ॐ వినాయక చవితి శుభాకాంక్షలు
సందేశం 9/11
పంచాయతనం - గణపతి
సర్వమూ గణపతియే అని శ్రీ గణపతి అథర్వ శీర్షమ్ తెలుపుతోంది. అంతా నీవేనయ్యా! అని ఆయనని స్తుతిస్తోంది.
అందులో కొన్ని
* సృష్టి - స్థితి - లయాలు గణపతియే!
సమస్త ప్రపంచమూ
- నీ నుండే ఉద్భవిస్తోంది (పుడుతోంది),
- నీలోనే అది నిలిచి ఉంటోంది (సృష్టికి ఆధారం నీవే),
- నీలోనే అది మళ్ళీ లయమవుతోంది.
కర్మ సంస్కారాలకు చేతనత్వం ఇచ్చి,
ఈ ప్రపంచంలో ఆయా జీవులు ప్రవర్తించేలా చేస్తున్నది నీవే!
* పంచభూతాలూ గణపతియే!
భూమీ, నీరూ, అగ్నీ, వాయువూ, ఆకాశమూగా పిలవబడే పంచభూతాలూ నీ స్వరూపమే!
* వాక్కు కూడా గణపతియే!
పరా - పశ్యంతీ - మధ్యమా - వైఖరీ అనే
- ఆలోచన రూపంలో ఉండే వాక్ స్థితీ,
- ఆలోచనను స్పష్టంగా చూడగల వాక్ స్థితీ,
- చూడగలిగిన వాక్కుకు భాషను వెతుకుతున్న స్థితీ,
- భాషగా ప్రకటనమౌతున్న వాక్కూ,
ఈ నాలుగూ నీవే!
సర్వం జగదిదం త్వత్తో జాయతే
సర్వం జగదిదం త్వత్తస్తిష్ఠతి
సర్వం జగదిదం త్వయి లయమేష్యతి
సర్వం జగదిదం త్వయి ప్రత్యేతి
త్వం భూమి రాపోఽనలోఽనిలోనభః
త్వం చత్వారి వాక్పదాని I
- శ్రీ గణపతి అథర్వ శీర్షమ్
ప్రత్యేక వివరణ
మరి శివుడూ - విష్ణువూ - అంబికా - సూర్యులకు కూడా ఈ లక్షణాలు ఆపాదిస్తూ, అథర్వ శీర్షాలున్నాయి కదా!
- అనే సందేహం కలుగుతుంది.
ఈ ఐదుగురూ కూడా, ఒక్కొక్క కల్పంలో ఒక్కొక్కరూ, ఒకరి తరువాత ఒకరుగా
- ఆయా రూపాలలో
- ఆయా క్రియలు నిర్వర్తిస్తారు.
అందఱూ అన్ని కల్పాలలోనూ ఆరాధింపబడతారు.
ఏ కాలాలలో అయినా, ఈ ఐదుగురినీ ఆరాధించేవారుంటారు.
- గణపతిని ఆరాధించేవారు గాణాపత్యులు,
- విష్ణువుని ఆరాధించేవారు వైష్ణవులు,
- శివుని ఆరాధించేవారు శైవులు,
- సూర్యుణ్ణి ఆరాధించే మతం సౌరం,
- దుర్గారాధకులు శాక్తేయులు,
పంచ భూతాలకీ సంబంధించి, ఒక్కొక్క దానికీ ఒక్కొక్క దేవతగా, ఈ ఐదుగురూ
- విడివిడిగానూ,
- కలసి పంచాయతనంగానూ ఆరాధింపబడతారు.
ఆదిశంకరులు - పంచాయతన ఆరాధన
ఆదిశంకరులు నిత్యదేవతార్చనలో భాగంగా పంచాయతన పూజని ప్రవేశపెట్టారు.
పంచాయతనంలో శివుడు, విష్ణువు, అంబిక, గణపతి, సూర్యుడు ఉంటారు.
ఏ సంప్రదాయానికి చెందినవారైతే ఆ మూర్తిని మధ్యలో ఉంచి, మిగిలిన వాటిని నలువైపులా ఉంచి, పంచాయతన పూజ చేస్తారు.
సాలగ్రామ పంచాయతనం
పంచాయతనంలో కరచరణాదులతో ఉన్న మూర్తుల ఆరాధనయే కాకుండా, సాలగ్రామాల పూజావిధానం ఉంది.
ఆ విధానంలో సాలగ్రామాలు
- నర్మదానది వద్ద లభించే బాణ లింగం శివ సాలగ్రామం;
- నేపాల్ గండకి నది వద్ద లభించే విష్ణు సాలగ్రామం;
- కాళహస్తి సువర్ణముఖి నది వద్ద లభించే అంబికా సాలగ్రామం;
- శోణభద్రా నది వద్ద లభించే గణపతి సాలగ్రామం;
- తంజావూరు వెల్లాం వద్ద లభించే సూర్య సాలగ్రామం.
అనే ఈ ఐదు సాలగ్రామాల కలయికతో పంచాయతన ఆరాధన జరుగుతుంది.
=x=x=x=
— రామాయణం శర్మ
భద్రాచలం
కామెంట్‌లు లేవు:
కామెంట్‌ను పోస్ట్ చేయండి