ధనముల కన్నను

*కం*

ధనముల కన్నను భువిలో

మనసుల నవగతమునొందు మనుషుల నొందన్

ఘనముగ బతుకంగ దగును

మనుగడ సూక్ష్మంబిదియని మరువకు సుజనా.

*భావం*:-- ఓ సుజనా! ధనముల కన్నా మన మనస్సు ను అర్థం చేసుకునే మనుషుల ను సంపాదించగలిగితే గొప్పగా బతకగలమనే మనుగడ సూక్ష్మము ఇదే అని మరువవద్దు.

*** *కొంపెల్ల శ్రీనివాస శర్మ*

*కం*

నడిచే దైవము గోవగు

నడిపించెడివాడు భువిని నారాయణుడౌ.

ఎడబాయని హితము శివుడు

కడవరకీ కరణి తలువ ఘనుడగు సుజనా.

*భావం*:-- ఓ సుజనా! నడిచే దైవము ఆవు,నిన్ను నడిపించేవాడు నారాయణుడు, నిన్ను విడిచిపెట్టకుండా ఉండే శ్రేయోభిలాషి శివుడు అని చివరి వరకూ నమ్మినచో గొప్పవాడవగుదువు.

*** *కొంపెల్ల శ్రీనివాస శర్మ*