*ముముక్షువులు , సాధకులు భగవానుని పాదపద్మాలను ఆశ్రయించి నిత్యమైన భగవత్ప్రాప్తికై పరితపించాలి*
గురువుల అనుగ్రహం లేకుంటే ఎవ్వరు కూడా తత్వజ్ఞానప్రకాశాన్ని పొందలేరు . భగవంతుడు ఈ ప్రపంచాన్ని సృష్టించి వాసనాబద్ద జీవులను సంసారం నుండి విముక్తి పొందటానికి అనేక విధాలుగా సంరక్షిస్తున్నాడు . అయినా ఈ ప్రపంచంలో అనేకులు బద్ధులవుతున్నారు . వీరిని బంధాల నుండి తప్పించడానికై దయామయులైన మహర్షులు , గురువులు భగవదాజ్ఞను అనుసరించి ప్రపంచాన్ని ఉద్ధరించుటకై ప్రయత్నిస్తూనే ఉన్నారు . ధర్మం నశించిపోతున్న సమయంలో భగవంతుడే స్వయంగా అవతరించి ధర్మాన్ని పునః ప్రతిష్ఠ చేస్తుంటాడు , శ్రీరామకృష్ణాది అవతారాలు ఇందుకు నిదర్శనం . వేదములకు ఆస్థానమైనటువంటి భరతభూమిలో విభిన్న మతములు తలెత్తి సనాతన ధర్మాన్నే మట్టుమాపు పరిస్థితులు ఏర్పడినవి . మతమన్న నేమియో నెఱుఁగనివారు మతము పేరిట మారణ హోమాలు జరుపుచుండిరి . వేద ధర్మాన్ని అవలంబిస్తూ విభిన్న పోకడలకు పోయి తమ మతమే గొప్ప అని వాదోపవాదాలకు దిగటంతో సనాతన ధర్మ నిజతత్వమునకు మచ్చలు ఏర్పడినది . ఆ తరుణంలో నాస్తికులకు , పాషండులకు నాయకత్వమైనది ఈ భారతావని. అట్టి తరుణమున భారత దేశమున *సంభవామి యుగేయుగే* అన్నట్లు కైలాసవాసి అయిన పరమేశ్వరుడే సాక్షాత్తు శ్రీ ఆదిశంకరుచార్యుల రూపంలో కేరళ దేశంలో కాలడి అగ్రహారమందు శివగురు ఆర్యామ్బ పుణ్యదంపతులకు అవతరించారు . బాల్యమునందే శంకరులు సర్వజ్ఞుడై ఉన్నారు. అటుపిమ్మట గురువుల వద్ద విద్యను అభ్యసించి వేదవేదాంత శాస్త్ర సారగ్రహీతయైనాడు . స్వార్ధరహితుడైన శ్రీ శంకరులు తానుపొందిన బ్రహ్మజ్ఞానమును ప్రజల కందించటానికి దేశం నలుమూలల ముమ్మార్లు పర్యటన చేసి సనాతనధర్మం యొక్క అసలైన అద్వైత సిద్ధాంతాన్ని పునఃప్రతిష్ఠిత చేసిన అగ్రగణ్యులు . తన దిగ్విజయము చిరస్థాయిగా ఉండాలని దలచి సనాతనధర్మ పరిరక్షణ కొరకు దేశం నందు నాలుగు దిక్కులలో నాలుగు వేదలకు ప్రతీకగా నాలుగు పీఠములను స్థాపన చేసి వీరి నలుగురు ప్రధాన శిష్యులను పీఠాధిపతులుగా నియమించారు . వీటినే చతురామ్నాయ పీఠాలు అని వ్యవహరిస్తారు . ఇవేకాకుండా బ్రహ్మసూత్రాలకు భాష్యం , వేదాంత భాష్యం , భగవద్గీత భాష్యం రచనలు చేశారు. వీటినే ప్రస్తానత్రయం అంటారు . ఇవి బ్రహ్మజ్ఞానాన్ని సూచించే గ్రంధాలు . ఇవే కాకుండా వేదాంత తత్వాన్ని బోధించే అనేక ప్రకరణ గ్రంధాలు , స్తోత్ర రచనలు కూడా చేశారు . అనేకచోట్ల శ్రీచక్ర స్థాపనలు , దేవాలయాల పునరుద్ధరణ , వేద సంరక్షణను చేసి చివరగా శిష్యులకు దర్శనమిచ్చి వేదాంతం బోధించి కేదారం నందు ఈశ్వరుని దర్శనం చేసుకుని తన అవతార పరిసమాప్తి చేశారు శంకరులు . వీరి జీవితం మనకు ఎంతో ఆదర్శప్రాయం , అందుకే వీరిని *శంకరః శంకరస్సాక్షాత్* అని చెప్పడంలో ఎలాంటి సందేహం లేదు . ఆస్తికులందరు రోజుకు కనీసం ఒకటైనా శంకరులు వారందించిన ఏదోఒక భాష్యగ్రంధం , ప్రకరణ గ్రంథం , దేవతాస్తోత్రాలు చదువుటకై ప్రతిజ్ఞచేసి బ్రహ్మజ్ఞానం తెలుసుకొనటకై ప్రయత్నం చేయాలని దీక్షపూనండి , అదే వారికి మనమందించే అచంచలమైన గురుసేవ , గురుభక్తి . 🙏🕉️🪷🌸🌹
సర్వం శ్రీ శారదా
చంద్ర మౌళీశ్వరార్పణమస్తు...
-- *జగద్గురు శ్రీశ్రీశ్రీ భారతీతీర్థ మహా స్వామివారు*
