భాగవతం వింటే బాగవుతాం'*

 *'భాగవతం వింటే బాగవుతాం'*

శ్రీ పోతన భాగవత మధురిమలు 

(7-320-క.)

రత్నములను మత్కాంతా

రత్నంబుల బుచ్చికొన్న రక్కసు నురమున్

యత్నమున వ్రచ్చి వైచితి;

పత్నులు రత్నములుఁ గలిగి బ్రతికితి మీశా!

*భావము:-* ఓ దేవా! ఈశ్వరా! హిరణ్యకశిపుడు మా శిరోరత్నాలను, స్త్రీరత్నాలను లాక్కున్నాడు. ఆ రాక్షసుడి వక్షస్థలం వ్రక్కలుచేసి. ఓడించి, సంహరించావు. మా మణులూ, రమణులూ తిరిగి లభించేలా చేసి మమ్ము కాపాడావు.

శ్రీ ఆధ్యాత్మిక రామాయణ కీర్తనతో....... *శ్రీ లక్ష్మీ నృసింహ మమ దేహి కరావలంబం*.... శుభోదయం.

*శ్రీ కృష్ణం వందే జగద్గురుం*

ధర్మో రక్షతి రక్షితః

వేద చరిత్ర

  వేద చరిత్ర (History of Vedas) – పూర్తి వివరణ

🔹 వేదాల ఆవిర్భావం (Origin of Vedas)

వేదాలు మనుషులు రచించినవి కావు. వాటిని “అపౌరుషేయం” అంటారు.

👉 ఋషులు దీర్ఘకాల ధ్యానం ద్వారా దైవ జ్ఞానాన్ని “శ్రవణం” చేసి పొందారు

అందుకే వేదాలను “శృతి” అని కూడా అంటారు (వినబడిన జ్ఞానం).

🔹 కాల నిర్ధారణ (Time Period)

వేదాల కాలం గురించి ఖచ్చితమైన తేదీ లేదు, కానీ పండితుల అభిప్రాయం ప్రకారం:

సుమారు క్రీ.పూ. 1500 – 500 మధ్య వేద సంస్కృతి విస్తరించింది

కొన్ని భారతీయ ఆచార్యులు దీనిని ఇంకా ప్రాచీనంగా (క్రీ.పూ. 3000+) భావిస్తారు

🔹 వేదాల వికాసం (Development)

మొదట ఒకే వేదం ఉండేది. తరువాత దాన్ని మహర్షి అయిన

వేదవ్యాస మహర్షి

నాలుగు వేదాలుగా విభజించాడు:

ఋగ్వేదం

యజుర్వేదం

సామవేదం

అథర్వవేదం

🔹 గురుకుల వ్యవస్థ (Oral Tradition)

వేదాలు చాలా కాలం వరకు లిఖితం కాలేదు.

👉 గురువులు శిష్యులకు:

మౌఖికంగా (మాటల ద్వారా)

ఖచ్చితమైన స్వరాలతో (ఘనపాఠం, జటాపాఠం)

బోధించేవారు

👉 అందువల్లే వేదాలు అచ్చుతప్పకుండా కాపాడబడ్డాయి

🔹 వేద కాలం విభజన

వేద చరిత్రను 4 దశలుగా చూడవచ్చు:

1. సంహిత కాలం

మంత్రాల సృష్టి

దేవతారాధన (ఇంద్ర, అగ్ని, వరుణ)

2. బ్రాహ్మణ కాలం

యజ్ఞాలు, కర్మకాండాలు

హోమ విధానాలు

3. ఆరణ్యక కాలం

అరణ్యాలలో ధ్యానం

తపస్సు, ఉపాసన

4. ఉపనిషత్తుల కాలం

ఆత్మ, బ్రహ్మ తత్వం

మోక్ష మార్గం

🔹 వేదాల రచన (Written Form)

మొదట మౌఖికంగా మాత్రమే ఉండేవి

తరువాత కాలంలో భూర్జపత్రాలు, తాళపత్రాలపై వ్రాయబడ్డాయి

ఆధునిక కాలంలో పుస్తకరూపంలో ప్రచురించబడ్డాయి

🔹 వేద సంస్కృతి ప్రభావం

వేదాలు భారతీయ సంస్కృతికి పునాది:

ధర్మం

సంస్కారాలు (ఉపనయనం, వివాహం)

యజ్ఞాలు

యోగా, ఆధ్యాత్మికత

👉 తరువాత వచ్చిన:

