మూడు రకాల పాపాలు

మూడు రకాల పాపాలు 

మనం సామాన్య దృష్టితో పుణ్యం, పాపం అని పేర్కొంటాం.  పాపం చేస్తే పాప ఫలం పుణ్యం చేస్తే పుణ్యఫలం లభిస్తుందని మనం భవిస్తూవుంటాం. పాప పుణ్య విభజన మనం సామాజికంగా ప్రతివారు ధర్మపరులు కావాలని ఏర్పాటు చేసినట్లు కనపడుతుంది.  ప్రతివారు ఉత్తమమైనది మాత్రమే కోరుకుంటారు కాబట్టి పుణ్యకార్యాలు చేస్తే పుణ్యఫలంగా స్వర్గ ప్రాప్తి కలుగుతుందనే ఉద్దేశంతో పుణ్యాకార్యాలు చేస్తారు.  దీనివల్ల సమాజంలో అందరు సుఖ సంతోషాలతో ఉండగలరు. హిందూధర్మంలో ఏది చెప్పినా అది సమాజ శ్రేయస్సుని దృష్టిలో ఉంచుకొనే ఉంటుంది. మన ఋషులు చాలా దూరం అలోచించి మనకు చక్కటి సాంప్రదాయాలను ఏర్పాటు చేసారు. 

ప్రతివారు తాము సద్గతులను పొందాలని పుణ్యకార్యాలను చేయటానికి పూనుకొంటారు.  వారు మరణానంతరం స్వర్గలోక నివాసం చేస్తారని మనకు శాస్త్ర ప్రమాణం. 

కానీ ముముక్షువులు మూడు రకాల పాపాలనుండి విముక్తుడు కావలి అప్పుడే మోక్షప్రాప్తి కలగదని మనకు ఉపనిషతులు తెలియచేస్తున్నాయి. 

మూడు రకాల పాపలు ఏవి. 

గృహస్థ జీవనానికి ఆధ్యాత్మిక జీవనానికి చాలా తేడా ఉంటుంది.  గృహస్తు  ఆచార సాంప్రదాయాలకు అనుగుణంగా తన జీవనానిని కొనసాగించాల్సి ఉంటుంది.  అదే ఆధ్యాత్మిక జీవనంలో సాధకుడు సదా ఆ పరబ్రహ్మ్ తత్త్వం వైపే పయనిస్తారు. నిత్యం, అనుక్షణం బ్రహ్మత్వంలోనే జీవిస్తాడు.  ఒకరకంగా చెప్పాలంటే సాధకుడు ఈ ప్రకృతితో సంబంధాన్ని సన్నగించుకొని దైవత్వం వైపు సంబంధాన్ని బలపరచుకుంటాడు.  కానీ విచిత్రం ఏమిటంటే ప్రక్రుతి యోగిని సదా వెన్నంటి ఉండి యోగికి అన్నివిధాల అనుకూలంగా మారుతుంది.  యోగి అతి చల్లని జలంతో కూడా స్నానం చేయగలడు, మండే మంటలమీద తన శరీరాన్ని ఉంచిన శరీరం కాలదు. అటువంటి అనేక అతీంద్రియ శక్తులు యోగికి కారతలామలకలం అవుతాయి.  యోగి వస్త్రధారణ చేయాల్సిన పనిలేదు రమణ మహార్షిలాంటి మహానుభావులు ఈ సమాజం కోసం కౌపీనం ధరిస్తారు కానీ నిజానికి అదికూడా వారికి అవసరం లేదు. ఒక్క మాటలో చెప్పాలంటే యోగికి మన సమాజపు నియమాలు బందించవు కేవలం సదా వారి ద్రుష్టి పరబ్రహ్మ మీదనే ఉంటుంది. 

ఇక్కడ చెప్పే మూడురకాల పాపలు సమాజ జీవనము చేస్తున్న గృహస్తులకు కాదు కేవలం సంపూర్ణ సాధన చేస్తున్న యోగులకు మాత్రమే అందుకే నేను పైన అంతవివరణ ఇచ్చాను. 

ఇప్పుడు పూర్తిగా ఆధ్యాత్మిక జీవనం చేసే యోగులైన సాధకులకు మాత్రం ఉన్నటువంటి మూడు రకాల పాపలు ఏమిటో చూద్దాం. 

1) పాప పాపం: సాధారణంగా మనం పాపం అనుకునే పాపం దీనిని పాప పాపం అంటారు.  గృహస్తులు కానీ అలాగే సాధకులు కానీ పాప కర్మలు అంటే నిషిద్ధ కర్మలు చేయకూడదు. 

