*ధార్మికగీత - 17*

🌲🌲🌲🌲🌲🌲🌲🌲🌲🌲🌲🌲
                           
                                        *****
         *శ్లో:- కాకః కృష్ణ: పికః కృష్ణ: ౹*
                 *కో భేదః పిక కాకయో: ౹*
                 *వసంత కాలే ప్రాప్తే తు ౹*
                 *కాకః కాకః పికః పికః ౹౹* 
                                         ***** 
*భా:- లోకం తీరు చాల చిత్ర విచిత్రంగా గోచరిస్తుంది. కాకము అనగా కాకి. పికము అనగా కోయిల. చూడడానికి కాకి నలుపే. కోయిల నలుపే. దాదాపు రెండును రూపంలో ఒకేలా ఉంటాయి. మరి రెంటికి తేడా ఏమిటి? కాకి స్వయంగా గుడ్లను పొదుగుతుంది. కోయిల గుడ్లు పెట్టడమే కాని పొదగలేదు. తమ రూప సామ్యము చేత కోయిల కాకి గూటిలోనే గుడ్లను పెట్టడం, కాకి పొదగడం నిరంతరం సాగే ప్రక్రియ. కోయిలకు పరులచే పోషింపబడేది కనుక "పరభృతం" అని పేరు వచ్చింది. వసంతకాలం రాగానే, తమ కూతల తారతమ్యం వలన కాకి నిజరూపం బయట పడి, గెంటివేతకు గురి అవుతుంది. ఉప్పు, కర్పూరము చూడడానికి ఒకటిగా ఉన్నా, రుచి చూస్తే అసలు రంగు తెలిసినట్లే, సమయం వస్తే గాని ఎవరెవరో నిగ్గుతేలదు. రారాజు, కర్ణుడు దానంలో పోటీపడ్డారు. ఇంద్రుడు పెట్టిన పరీక్షలో కర్ణుని ఉదాత్త దాతృత్వము, రారాజు నిస్సహాయత వెల్లడైనాయి. వేమన "పురుషులందు పుణ్యపురుషులు వేరయా" అని అనడంలోని ఆంతర్యం ఇదే. ఆపత్సమయంలోనే మనిషి అసలు సిసలు రూపము, స్వభావము బయటపడతాయని సారాంశము*.
                                    *****
                      *సమర్పణ : పీసపాటి*
🌲🌲🌲🌲🌲🌲🌲🌲🌲🌲🌲🌲