రామాయణం

మహాభారతం

పురాణాలు

ఇవన్నీ వేదాల ఆధారంగా అభివృద్ధి చెందాయి

🔹 ముఖ్య లక్షణాలు

✔ అపౌరుషేయం (దైవ మూలం)

✔ శృతి (వినబడిన జ్ఞానం)

✔ మౌఖిక పరంపర

✔ శాశ్వత జ్ఞానం

🔹 సారాంశం

👉 వేదాలు:

ప్రాచీన భారత జ్ఞాన సంపద

ఋషులు పొందిన దివ్య జ్ఞానం

గురుకుల పద్ధతిలో పరిరక్షించబడ్డాయి

వేదవ్యాసుడు వాటిని నాలుగుగా విభజించాడు

పంచాంగం 08.04.2026

  ఈ రోజు పంచాంగం 08.04.2026 Wednesday,

స్వస్తి శ్రీ చాంద్రమాన పరాభవ నామ సంవత్సరః ఉత్తరాయణం వసంత ఋతువు చైత్రమాస కృష్ణ పక్ష షష్ఠి తిథి సౌమ్య వాసర మూల నక్షత్రం వరీయాన్ యోగః వణిజ కరణం.

రాహుకాలం : మధ్యాహ్నం 12:00 నుండి 01:30 వరకు.

 

యమగండం: ఉదయం 07:30 నుండి 09:00 వరకు.

  

శ్రాద్ధ తిథి: షష్ఠి

 

నమస్కారః , శుభోదయం

భగవద్గీత

 -------------------- భగవద్గీత. -------------------

తృతీయోధ్యాయ: కర్మ యోగము.

 

 తస్మాత్ త్వమింద్రియాణ్యాదౌ నియమ్య భరతర్షభ ।

పాప్మానం ప్రజహి హ్యేనం జ్ఞానవిజ్ఞాననాశనమ్ ।। 41 ।।

ప్రతిపదార్థ:

తస్మాత్ — కాబట్టి; త్వం — నీవు; ఇంద్రియాణి — ఇంద్రియములను; ఆదౌ — మొదట్లోనే; నియమ్య — నియంత్రించి; భరత-ఋషభ — అర్జునా, భరతులలో శ్రేష్ఠుడా; పాప్మానం — పాపిష్టిదైన; ప్రజహి — సంహరింపుము; హి — నిజముగా; ఏనం — ఇది; జ్ఞాన — జ్ఞానము; విజ్ఞాన — అనుభవ జ్ఞానమును; నాశనం — నశింపచేసేటటువంటిది.

తాత్పర్యము : 

కాబట్టి ఓ భరత శ్రేష్ఠుడా, మొదట్లోనే ఇంద్రియములను నియంత్రణ లోనికి తెచ్చి, జ్ఞాన విజ్ఞానములను నశింపచేసే ఈ పరమ పాపిష్టి కామము (కోరికలు) అనే శత్రువును నిర్మూలించుము.

  వివరణ:

అన్ని అరిష్టములకు మూలకారణ మైన కామాన్ని ఎలా అధిగమించాలో ఇక శ్రీ కృష్ణుడు ఇప్పుడు వివరిస్తున్నాడు. కామము మానవ అత్మోద్దరణకు ఎంతో హానికరమైనది. కామము యొక్క నిక్షేప స్థానాన్ని గుర్తింపచేసిన శ్రీ కృష్ణుడు మొదట ఈ ఇంద్రియముల కోరికలను నిగ్రహించమంటున్నాడు. వాటిని పెంచుకోవటం మన దుఃఖాలకు మూలకారణం, వాటిని నిర్మూలించుకోవటం శాంతికి మార్గం. ఈ క్రింది ఉదాహరణని గమనించండి.

రమేష్, దినేష్ అనే ఇద్దరు సహ-విద్యార్థులు హాస్టల్లో ఒకే గదిలో ఉండేవారు. ఒక రోజు రాత్రి 10 గంటలకు రమేష్‌కి సిగరెట్టు తాగాలనే కోరిక కలిగింది. అతను అన్నాడు, ‘నాకు బాగా సిగరెట్టు తాగాలనిపిస్తోంది.’ అని.

దినేష్ అన్నాడు, ‘చాలా రాత్రయింది. సిగరెట్టు గురించి మర్చిపోయి పడుకో’ అని.

రమేష్ అన్నాడు ‘కాదు... కాదు... నేను పొగాకు పీల్చనిదే నిద్ర పోలేను’ అని.

దినేష్ నిద్ర పోయాడు, కానీ రమేష్ సిగరెట్టు కోసం బయటికి వెళ్ళాడు. అప్పటికే దగ్గరి కొట్లు మూసేశారు. చివరికి అతనికి సిగరెట్టు దొరికి, ధూమపానం చేసి హాస్టల్ కి తిరిగి రావటానికి రెండు గంటలు పట్టింది.

