రామాయణమ్ 158

 రామాయణమ్ 158

...

సీత మాటలు విన్న రావణుడు ఒక్కసారిగా వికటాట్టహాసం చేశాడు ,ఒక చేతిలో మరొక చేయివేసి చరిచి శరీరాన్ని పెద్దగా చేశాడు .

.

సీతనుద్దేశించి పలుకుతూ " నీవొక పిచ్చిదానివి 

నా వీర్యము,బలపరాక్రమాలు ఎంత చెప్పినా నీ తలకు ఎక్కడం లేదు !

.

ఆకాశంలో నిలుచుని భూమిని ఎత్తివేయగలను,సముద్రము మొత్తాన్ని త్రాగివేయగలను ,సాక్షాత్తూ మృత్యువే యుద్ధంలో నాకు ఎదురుగా నిలబడిపోరాడితే మృత్యువునే చంపివేయగల సమర్ధుడను! 

.

ఇచ్ఛానుసారము రూపము ధరించగలను ,ఓ ఉన్మత్తురాలా చూడు నీ కోరికలు తీర్చగల నీ భర్తనైన నా రూపము చూడు .

.

కోపముతో మాట్లాడుతున్న రావణుని కన్నుల ఎరుపుజీరలు ప్రస్పుటంగా కనపడుతున్నాయి ,సన్యాసిరూపాన్ని విడిచి యముడిలాంటి తన రూపానికి మారిపోయాడు

.

నల్టటిమేఘము లాగా ఉన్నాడు ,పదితలల ఉగ్రరూపం ధరించాడు .ఇరువది నేత్రములు ఎర్రగా ఉన్నాయి .ఎర్రటి వస్త్రాలు ధరించి ధగధగమెరిసిపోయే స్వర్ణాభరణాలు అలంకరించుకొని ధనుర్బాణాలతో నిలిచి ఉన్నాడు.

.

సీతతో ఇలా అన్నాడు రావణుడు " నీకు భర్తగా తగిన వాడను నేనే ,ఆ రాముడినిక మరచిపో ,నీకు ఇష్టముకాని పని నేను చేయను ,నీ మనస్సు నా పై మరల్చుము.

.

సీతాదేవితో మాట్లాడుతూ మాట్లాడుతూ ఆవిడను సమీపించి, ఎడమచేతితో జుట్టుపట్టుకొని కుడిచేయి నడుముక్రిందభాగములో వేసి గట్డిగా పట్టుకొని ఒక్కసారిగా ఎత్తి లేవదీసుకొని వచ్చి చాలా పరుషముగా మాట్లాడుతూ తన రధములో తన ఒడిలో కూర్చుండ బెట్టుకున్నాడు.

.

 మెలికలు తిరుగుతున్న ఆడపాము వలె ఉన్న సీతాదేవిని ఒడిసిపట్టుకొని ఆకాశానికి ఎగిరాడు.

.

సీతాదేవి ఆక్రందనలు ,రోదనలు మిన్నుముట్టాయి .

మత్తెక్కినదాని వలే చిత్ర భ్రమ చెందిన రోగపీడితుడు ఏ విధంగా అరుస్తాడో ఆ విధంగా అరవసాగింది 

.రామా రామా రామా రామా అని అరుస్తూ ఏడవసాగింది.

.

రామాయణమ్ 159

...............

రామా రామా అంటూ సీతమ్మ చేసే ఆక్రందనలు వనమంతా ప్రతిధ్వనిస్తున్నాయి .

.

ఓ లక్ష్మణా మహాబాహూ!

 నన్ను రావణుడు అపహరించి తీసుకు వెడుతున్నాడు చూడవయ్యా

.

రామా ధర్మము కోసము జీవితాన్నీ సుఖాన్నీ సంపదలనూ విడిచివేసావు కదయ్యా ,అధర్మాత్ముడు వీడు రావణుడు నన్ను అపహరించి తీసుకుపోవటం నీవు చూడటము లేదా ,

.

ఓ రామా ఎక్కడున్నావు .

.

ఓయీ రావణా, నీ పాప ఫలాన్ని నీవు కొంతకాలము తరువాత అయినా అనుభవించక తప్పదు. 

.

రావణా ఎవరికైనా దుష్టకర్మ ఫలము వెంటనే అగుపడదు ,పాపము అనే విత్తనాన్ని నీవు ఇప్పుడు నాటావు త్వరలో అది పండగలదు ,

మృత్యువు అనే పంటను నీవు అనుభవిస్తావు .

.

అయ్యో ! ఈ నాటికిగానీ కైకకోరిక ,ఆమె బంధువుల కోరిక తీరినది .

.

ఓ కొండగోగు వృక్షములారా రావణుడు నన్ను అపహరించాడని రామునికి తెలపండి .

.

ఓ ప్రస్రవణ పర్వతమా నీకు నమస్కారము నన్ను రావణుడు ఎత్తుకెళుతున్నాడని రామునికి తెలపండి .

.

తల్లీ గోదావరీ నన్ను రావణుడు అపహరించాడని రామునికి తెలుపమ్మా.

.

ఓ ,మృగములారా,పక్షులారా రామునికి తెలపండి వీడు చేసిన దుష్కార్యము గురించి .

.

ఓ ప్రాణులారా నీ ప్రాణాన్ని రావణుడు దొంగిలించి తీసుకు వెడుతున్నాడని రామునికి తెలపండి .

.

దుఃఖార్తయై ,దీనముగా విలపిస్తున్న సీతకు ఒక చెట్టు మీద ఉన్న జటాయువు కనబడ్డాడు .ఆయనను చూడగానే ప్రాణము లేచివచ్చినట్లై ఒక్క పెట్టున అరిచింది సీతమ్మ .

.

ఓ జటాయూ, పాపాత్ముడైన రావణుడు నన్ను అనాధురాలిని వలే తీసుకు పోతున్నాడు .

.

జటాయూ నీవు వీనిని ఎదిరింపలేవు వీడు క్రూరుడు దుష్టబుద్ది ,నా అపహరణానికి సంబంధించిన విషయములన్నీ రామలక్ష్మణులకు నీవే ఎరిగింపుము అని జాలిగోలిపెటట్లు గా రోదించే రామపత్నిని జటాయువు చూశాడు.