*ॐ నాగుల చవితి శుభాకాంక్షలు*
*I. పుట్టలో పాలు*
"తోక తొక్కితే తొలగిపో!
నడుం తొక్కితే నా వాడనుకో!
పడగ తొక్కితే కస్సుబుస్సుమని మమ్ములను భయపెట్టకు తండ్రీ!" అని పుట్టలో పాలుపోస్తూ నమస్కరిస్తాం.
విశేషం
పాము
* తోక తొక్కితే పగపడుతుందంటారు. అంటే ద్వేషంతో రెచ్చిపోతుంది.
* నడుం తొక్కితే, బాధతో తొక్కినవాడి అంతు చూస్తుంది.
* పడగ తొక్కితే బుసకొడుతూ భయపెడుతుంది.
*II. ఖలునకు నిలువెల్ల విషం*
తలనుండు విషము ఫణికిని,
వెలయంగా తోకనుండు వృశ్చికమునకున్
తలతోకయనక యుండు ఖలునకు
నిలువెల్ల విషము గదరా సుమతీ!
*III. మనం సర్పంగా ఉంటామా? గోవు అవుతామా?*
దోషో గుణాయ గుణినాం
మహదపి దోషాయ దోషిణాం సుకృతమ్ I
తృణమివ దుగ్ధాయ గవాం
దుగ్ధమివ విషాయ సర్పాణామ్ ॥
* గుణవంతునికి ఎదుటివాని దోషాలు, దోషాలుగా కనబడక, సద్గుణాలతోనే చూడబడతాయి.
ఎవరకీ అక్కఱకురాని గడ్డితిని ఆవు, అందఱికీ పనికివచ్చే పాలనిస్తుంది కదా!
* దోషికి ఎదుటివాని మంచిగుణాలు కూడా దోషాలుగానే కనబడతాయి.
అందరికీ ఉపయోగపడే పాలని తీసికొని, అందఱినీ చెరిపే విషాన్నిస్తుంది పాము.
*IV. ఆదిశేషుడు - వాసుకి*
*పన్నగ శయనా నారాయణా!*
*- పన్నగ భూషణ సదాశివా !*
* ఆదిశేషుడు విష్ణుమూర్తికి పానుపయ్యాడు.
స్వామికి సేవచేస్తూంటాడు.
*మనంకూడా ఆదిశేషుడై, జీవలోకమంతటా వ్యాపించియున్న విష్ణువుని సేవించుకొంటాం.*
* వాసుకి శివునికి ఆభరణమయ్యాడు.
స్వామితోపాటు గౌరవం పొందుతుంటాడు.
*వాసుకి శివునితో కూడియుండడం వలన గౌరవం కలిగినట్లే,*
*మనం వాసుకిగా, మనలోని చిదానందరూపుడైన శివునితో కూడి మంగళకరమైన జీవితాన్ని కలిగియుంటాం.*
*V. సముద్రమథనం*
దేవతలూ రాక్షసులూ,
మంధర పర్వతాన్ని కవ్వంగాచేసి,
వాసుకిని కవ్వానికి తాడుగా చేసి చిలుకుతున్నప్పుడు,
ముందుగా వచ్చిన విషం శివుడు త్రాగగా,
అమృతం దేవతల పరమై శాశ్వతత్వాన్నిచ్చింది.
*అన్వయం*
*మెదడనే మంధర పర్వతంతో,*
*నరాలనే వాసుకితో, చిలికి,*
*"చిదానందరూప శివోఽహం శివోఽహం" అన్నట్లు,*
*మనలోని శివుడుగా మనం,*
*"రాగద్వేషాదు"లనే విషాన్ని మ్రింగి (రాగద్వేషాలు లేకుండా చేసికొని),*
*"ఆత్మతత్వం" తెలుసుకొని,*
*ఆ అమృతంతో శాశ్వతులమవుతాం.*
*నాగులచవితి మనకి అందేంచే సందేశం ఇదే!*
*అనుబంధం - చిత్రాలు*
*1. మనం పాలుపోసే పాముపుట్ట*
*2. పన్నగ (ఆదిశేష) శయనా నారాయణా!*
*3. పన్నగ (వాసుకి) భూషణ సదాశివా!*
*4. సముద్ర మథనం: విషంతో ప్రారంభం - అమృతం లభ్యం*
=x=x=x=
— రామాయణం శర్మ
భద్రాచలం
కామెంట్‌లు లేవు:
కామెంట్‌ను పోస్ట్ చేయండి