ఉదయాన్నే దినేష్ అతన్ని అడిగాడు, ‘రమేష్, ఎన్నింటికి పడుకున్నావు రాత్రి?’

‘మధ్యరాత్రి.’

‘నిజంగా! అంటే నువ్వు సిగరెట్టు కోసం రెండు గంటలు వ్యాకుల పడి, నీ ధూమపానం అయిన తరువాత మళ్లీ నువ్వు 10గంటలకు ఏ స్థితిలో ఉన్నావో అదే స్థితికి చేరుకున్నావు.’ అని.

‘అంటే, నువ్వనేదేమిటి’ అన్నాడు రమేష్.

‘చూడు, 10 గంటలప్పుడు నీకు సిగరెట్టు మీద ఎలాంటి కోరిక లేదు, అప్పుడు ప్రశాంతంగా ఉన్నావు. తర్వాత నీకు నీవే వాటి మీద కోరిక పుట్టించుకున్నావు. 10 గంటల నుండి మధ్యరాత్రి వరకు సిగరెట్టు కోసం పరితపించావు. చివరికి ధూమపానం చేసిన తరువాత, నీకునీవే పుట్టించుకున్న వాంఛ తీరింది, ఇక నిద్ర పోయావు. అదే నేను ఎలాంటి కోరికలు పుట్టించుకోలేదు, ఇక 10 గంటలకే ప్రశాంతంగా పడుకున్నాను.’

ఈ విధంగా, శారీరక ఇంద్రియ వస్తు/విషయముల కొరకై కోరికలను మనమే సృష్టించుకుంటాం, తరువాత వాటిచే ఉద్విగ్నతకు లోనవుతాము. మనకు కావలసిన వస్తువు చేజిక్కిన తరువాత మనంతమనమే సృష్టించుకున్న రోగం నిర్మూలించబడుతుంది, దాన్నే మనము ఆనందం అనుకుంటాము. కానీ, మనలని మనము జీవాత్మగా పరిగణించుకుంటే, మరియు ఆత్మ ఆనందమే మన లక్ష్యం అయితే, ఈ ప్రాపంచిక కోరికలను త్యజించటం సులువౌతుంది. తన ఇంద్రియములను నియంత్రణలోకి తెచ్చుకోమని అర్జునుడికి శ్రీ కృష్ణుడు ఉపదేశిస్తున్నాడు. ఆ విధంగా వాటిలో వసించే కామాన్ని నిర్మూలించవచ్చు. దీనిని సాధించటానికి, తదుపరి శ్లోకంలో చెప్పినట్టుగ్గా, భగవంతుడు మనకు ప్రసాదించిన ఉన్నతమైన పరికరములను వాడుకోవాలి.

బుధవారం రాశి ఫలితాలు

  శ్రీ గురుభ్యోనమః 🙏

08-04-2026 బుధవారం రాశి ఫలితాలు

మేషం

సమాజంలో విశేషంగా పలుకుబడి పెరుగుతుంది. నూతన వస్తువులు కొనుగోలు చేస్తారు. పాత మిత్రుల నుండి అందిన సమాచారం ఆనందం కలిగిస్తుంది. చేపట్టిన పనులు సకాలంలో పూర్తి చేస్తారు. వృత్తి వ్యాపారాలలో నూతన పెట్టుబడులు పొందుతారు . ఉద్యోగస్తులకు పదోన్నతులు పెరుగుతాయి.

---------------------------------------

వృషభం

ముఖ్యమైన వ్యవహారాలలో శ్రమకు తగిన ఫలితం లభిస్తుంది. నూతన కార్యక్రమాలకు శ్రీకారం చుడతారు. స్ధిరాస్తి వివాదాలకు సంబంధించి ఆప్తుల నుండి కీలక సమాచారం అందుతుంది. నిరుద్యోగుల ప్రయత్నాలు ఫలిస్తాయి. వృత్తి వ్యాపారాలలో ఉత్తమ ఫలితాలు పొందుతారు. విద్యార్థుల ఫలితాలు సంతృప్తి కలిగిస్తాయి.

---------------------------------------

మిధునం

కుటుంబ విషయంలో స్థిరమైన ఆలోచనలు చెయ్యలేరు. సన్నిహితులతో మాటపట్టింపులు కలుగుతాయి. చేపట్టిన పనులు మధ్యలో నిలిచిపోతాయి. ఇతరుల వ్యవహారాలకు దూరంగా ఉండటం మంచిది. వృత్తి వ్యాపారాలు అంతంత మాత్రంగా సాగుతాయి. ఉద్యోగమున అధికారుల నుండి ఒత్తిడి తప్పదు.

