*🙏శ్రీ హనుమాన్ చాలీసా🍁*

*🙏శ్రీ హనుమాన్ చాలీసా🍁* 

*🍁జ్ఞాన యజ్ఞం - 9వ  రోజు 9🌹*

నిన్న మనం హనుమంతుని దివ్యమైన తేజస్సును, శివాంశ సంభూతుడైన ఆయన వైభవాన్ని తెలుసుకున్నాం. ఈరోజు హనుమంతుడు కేవలం శక్తివంతుడు మాత్రమే కాదు, ఆయన ఎంతటి బుద్ధిమంతుడో, రామకార్యం పట్ల ఆయనకు ఉన్న శ్రద్ధ ఎటువంటిదో ఈ ఏడవ చౌపాయి ద్వారా దర్శించుకుందాం.

          **ఏడవ చౌపాయి**

 **బిద్యావాన గుణీ అతి చాతుర |**

 **రామ కాజ కరిబే కో ఆతుర ||**

         **ప్రతిపదార్థం**

  * **బిద్యావాన (విద్యావాన్)** సకల విద్యలు తెలిసినవాడా (మహాపండితుడా)!

  * **గుణీ** సద్గుణములు కలవాడా!

  * **అతి చాతుర** అత్యంత సమయస్ఫూర్తి, నేర్పు (చతురత) కలవాడా!

  * **రామ కాజ** శ్రీరామచంద్రుని పనులను

  * **కరిబే కో** చేయడానికి

  * **ఆతుర** ఎల్లప్పుడూ ఉత్సాహముతో (ఆతురతతో) ఉండేవారు.

 **విస్తృత ఆధ్యాత్మిక వివరణ**

**1. బిద్యావాన & గుణీ (విద్య మరియు సంస్కారం)**

హనుమంతుడు నవవ్యాకరణ పండితుడు.సూర్యభగవానుడి వద్దే సకల శాస్త్రాలను అభ్యసించిన జ్ఞాని.*అనేన బహుధాశ్రుతం* – ఇతను చాలా విద్యలు తెలిసినవాడని రామచంద్రమూర్తి మొట్ట మొదటి సారి సాదు వేషంలో హనుమ రామ లక్షణులను కలిసిన సమయంలో అంటాడు చతుర్వేదాలు, వేదాంగాలు తెలిసినవాడు.ఎలా తెలుసు అంటే 

ఇంద్రుడు వజ్రాయుధంతో కొట్టిన సందర్భం లో దేవతలందరూ తమ బలాలను హనుమకు ఇచ్చినప్పుడు సూర్యభగవానుడు - "నా తేజస్సులో నూరవ భాగాన్ని ఈయనకు ఇస్తున్నానని" అన్నాడు. సూర్యతేజస్సులో నూరవభాగం హనుమంతునిలో ఎప్పుడూ ఉంటుంది.ఇతనికి చదువుకునే వయస్సు వచ్చినప్పుడు నేను విద్య నేర్పుతాను అంటాడు సూర్యభగవానుడు.సూర్యుడు సకల వేదాలు తెలిసిన వాడు, ఆయనకు నమస్కారం చేస్తే మనము కూడా సకల విద్యల్లో నిష్ణాతులు అవుతాం.

ఆంజనేయస్వామివారికి సూర్యుని వల్ల వర్చస్సు వచ్చింది ఆ విద్య కేవలం హనుమకు మాత్రమే పనికొచ్చిందా...! లోకానికి మేలు చేసిన వర్చస్సు. ఆ విద్యతో లోకానికి ఉపకారం చేశాడు ఆంజనేయస్వామి

భారతజాతికి హనుమంతుడు ఆదర్శం కావాలని స్వామి వివేకానంద చెప్పారు.

త్యాగము, శక్తి, బలము, దృఢత్వము, జ్ఞానము... ఇవన్నీ ఉండేలా మానవుడు తయారు కావాలి అంటే అవన్నీ ఉన్న హనుమనే ఉపాసన చేయాలి.

