అన్నమయ్య అక్షరవేదం

 

*అన్నమయ్య అక్షరవేదం ..సంపుటి -- 334*

*( నెరబిరుదిన్నిటాను నీ బంటు  .. )*

🌺🍃 ------------------------- 🍃🌺

ఓం నమో వేంకటేశాయ. 🙏

 అన్నమయ్య అక్షర వేదం ..సంపుటి -- 334 కి శుభ స్వాగతం ..🙏 

*ప్రార్థన ః--*🌹🙏

*ధారుణిలో నితని బిరుదు*

*"శ్రీ రాముని దాసు", పెక్కు చేష్టల వాఁడై*

*వీరాంజనేయునిగఁ దా*

*ధీరత్వములెన్నొ చూపె ,దేవుని బంటై !!*

🌹🙏🌹

✍️ *స్వీయపద్యము ( కందము )*🙏

🌹🌹

ఈ భువిపై ఇతడు గొప్పనైన బిరుదు సంపాదించాడు *"శ్రీ రాముని బంటు "* అని .🙏

అనేకమైన గొప్ప చేతలుచేసిన వాడై ఈ వీరాంజనేయుడు ,

ఆ దేవునికి దాసునిగా ఉంటూనే తన దిట్టతనములను ఎన్నెన్నో చూపినాడు !🙏

అట్టి హనుమంతునకు మంగళములు !🙏

🌹🙏🌹

🌺🍃 ------------------------- 🍃🌺

అన్నమాచార్యులవారు *ఆంజనేయ స్వామిని* శ్రీ వేంకటాద్రి రాముని బంటుగా పెక్కు సంకీర్తనలలో కీర్తించారు .🙏

ఇక్కడ ఆంజనేయుని విరాట్ స్వరూప వైభవాన్ని మనో నేత్రముతో సందర్శించి ఆ ఆజానుబాహుని రూపమును , స్వామికి  వర్ణిస్తున్నారు  బహు రమ్యముగా .🙏

మరి ఆ చక్కటి సంకీర్తన అర్థము తెలుసుకుని పాడుకుందామా !🙏

🌺🍃 ------------------------- 🍃🌺

🌹🌹

స్వామీ ! అన్నిటికంటే గొప్పనైన బిరుదునే పొందియున్నాడు మీ బంటు .🙏

అదిగో అతడు ఎంతగా వ్యాపించియున్నాడంటే ఆ ఆకాశమును తాకి ,  అంతటా నిండిపోయాడు .🙏

🌹🌹

పెళపెళమని తన మేను పెంచి విజృంభించగా , తారామండలాన చుక్కలన్నీ చిన్నవిగా అయిపోయి ఈతని మొలత్రాడుకు కట్టిన పూసల వలె మిణుకు మిణుకు మంటున్నాయి .🙏

అన్ని మూలలకు ఇతడు వ్యాపించి హూంకరించగా ,ఆ శబ్దము, ఈ సమస్త భువన భాండమూ నిండిపోయినది  !🙏

🌹🌹

ఇతడు అమితమైన వేగముతో  తన పాదమణచి ఒక్కసారిగా  పైకి ఎగురగా , ఆకాశమున ఉన్న లోకములన్నీ గడగడా వణికి పోయినవి ఆ తేజోవంతమైన వేగమునకు జడిసి .🙏

తన ప్రతాపమంతయూ ప్రకాశించుచుండగా , సంజీవినీ మూలికలు ఉన్న పర్వతము పై *కో......* అనుచు ఆవహించినాడయ్యా వాయువేగముతో నీ బంటు .🙏

🙏🙏

ఆనుకూల్యుడై శ్రీ రామునికీ , మనస్సును ఆహ్లాదపరచి సాంత్వననొసగి సీతాదేవికీ , ఇరువురకూ హితుడైనడయ్యా  ఈ బంటు .🙏

ఇన్నిచేసిన పిదప ఇదిగో ఈ *శ్రీ వేంకటాద్రిపై* , నీ దాసునిగా అమరియుండి ,నీ అరచేతిలోననే ఉండే నిమ్మపండు మాదిరిగా ,సదా నీ ఆజ్ఞను పాలించు వాడై ,సర్వ సన్నద్ధుడై సదా నీ సేవకే నిలిచియున్నాడయ్య ఈ బంటు .🙏

🌹🙏🌹

*ఓమ్ శ్రీ అలమేలుమంగా సమేత శ్రీ వేంకటేశ్వర స్వామినే నమః !*🙏

తాత్పర్య సహిత దృశ్య మాలికగా మీకు అందించాలన్న నా చిన్న ప్రయత్నమును ఆశీర్వదిస్తారని ఆశిస్తూ..🙏

దోషములున్న...మన్నించమని విన్నపము... 🙏

*(  అన్నమయ్య అక్షర వేదం --- సంపుటి 334)*

✍️ *-- వేణుగోపాల్ యెల్లేపెద్ది* 🙏

     

🌹🌹 *సంకీర్తన* 🌹🌹

*॥పల్లవి॥*

నెరబిరుదిన్నిటాను నీ బంటు

వొరసె గగనమదివో నీ బంటు

*॥చ1॥*

ముంచిన చుక్కలు మొలపూసలుగాఁ

బెంచె మేను పెళపెళనార్చి

అంచులు మోవఁగ నబ్జభవాండము

నించె నార్భటము నీ బంటు

*॥చ2॥*

గగనలోకములు గడగడ వణఁకఁగ

నెగసె హుటాహుటి నీ బంటు

మగటిమి మెరయఁగ మందులకొండకు

నిగిడి కోయనుచు నీ బంటు

*॥చ3॥*

ఇమ్ముల రఘుపతి హితుఁడై సీతకు

నెమ్మన మలరిన నీ బంటు

కమ్మర నిదె వేంకటేశ నీచే

నిమ్మపండైన నీ బంటు

               🌹🙏🌹