---------------------------------------

కర్కాటకం

దీర్ఘకాలిక ఋణాలు తీర్చడానికి నూతన ఋణాలు చేస్తారు. ఆర్థిక పరిస్థితి కొంత మందగిస్తుంది. దూరప్రయాణ సూచనలు ఉన్నవి. కుటుంబ సభ్యులతో కలహా సూచనలున్నవి. దైవ సేవా కార్యక్రమాలలో పాల్గొంటారు. వృత్తి ఉద్యోగాలలో అధికారులతో మరింత అప్రమత్తంగా వ్యవహరించాలి. వ్యాపారాలు మందకొడిగా సాగుతాయి. 

---------------------------------------

సింహం

గృహమున వివాహ శుభకార్యాలు నిర్వహిస్తారు. ఆర్థికంగా మరింత మెరుగైన వాతావరణం ఉంటుంది. చేపట్టిన వ్యవహారాలలో ఆశించిన పురోగతి లభిస్తుంది. విలువైన గృహోపకరణాలు కొనుగోలు చేస్తారు. వృత్తి వ్యాపారాలలో మరింత ఉత్సాహంగా పనిచేసి లాభాలు అందుకుంటారు. ఉద్యోగస్తులకు ఆశించిన స్థాన చలనాల కలుగుతాయి.

---------------------------------------

కన్య

ఆదాయానికి మించి ఖర్చులుంటాయి. సన్నిహితులతో మాటపట్టింపులు ఉంటాయి. వృత్తి ఉద్యోగాలలో పని ఒత్తిడి పెరిగి సమయానికి నిద్రాహారాలు ఉండవు. చేపట్టిన పనులు శ్రమతో కాని పూర్తికావు. ముఖ్యమైన వ్యవహారాలలో నమ్మినవారే మోసగిస్తారు. వ్యాపారమున అలోచించి నిర్ణయాలు తీసుకోవాలి.

---------------------------------------

తుల

సోదరులతో దీర్ఘకాలిక వివాదాలు పరిష్కార దిశగా సాగుతాయి. వృత్తి వ్యాపారాలలో నూతన లాభాలు అందుకుంటారు. ముఖ్యమైన విషయాలలో కీలక నిర్ణయాలు తీసుకుంటారు. ఉద్యోగ విషయంలో జాప్యం కలిగిన అనుకున్న సమయానికి పనులు పూర్తి చేస్తారు. విద్యార్థులు మరింత కష్టపడాలి.  

---------------------------------------

వృశ్చికం

దూర ప్రయాణాలు లాభసాటిగా సాగుతాయి. జీవితభాగస్వామితో పుణ్యక్షేత్రాలు సందర్శిస్తారు. వృత్తి వ్యాపారాలలో నూతన లాభాలు అందుకుంటారు. అన్ని వైపుల నుండి ఆదాయం అందుతుంది. ఉద్యోగ వాతావరణం అనుకూలంగా ఉంటుంది. నిరుద్యోగుల ప్రయత్నాలు ఫలిస్తాయి. స్ధిరాస్తి కొనుగోలుకు ఆటంకాలు తొలగుతాయి.

---------------------------------------

ధనస్సు

వృత్తి వ్యాపారాలలో నూతన ప్రోత్సాహకాలు అందుకుంటారు. భూ సంబంధిత క్రయ విక్రయాలలో లాభాలు అందుతాయి. సమాజంలో విశేషమైన గౌరవమర్యాదలు పెరుగుతాయి. ఉద్యోగస్తులు అధికారుల అనుగ్రహంతో నూతన అవకాశాలు అందుకుంటారు. నిరుద్యోగులకు శుభవార్తలు అందుతాయి.

---------------------------------------

మకరం

బంధు మిత్రులతో మాటపట్టింపులు కలుగుతాయి. కుటుంబ సభ్యుల ఆరోగ్య సమస్యలు మరింత కలవరపెడతాయి. చేపట్టిన పనులలో నిదానంగా ముందుకు సాగడం మంచిది. వృత్తి వ్యాపారాలు అంతంత మాత్రంగా సాగుతాయి. ఉద్యోగస్తులకు అదనపు బాధ్యతలు వలన విశ్రాంతి ఉండదు. నిరుద్యోగుల ప్రయత్నాలు ఫలిస్తాయి.

