ఓం శ్రీ మాత్రేనమః
ఓం గురుభ్యోనమః
మ్రొక్కులూ-త్రొక్కుళ్లు
(హితోక్తి)
డా.రఘుపతి శాస్త్రుల
వైకుంఠైకాదశినా
డాకాంక్షను భక్తజనములా బాలాజిన్
శ్రీ కైవల్యము గోరుచు
ప్రాకటముగ గనుట నెంచ పాపమ్మగునే?
(కైవల్యము=మోక్షము)
భక్తజనమ్ముల గములను
యుక్తిగ గనిపెట్టి వారి ఉరుకులు పరుగుల్
రక్తిగ చూడక, ప్రోవగ
శక్తులు గల రక్షకుల కసాధ్యమె కావన్
(గములు=సమూహములు-ప్రోవగ=ఆదుకోవడానికి)
తిరుమల వేంకటేశ్వరుని తృప్తిగ గాంచగ గోరి ఆశతో
నరిగెడు వారి పట్టుదలనంతయు కేవల మర్థకాంక్షతో
సరిగని ప్రోవకుండుటది సత్కృతియే తగినట్లు వారికిన్
సరిపడ రక్షణమ్ముల విశాల మతిన్ సమకూర్చ లేరొకో?
(అర్థ కాంక్ష= డబ్బే ధ్యేయంగా -సత్కృతి=గౌరవము)
బలగము లనునవి ప్రాణ
మ్ములను బలిగ గొనుటకో?సమున్నత గతులన్
పలువిధములుగా బ్రోవన్
తలపడి రక్షించు కొఱకొ? తలపగ వలయున్
(బలగములు=రక్షకభటులు)
అధికారుల గణములకును
ముదముగ నాయకుల సేవ మోదము నందన్
సదమల గతిసేయుటకై
మదిదలచిన, పేదజనుల మనుగడ ఎటులౌ?
(మనుగడ=బ్రతకడం)
కామెంట్‌లు లేవు:
కామెంట్‌ను పోస్ట్ చేయండి