2) పుణ్య పాపం: ఇది వినటానికి కొంత విచిత్రంగా కనిపిస్తుంది ఎందుకంటె పుణ్యం పాపం కాదు కాదా మరి పుణ్య పాపం ఏమిటి అని మనం అనుకుంటాము. నిజానికి సాధకుడు పుణ్య కార్యాలు కూడా చేయకూడదు అంటే పుణ్యం కూడా మూటకట్టుకోకూడదు. ఎందుకంటె ఎప్పుడైతే సాధకుడు పుణ్య కార్యాలు చేసి పుణ్య ఫలాన్ని పొందుతాడో అప్పుడు ఆ పుణ్య ఫలం అనుభవించటానికి మరలా జన్మ ఎత్తవలసి వస్తుంది.  కాక పుణ్య ఫలం చాలా ఎక్కువగా ఉంటే దానిని అనుభవించటానికి పుణ్యలోకాలకు (స్వర్గం) వెళ్ళవలసి ఉంటుంది.  ఆ ఫలం పరిసమాప్తం కాగానే మళ్ళి మానవ జన్మ ఎత్తి మరల ఈ జరామృత్యు వలయంలో చిక్కుకోవలసి ఉంటుంది.  కాబట్టి సాధకుడు పుణ్యం కోసం ఏ కర్మను చేయకూడదు. 

3) అజ్ఞాన పాపం:  ఇది మనకు సాధారణ జీవన విధానంలో ఎక్కడ వినపడదు.  ఆధ్యాత్మిక జగత్తులో సంపూర్ణ జ్ఞానం పొందిన వారు అంటే బ్రహ్మ జ్ఞానం పొందిన వారు మాత్రమే మోక్షార్హులు ఎందుకంటె మోక్షం సిద్ద వస్తువు సాద్య వస్తువు కాదు.  జిజ్ఞాసి బ్రహ్మ జ్ఞ్యానాన్ని పొందితే అప్పుడు ఈ అజ్ఞాన పాపం నుండి ముక్తుడు అవుతాడు. 

కర్మలు చేయకుండా ఉండటం యెట్లా: 

ఫై మూడు చదివిన తరువాత ప్రతి వారికి ఒక సందేహం కలుగుతుంది అదేమిటంటే మనిషి చేసే కర్మలు రెండు రకాలు ఒకటి పాప కర్మ రెండు పుణ్య కర్మ కాబట్టి చేసే ప్రతి పని (కర్మ) ఏదో ఒక విభాగంలోకి వస్తుంది కాబట్టి విధిగా తానూ చేసే కర్మలు రెంటిలో ఏదో ఒక ఫలాన్నిఇస్తాయి కదా మరి అటువంటప్పుడు పలితం లేకుండా కర్మలు చేయటం ఎట్లా. దీనికి సమాధానం సాధకుడు చేసే ప్రతి కర్మని ఈశ్వరార్పణగా చేయాలి అప్పుడు తానూ చేసే కర్మల ఫలాపేక్ష ఉండదు.  అది కేవలం ఈశ్వరునికే అర్పించబడుతుంది. ఇది బాగావుంది అయితే పాపాలు చేసి ఈశ్వరార్పణం అంటే అన్ని పాపాలు తొలగిపోతాయా అని అడగవచ్చు.  ఎట్టిపరిస్థితిలో ఆ పాప ఫలం పరమేశ్వరునికి చెందదు. ఎందుకంటె నీవు చేసే ప్రతి పాపము నీ మనస్సు, బుద్ది మిళితంగా చేస్తావు అంటే ఉద్దేశ్యపూర్వకంగా చేస్తావు ఎప్పుడైతే నీ మనస్సు నీవు చేసే కర్మ మీద లగ్నం అయ్యిందో దీని ఫలితం పూర్తిగా నీ కాతా లోనే చేరుతుంది. 

మహాపురుషులు తాము ఉద్దేశ్యపూర్వకంగా ఏ పనులు చేయరు.  కేవలం మనస్సుని పెట్టకుండా మాత్రమే కర్మలు చేస్తారు అందుకే వారు ఈ ప్రపంచంలో వున్నా కూడా లేనట్లే ఎందుకంటె వారు సదా తామరాకుమీద నీటి బిందువుగా వారి జీవితాన్ని గడుపుతారు.  నాది అని వారు ఏది అనుకోరు, రాగద్వేషాలకు బానిసలు కారు నిర్లిప్తగా జీవనాన్ని గడుపుతారు. 

ఓం శాంతి శాంతి శాంతిః 

తత్వమసి 

గమనిక: విజ్ఞులైన పాఠకులారా తెలుగు టైపు చేయటంలో కొన్ని తప్పులు సహజంగా దొర్లవచ్చు దయచేసి తప్పులను ఎత్తకుండా కేవలం భావాన్ని మాత్రమే తీసుకోగలరు. అమృత తుల్యమైన పానకాన్ని గ్రోలెరప్పుడు కొన్ని పుడకలు  రావటం సహజమే కదా.