---------------------------------------

కుంభం

ఆర్థికంగా కొంత ప్రతికూల వాతావరణం ఉంటుంది. వృత్తి వ్యాపారాలలో అవసరానికి మించి ఖర్చులు పెరుగుతాయి. ముఖ్యమైన పనులు మందకొడిగా సాగుతాయి. ఉద్యోగస్తులకు బాధ్యతలు సమర్థవంతంగా నిర్వహించడంలో ఇబ్బందులు తప్పవు. నిరుద్యోగ ప్రయత్నాలు మందగిస్తాయి.

---------------------------------------

మీనం

ఆర్థిక లావాదేవీలు కొంత నిరుత్సాహపరుస్తాయి. చేపట్టిన పనులు శ్రమాధిక్యతతో కానీ పూర్తికావు. దూర ప్రయాణాలలో వాహన ఇబ్బందులు ఉంటాయి. ఇంటా బయట వివాదాలు కలుగుతాయి. ఆధ్యాత్మిక సేవా కార్యక్రమాలలో విశేషంగా పాల్గొంటారు. వృత్తి వ్యాపారాలలో భాగస్వాములతో వివాదాలు కలుగుతాయి. నిరుద్యోగ ప్రయత్నాలు వాయిదా వేస్తారు.

---------------------------------------

రామాయణం - 29)

 శ్రీరామ ( వాల్మీకి రామాయణం - 29)

                (పరశురాముడు - 6)

🙏 శ్రీరామ జయరామ జయజయరామ 🙏 

సర్వే జనాః సుఖినో భవన్తు 🙏

                              ----

       (7-4-'26 పోష్టు తరువాయి భాగము)

చాలామంది తెలియక,

' పరశురాముని గర్వభంగం ' అంటారు.

శ్రీమహావిష్ణువు అవతారమైన పరశురామునికి గర్వభంగం ఏమిటి ?

భూభారం అణచటానికి వచ్చిన భగవంతునిగా పురాణాలన్నీ పరశురాముని కీర్తిస్తున్నాయి.

పాలక వర్గమైన క్షత్రియ జాతి అధర్మవర్తనులైనప్పుడు వారిని శిక్షించేందుకు విష్ణువు పరశురాముడి ఉపాధి స్వీకరించాడు.

అయితే ఆ ఉపాధి ఋచీక మహర్షి క్షత్రియ స్వభావంతో కూడినవాని జన్మకొఱకు 

నిర్మించిన ' చరువు ' వల్ల ఏర్పడింది.

ఆ ఉపాధి దోషం తొలిగి పరశురాముడు బ్రహ్మజ్ఞాని అవటమే శ్రీరాముడు భార్గవరాముని నుండి వైష్ణవ ధనస్సును స్వీకరించడం అనే ఈ సంఘటన తాత్పర్యం.

శ్రీరాముడు, శీఘ్రమైనపరాక్రమముతో,

పరశురాముని చేతిలోని వైష్ణవ ధనస్సును గ్రహించి, బాణం సంధించాడు.

వెంటనే జగత్తంతా కంపించింది.

శ్రీరాముడు భార్గవరామునితో ఇలా అన్నాడు.

 "ఓ పరశురామా! నీవు బ్రాహ్మణుడవగుట చేతను,

 విశ్వామిత్రునకు బంధువు వగుట చేతను,

 నాకు పూజ్యుడవు. 

అందువలన, నీ ప్రాణములు హరించేందుకు ఈ శరాన్ని, ప్రయోగింపజాలను.

శ్లో//ఇమాం పాదగతిం రామ తపోబల సమార్జితాన్/

లోకా న ప్రతిమాన్వా తే హనిష్యామి యదిచ్ఛసి//

(భార్గవరామా! నీ పాదగమన శక్తిని గాని,

తపోబలముతో నీవు సంపాదించుకున్న,సాటిలేని ఉత్తమ లోకములను గాని,

ఈ బాణముతో కొట్టివేసెదను.

నీకు ఏది ఇష్టమో చెప్పుము).

దివ్యమైన ఈ వైష్ణవ శరము వ్యర్ధమగుటకు వీలు లేదు, అన్నాడు.

ఆ విధంగా శ్రీరాముడు వైష్ణవ ధనస్సును స్వీకరించగానే, అవతార ప్రయోజనము పూర్తి అయిన పరశురాముడు నిర్వీర్యుడైనాడు.