సూర్యభగవానుడు హనుమకు ఇచ్చింది విద్య. ఆ విద్యవల్ల వచ్చేది వర్చస్సు. ఆ వర్చస్సు పదిమందికి మేలు చేస్తే 'సు-వర్చస్సు'

హనుమకు 'సువర్చస్సు' సూర్యుని వల్ల వచ్చింది. సూర్యుని వల్ల వచ్చిందంటే - దేవతావ్యవస్థలో 'వారి నుండి వచ్చిన దానిని' - కూతురు/కొడుకు అంటారని చెప్పుకున్నాం. సూర్యుని నుండి వచ్చిన 'సువర్చస్సు' విద్య ద్వారా హనుమంతునకు వెళ్ళింది. హనుమ దాన్ని స్వీకరించి ధరించాడు.దీనినే సూర్యుడు తన కూతురైన సువర్చలను హనుమంతునకు ఇచ్చి పెళ్ళిచేశాడని మనకు అర్థం కావడం కోసం కథగా చెప్పారు. పురాణాలు అన్ని విశ్వ విజ్ఞాన రహస్యాలు. వాటిని సూక్ష్మ బుద్ధి తో అన్వయం చేస్తేనే అందులోని రహస్యాలు అర్దం అవుతాయి.

ఇలా సువర్చస్సు తో ఉన్న హనుమ ఉపాసన చేస్తే పర అపర అనే రెండు విద్యలు సిద్ధిస్తాయి.

ఆంజనేయస్వామివారు సూర్యపుత్రికయైన సువర్చలతో ఇప్పటికీ గంధమాదన పర్వతము మీద కదళీవన మధ్యంలో ఉష్ణ వాహనంపై ఉంటారు. ఉష్ట్రం అనగా ఒంటె ఒంటె హనుమంతుని వాహనమని మంత్రశాస్త్రం చెప్తోంది.

ఒంటె వాహనము, కదళీవనము అనగానే సువర్చలా సమేత ఆంజనేయ స్వామివారే దీనిని శక్తి సహిత ఉపాసన అంటారు.అలా హనుమ విద్యావాన్.

హనుమ వేద విద్యలు, వ్యాకరణం మాత్రమే కాదు సంగీతం లోనూ దిట్ట, త్రిశూల రోముడు అనే రాక్షసుడు దుర్భేద్యమైన గుహలో దాక్కుంటే హనుమ సంగీతం తో ఆ రాళ్ళు కరిగించి వాడిని సంహరించాడు. స్వయంగా నారద, తుంబురులే నీ అనుగ్రహం ఉంటే మేం బాగా పాడగలము అంటారు. అందుకు విద్యావాన్ స్వామికి తెలియని విద్య లేదు...

ఇంత విద్య ఉండటం ఒక్కటే కాదు గొప్ప గుణములు కలవాడు హనుమ, రామ కథ మొట్ట మొదట చెప్పింది హనుమ సుందర కాండ లో అశోక వనం లో చెట్టు పై కూచుని కొంత భాగం, దిగిన తర్వాత సీతమ్మను ఓదారుస్తూ ముందు జరగ బోవు కథ చెప్తాడు. అందుకే సుందరకాండ చదివితే రామాయణం చదివినట్టే.

తరగని జ్ఞానం తో పాటు అపార వినయం,ఉత్సాహం,బలం,విశ్వాసం, పరాక్రమం ఇలా ఒక్కటా సకల గుణాలకు ఆలవాలం స్వామి.

మహేంద్ర పర్వతం మీద నుండి ఎగురుతూ రామ బాణం లా లక్ష్యాన్ని సాధించే వస్తాను అని తన బలంగా కాకుండా రామ అనుగ్రహం గా చెప్తాడు. సీతమ్మ దొరక్క దిగులు చెంది నీరసించి పోతాడు మళ్ళీ తనను తానే ఉత్తేజ పరచుకుని వెతకి విజయం సాధిస్తాడు. లంకలో సీతమ్మ ను వెతికే ప్రయత్నం లో చూడకూడనీవి కొన్ని కనపడతాయి వీటి యందు నా మనస్సు లగ్నం కాలేదు కనుక దోషం లేదు అంటాడు.అంటే దేని మీద మనసు పెట్టాలో, ఎక్కడ ఎలా తనను తాను నిగ్రహించు కోవాలో తెలిసిన వాడు హనుమ.

అన్ని తెలిసినా సీతమ్మ దగ్గర నేను వానరులు అందరిలో అల్పుడిని అంటారు.అదీ గొప్ప గుణం.

