డువచ్చిన తమను బెదిరించి తన్నిన వైనాన్ని పూసగుచ్చినట్లు వివరించాడు.
.
అది వినడముతోడనే సుగ్రీవుని ముఖము విచ్చుకొని లక్ష్మణునితో ఓ మహాబాహూ సీతమ్మ జాడతెలిసినది అని అమితానందముగా పలికినాడు ..
.
అవును ఇది సత్యము సీతమ్మ జాడతెలియకున్న వారందరూ అచట చేరి మధుభక్షణము చేయరు .
.
, నీవు శీఘ్రమే వెళ్ళి నా ఆజ్ఞగా చెప్పి వారిని వెంటనే ఇటకు పంపు ,వారు చేసిన వన విధ్వంసమును నేను క్షమించినాను అని దధిముఖునితోసుగ్రీవుడు పలికినాడు.
.
రామ,లక్ష్మణ,సుగ్రీవుల అనుజ్ఞతీసుకొని దధిముఖుడు మధువనమునకు తిరిగి వచ్చెను.
.
సుగ్రీవాజ్ఞను వారికి ఎరిగించగా వానరులందరూ వెంటనే పయనమయ్యి సుగ్రీవుని సమక్షములో నిలిచారు.
.
వారిని చూడగనే వాలము ఎత్తి సంతోషముతో సుగ్రీవుడు నిలుచున్నాడు.
.
అప్పుడు హనుమంతుడు ,
శ్రీరామా! సీతాదేవి కనపడినది ,ఆమె పాతివ్రత్యమును కాపాడుకొనుచూ ఆరోగ్యముగా ఉన్నది అని రామచంద్రునికి విన్నవించెను.
.
ఆ వాక్కులు శ్రీరామహృదయమునకు అమృతపు జల్లువలె చేరెను .
.
అటుపిమ్మట జరిగిన విషయములన్నీ విన్నవించి ,కాకాసురవృత్తాంతము కూడా రామునికి తెలిపి సీతమ్మ ఇచ్చిన చూడామణిని భద్రముగా రామునకు అందించినాడు .
.
ఆమణిని చూడగనే ఆయన హృదయము కరిగి కన్నీరై జలజల ప్రవహించెను.
.
సీతామాత సందేహములు‌తీర్చి ఆమెకు ధైర్యము కలిగించినాను. ఆమె హృదయములో శాంతినిపొందినది అని హనుమంతుడు సవినయముగా రామునికి తెలియచేసినాడు.
.
(సుందరకాండ సమాప్తము)
.
వూటుకూరు జానకిరామారావు
.
కామెంట్‌లు లేవు:
కామెంట్‌ను పోస్ట్ చేయండి