శ్లో// జడీకృతే తదా లోకే రామే వర ధనుర్ధరే/

నిర్వీర్యో జామదగ్న్యో౽సౌ రామో రామ ముదీక్షత//

(రాముడు, శ్రేష్ఠమైన ఆ ధనస్సును ఎక్కుపెట్టగానే, అత్యంత ప్రభావంతో కూడిన ఆ దివ్య వైష్ణవ శరమును చూచి లోకమంతా భయపడి, స్తంభించి పోయింది. పరశురాముడు నిర్వీర్యుడు అయిపోయినాడు.

ఆయన రామునివంక అత్యాశ్చర్యముతో చూచాడు).

క్షత్రియులపై ద్వేషం వల్ల ఉత్పన్నమైన పరశురాముడి అజ్ఞానం తొలగిపోయింది.

ఆయనలో జ్ఞానం భాసించింది.

ధర్మరక్షణకు అవతరించిన శ్రీ మహావిష్ణువే రాముడని పరశురాముడు అప్పుడు గ్రహించాడు.

రామునకు నమస్కరించాడు.

శ్లో//అక్షయ్యం మధుహన్తారం జానామి త్వాం సురేశ్వరమ్/

ధనుషో౽స్య పరామర్శాత్ స్వస్తితేస్తు పరంతప//

(ఈ ధనస్సును గ్రహించుటవల్ల, నీవు అక్షయుడవు, మధువు అనే రాక్షసుని సంహరించిన వాడవు, సర్వదేవతలకు ఈశ్వరుడవు అయిన శ్రీమహావిష్ణువు వని తెలుసుకొన్నాను. ఓ పరంతపా! నీకు స్వస్తియగుగాక.)

త్రిలోకనాధుడవైన నీ చేత నిర్జింపబడటం వల్ల నేను సిగ్గుపడటం లేదు. 

అదృష్టంగా భావిస్తున్నాను.

ఈ భూమిని కశ్యపునకు దానమిచ్చినందున నేను మహేంద్ర పర్వతముపై నివసిస్తున్నాను. 

నేను అక్కడకు వెళ్ళాలి. అందువల్ల నా గమన శక్తిని నశింపజేయవలదు.

నీ బాణం ప్రయోగించి నేను తపశ్శక్తితో సంపాదించిన పుణ్యలోకాలు నశింపజేయుము,అన్నాడు.

బ్రహ్మజ్ఞానికి, పుణ్యము, పాపము, రెండూ ఉండకూడదు కాబట్టి, పరశురాముని కోరిక ప్రకారము, రాముడు ఆ పుణ్యలోకాలనన్నింటినీ బాణప్రయోగంతో నశింపజేశాడు.

పరశురాముడు, దశరథ రాముని స్తోత్రం చేసాడు.

ప్రదక్షిణము చేసి మహేంద్రపర్వతానికి వెళ్ళిపోయాడు.

శ్రీమద్భాగవతంలో శుక మహర్షి పరీక్షిన్మహారాజుకు ఈ విధంగా చెబుతున్నారు.

"ఓ మహారాజా!వంశోద్ధారకుడైన పుత్రుడు పరశురాముని వల్ల, జమదగ్ని మహర్షి సంకల్ప శరీరం పొంది,తన తపోబలంతో ఆకాశంలోని సప్తర్షి మండలంలో ఏడవ ఋషిగా వెలుగొందుచున్నాడు.

శ్లో// జామదగ్న్యో౽పి భగవాన్ రామః కమలలోచనః/

ఆగామిన్యంతరే రాజన్ వర్తయిష్యతి వై బృహత్//

( ఓ పరీక్షిన్మహారాజా! భగవంతుడు,కమలముల వంటి నేత్రములు గల వాడు,జమదగ్ని పుత్రుడు, అయిన పరశురాముడు రాబోయే మన్వంతరంలో సప్తర్షులలో ఒకడై వేదములను ప్రవర్తింపజేస్తాడు)

 పరశురాముడు చిరంజీవి.

ఈనాటికీ, ప్రసన్నమైన అంతఃకరణముతో భక్తులను అనుగ్రహిస్తూ మహేంద్ర పర్వతంపై ఉన్నాడు.

దేవతలు, సిద్ధులు, గంధర్వులు,చారణులు, ఆయన చరితమును కీర్తిస్తూ ఉంటారు.

పోతన మహాకవి ఇలా అంటున్నారు.

క// ఆ జమదగ్ని తనూజుడు,రాజీవాక్షుండు, ఘనుడు,రాముడధికుడై/

యోజను వేదర్షులలో,రాజిల్లెడు మీది మనువు రా నవ్వేళన్//

(వచ్చే మన్వంతరంలో ఆ జమదగ్ని తనూజుడు,కమల నేత్రుడు అయిన పరశురాముడు, సప్తర్షులలో ఒకడై ప్రకాశిస్తాడు).