చిన్న చిన్న పనులు చేసి అంతా నేనే చేశాము అనే మనం హనుమ నుండి ఈ గుణం నేర్చుకోవాలి అంతా రాముని అనుగ్రహం అంటాడు తప్ప తాను చేశాను అనడు,అదే గొప్ప గుణం.ఈ గుణం ఉన్నవాడికి లోకంలో తిరుగులేదు..

ఎంతటి జ్ఞానమున్నా అది సత్ప్రవర్తనతో తోడైనప్పుడే దానికి విలువ అని ఇది మనకు నేర్పుతుంది.

**2. అతి చాతుర (అసాధారణ చతురత)**

చాతుర్యం అంటే నేర్పరితనం. స్వామివారి నేర్పరితనాన్ని అనేక సందర్భాలలో జరిగిన ఘట్టాలలో పరిశీలించవచ్చు. తెలివితేటలు ఉండడమే కాదు, వాటిని ఎలా వినియోగించుకుంటున్నామనేది నేర్పరితనం. విద్య, జ్ఞానం గొప్పతనం వాటి వినియోగదశలో తెలుస్తుంది. దానినే వ్యవహారంలో చురుకుతనం, చలాకీతనమని

అంటారు, సురస ను ఓడించిన సందర్భంలో మనం ఇది చూడవచ్చు.క్లిష్ట పరిస్థితుల్లో ఎలా వ్యవహరించాలో ఆయనను చూసి నేర్చుకోవాలి.

**3. రామ కాజ కరిబే కో ఆతుర (సేవా తత్పరత)**

రామకార్యం చేయడంలో ఆత్రుత కలవాడు ఆతురత అంటే ఎలాగైనా సాధించాలి. సాధించేవరకూ నిద్రపోకూడదనుకోవడం అది హనుమ వద్ద రామ కార్యంలో కనబడుతుంది. మైనాకుడు కాసేపు ఆగి వెళ్ళవయ్య అంటే నాకు సమయం లేదు అని ముట్టుకుని ఆగకుండా ముందుకు వెళ్తాడు.

భగవంతుని సేవలో ఆయనకు ఉన్న ఆ ఉత్సాహం (ఆతురత) మనకు ప్రేరణ. ఏ పనినైనా వాయిదా వేయకుండా, అత్యంత ఆసక్తితో పూర్తి చేయాలనేది ఇక్కడి అంతరార్థం.

ఇలా చెప్పుకుంటూ పోతే ఎన్నో విషయాలు ఉన్నాయి,కానీ వివరణ మరీ పెద్దగా అవుతుంది అన్న ఉద్దేశ్యం తో ఇంతటితో ఆపుతున్నాను,మీకు ఇంత వివరణ కావాలా వద్ద కామెంట్ చేయండి👇

ఇన్ని విషయాలు చెపితే ఏదోక విషయం చాలీసా చదివే సమయంలో మనసులోకి వచ్చి నిలబడితే అదే అసలైన పారాయణ అనే ఉద్దేశ్యం తో ఇస్తున్నాను, పైగా రామాయణ స్మరణ, హనుమత్ కథల తో హనుమాన్ చాలీసా యజ్ఞం పరిపూర్ణం అవుతుంది అని. మీరెలా అంటే అలాగే ముందుకు పోదాం...

 **తులసీదాసు గారి సందేశం**

తులసీదాసు గారు ఈ చౌపాయి ద్వారా ఒక పరిపూర్ణ వ్యక్తిత్వానికి నిర్వచనం ఇచ్చారు. ఒక వ్యక్తికి **విద్య** ఉండాలి, ఆ విద్యకు **సద్గుణం** తోడవ్వాలి, లోకంలో బ్రతకడానికి **చాతుర్యం** ఉండాలి, వీటన్నింటికీ మించి భగవంతుని సేవలో **నిరంతర ఉత్సాహం** ఉండాలి. ఈ నాలుగు లక్షణాలు ఉన్నచోట విజయం తథ్యం.

*జై శ్రీరామ్!జై హనుమాన్!*

        🍁🌹🙏🌷🍁

         *🌷సేకరణ🌷*

      🌹🌷🍁🍁🌷🌹

        *న్యాయపతి వేంకట*

       *లక్ష్మీ నరసింహా రావు*

🙏🍁🙏🍁🙏🍁🙏🍁🙏