ఆ// శాంత చిత్తుడగుచు, సంగ విముక్తుడై,భవ్యుడై, మహేంద్ర పర్వతమున/

నున్నవాడు రాముడోజతో గంధర్వ, సిద్ధవరులు, నుతులు సేయుచుండ//

(గంధర్వులు, సిద్ధులు,తన పవిత్ర చరితమును గానం చేస్తుండగా,ఆ పరశురాముడు ఐహిక బంధములన్నింటి నుండీ విముక్తుడై, ప్రశాంత చిత్తంతో, తేజోవంతుడై, ఇప్పటికీ మహేంద్ర పర్వతంపై తపస్సులో నిమగ్నుడై ఉన్నాడు).

           🙏 శ్రీ పరశురామాయ నమః🙏

                  శ్రీరామ రక్ష సర్వ జగద్రక్ష.

                   ఓం శాన్తి శ్శాన్తి శ్శాన్తిః

       శ్లో// స్వస్తి:ప్రజాభ్య:పరిపాలయంతాం/

              న్యాయ్యేన మార్గేణమహీం మహీశా:/

              గో బ్రాహ్మణేభ్య:శుభమస్తు నిత్యం/

              లోకా: సమస్తాః సుఖినో భవంతు//

(సశేషం)

శుభమస్తు,

తూములూరి మధుసూదనరావు,

8-4-'26.

వినడం నేర్చుకుందాము

 🤫 *వినడం నేర్చుకుందాము* 🤫

సభ్యులకు నమస్కారములు.

*శ్రోతుమిచ్ఛామి శుశ్రూషా*. వినాలి అను కోరిక కల్గి ఉండడాన్ని శుశ్రూషా అని అంటారు. శుశ్రూష (సేవ, విను ఇచ్చ) *తక్కువ* మాట్లాడమని, *తక్కువ* తినమని, *ఎక్కువగా* వినమని సూచిస్తూ భగవంతుడు *ఒక* నోటిని, *రెండు* చెవులను మనకిచ్చాడు. తల్లి పలికే మాటలను, ఆమె నేర్పించే శబ్దాలను వినడం వల్లనే ప్రతి వ్యక్తి భావ వ్యక్తీకరణకు అవసరమయ్యే భాషను అభ్యసించగలుతున్నాడు. తత్వ దృష్టలైన మహాత్ములు ఉపదేశించే హితోపదేశాలను వినగలిగితే మానవ జన్మకు సార్థకత ఏర్పడుతుంది. అవుతే, వినాలనే ఆసక్తికలవారు లభించడం అంత సులువు కాదు. 

*శతేషు జాయతే శూర:, సహస్రేషుచ పండిత:, వక్తా దశ సహ్రేషు, శ్రోతాభవతి వానవా*

అర్థం:- వందలలో ఒక్కడైనా శౌర్య పరాక్రమాలు కలవాడు లభిస్తాడు. వేలల్లో ఒక్కడైనా పండితుడు కాగల్గుతాడు. పది వేల మందిలో ఒక్కడైనా ఆకర్షణీయంగా మాట్లాడగల్గే సామర్థ్యాన్ని కలిగి వక్తగా రాణిస్తాడు. కాని, మనసు లగ్నం చేసి సంపూర్ణమైన ఏకాగ్రతతో తత్వాన్ని, హితాన్ని వినగలిగే *ఉత్తమ శ్రోత* లక్షల్లో *ఒకరైనా లభిస్తారో లేదో* చెప్పలేము అని పై సూక్తి తెలియజేస్తుంది. 

Listening skills are more important than communication skills. అని పెద్దలంటారు. శ్రద్ధగా వినడం నేర్చుకోవాలి. *సగం సమస్యలు మాటల కంటే సరిగ్గా వినకపోవడం వల్లే వస్తాయి*.ఎదుటి వారు మాట్లాడుతూ ఉంటే వెంటనే కల్పించుకునే అలవాటు మానుకోవాలి. అవతలి వారు చెప్పేది పూర్తిగా, సహనంగా వింటే సగం సమాధానాలు అందులో మనకు లభిస్తాయి.

అమూల్యమైన విషయాలను, తత్వ రహస్యాలను, హితోపదేశాలను వినాలనే కోరిక (శుశ్రూష) కలవారు అరుదుగా లభిస్తారని, శ్రద్ధగా వినగల్గే వారు తమను తాము ఉద్దరించుకోవడమే గాకుండా మరెందరినో ఉద్ధరించగలరని మన పెద్దలు ఉద్బోధించారు. *అందుచేత మనమందరం సుభాషితాలను శ్రద్ధగా విను అభిలాషను కల్గి ఉండే ప్రయత్నం చేద్దాం*.

ధన్యవాదములు

వివేక చూడామణి

 గ్రంథకర్త: జగద్గురు ఆది శంకరాచార్యులు

వివేక చూడామణి గ్రంథాన్ని రచించినది ఆది శంకరాచార్యులు. ఈయన గొప్ప తత్వవేత్త మరియు సంస్కర్త.

 'వివేక చూడామణి' అంటే 'వివేకము అనే రత్నాలలో శిరోరత్నం వంటిది' అని అర్థం. 

ఇది ఒక ప్రకరణ గ్రంథం, అంటే వేదాంత సారాన్ని సామాన్యులకు అర్థమయ్యేలా ప్రశ్నోత్తర రూపంలో వివరించే అద్భుతమైన కావ్యం.

ఆధ్యాత్మిక సిద్ధాంతం: అద్వైత వేదాంతం

శంకరాచార్యులు స్థాపించిన (ప్రచారంలోకి తెచ్చిన) సిద్ధాంతం అద్వైతం. 

"అద్వైతం" అంటే 'రెండు కానిది' అని అర్థం. దీని ముఖ్య ఉద్దేశం జీవాత్మ, పరమాత్మ వేరు వేరు కాదు, రెండూ ఒక్కటే అని నిరూపించడం.

అద్వైత సిద్ధాంతంలోని ముఖ్య అంశాలు:

బ్రహ్మ సత్యం జగన్మిథ్యా: పరబ్రహ్మం మాత్రమే శాశ్వతమైన సత్యం. మన కళ్ళకు కనిపించే ఈ భౌతిక ప్రపంచం మార్పు చెందేది, కాబట్టి ఇది 'మిథ్య' (అంటే అశాశ్వతం లేదా సాపేక్ష సత్యం).

జీవో బ్రహ్మైవ నాపరః: ప్రతి జీవిలో ఉన్న ఆత్మ నిజానికి ఆ పరబ్రహ్మ స్వరూపమే. అజ్ఞానం (అవిద్య) వల్ల మనం మనల్ని దేహంగా భావిస్తున్నాం, కానీ జ్ఞానం కలిగినప్పుడు మనం బ్రహ్మమేనని అర్థమవుతుంది.

మాయ: ఒక తాడును చూసి పాము అని భ్రమపడినట్లు, మాయ వల్ల మనం ఏకైక సత్యమైన బ్రహ్మాన్ని అనేక రూపాలున్న ప్రపంచంగా చూస్తున్నాం. ఈ మాయను తొలగించుకోవడమే మోక్ష మార్గం.

ఈ గ్రంథంలో శంకరాచార్యులు మోక్షాన్ని పొందేందుకు మూడు మెట్లు అవసరమని చెప్పారు.

శ్రవణం - గురువు ద్వారా వేదాంత వాక్యాలను వినడం.

మననం - విన్న విషయాలను తర్కంతో ఆలోచించి రూఢి చేసుకోవడం.

నిదిధ్యాసన - తెలుసుకున్న సత్యాన్ని అనుభవంలోకి తెచ్చుకోవడానికి ధ్యానం చేయడం.

చివరగా, "ఆత్మజ్ఞానం" ద్వారా మాత్రమే మనిషి జనన మరణ చక్రం నుండి విముక్తి పొంది పరమానందాన్ని పొందుతాడని ఈ గ్రంథం బోధిస్తుంది.

వేద ఆశీర్వచనం

 *నమస్తే సదా వత్సలే మాతృ భూమే*

*కలియుగాబ్ది 5126*

*శ్రీ శాలివాహన శకం 1948 స్వస్తి శ్రీ చాంద్రమాన పరాభవ నామ సంవత్సరం ఉత్తరాయణము - వసంత ఋతువు - చైత్ర మాసం - కృష్ణ పక్షం - ‌షష్టి - మూల -‌‌ సౌమ్య వాసరే* (08.04.2026)

ప్రముఖ వేదపండితులు, తణుకు /తాలూకా ఇరగవరం వాస్తవ్యులు 

*బ్రహ్మశ్రీ గుళ్ళపల్లి శివశర్మ ఘనపాఠీ* *(9491391009, ఈ 9440091234)* గారి నేటి వేద ఆశీర్వచనం.

 

.🙏🙏 

భవదీయుడు

దశిక ప్రభాకరశాస్త్రి 

9849795167

---------------------------------------------

*పిల్లలకి బతుకుతో పాటు భారతీయత కూడా నేర్పండి*