*#కృష్ణా_నీ_మీద_మనసాయెరా #గోపికావిలాపము*
( కందములలో శతకము - 07 )
🌺🍃 *----------------* 🍃🌺
🌹🙏🌹
*తలచియు దలచని తలపుకు*
*వలచియు వలవని వలపులె వరముగ దక్కున్ !*
*దలచితి సంపూర్ణముగా*
*వలపంతయు గోరుచున్న వనితను గృష్ణా !*
( 61 )
🌹🙏🌹( భావము )
ఏదో తలచామా తలచలేదా అన్న తలపులకు ,
దక్కినదా దక్కలేదా అన్నట్లుగానే నీ ప్రేమము దక్కుట సమంజసమే ! 🙏
*కానీ కృష్ణా !*
పరిపూర్ణముగా నేను నీ ధ్యాసలోనే బ్రతుకుచున్నాను . మరి నీ సంపూర్ణమైన ప్రేమను ఈ వనిత కోరుకొనుట ఉచితమే కదా *కృష్ణా ?*🙏
🌹🙏🌹
*ఆవిరులైనది తనువున-*
*నీ విరులన్నియును వాడె నిట్టే కృష్ణా ,*
*పావురములెగిరి పోయెను*
*నా విరహపు వేదనగని ననువిడి కృష్ణా !*
( 62 )
🌹🙏🌹( భావము )
తనువంతా వేడి ఆవిరులుగా ఉండుటచే ,
నా మీద నున్న ఈ పువ్వులన్నీ, ఇట్టే వాడి పోయి నేలరాలి పోతున్నాయి *కృష్ణా !*🙏
నా చెంతనే ఎంతో మచ్చికతో ఉండే పావురాలూ , గువ్వలు అన్నీ,
నా విరహ తాపమునోర్వలేక , నన్ను విడిపోయి ఎక్కడికో ఎగిరిపోయాయి *కృష్ణా !*🙏
🌹🙏🌹
*ఘననీలి మేఘ మాకస-*
*మున నున్నను వర్షముబడు ముంగిట నందే !*
*కనరా మేఘశ్యామా ,*
*మనసున ప్రేమ కురిపించు మనవిదె కృష్ణా !!*
( 63 )
🌹🙏🌹( భావము )
ఎంత గొప్ప నల్లటి మేఘమైనా ఆకాశములోనే వర్షాన్ని కురిపించదు కదా ! 🙏
అది చక్కగా నేల మీద ఉన్న వనాలపై ,మొక్కలపై ,పూవులపై చిగురులపై అతి ప్రేమముతో చినుకులు కురిపించును కదా ! 🙏
నీవు నీలమేఘశ్యాముడవైన దయ అనబడే నల్లటి మేఘము లాంటి వాడవు .🙏
నిన్ను కోరుకున్న నా వంటి వనిత హృదయముపై వర్షించరా నీ దయనంతయూ ! ఇదియే నా మనవి *కృష్ణా !*🙏
🌹🙏🌹
*కొలనున గువలము నవ్వుచు*
*గలువలఱేని మురిపెమున కడువిర బూసెన్ ,*
*జెలికాడు లేని యీ నా*
*చెలువము విరబూయు టెపుడొ చెప్పర కృష్ణా !!*
( 64 )
🌹🙏🌹( భావము )
అదిగో ఆ కొలునులో ఉన్న కలువ ,
ఆ కలువరేడు చూపించిన ప్రేమకు మురిసిపోయి ,
ఎంత గొప్పగా విరబూసినదో !🙏
నా చెలికాడవైన నీవు లేని ఈ నా సౌందర్యము ,
ఎప్పుడు విరబూస్తుందో కాస్త చెప్పు *కృష్ణా ?*🙏
🌹🙏🌹
*నాటకమా నీ చేతలు ?*
*బూటకముల ? మాటలు మరి పొందులు కృష్ణా ?*
*మాటల మాయాజాలమ ?*
*తేటగ నొకతీరునుండు దిరముగ కృష్ణా !*
( 65 )
🌹🙏🌹( భావము )
అసలు నువ్వు చేసే పనులన్నీ నాటకాలేనా ?
నీ మాటలు , నీ సహచర్యమూ అంతా అసత్యమేనా ?🙏
లేక మాట్లాడుచున్నట్లుగా , చేతలు చేయుచున్నట్లుగా అగుపించే ఇంద్రజాలమా ?🙏
అవన్నీ వద్దు *కృష్ణా !* సారముగా ఒకే రీతిలో ప్రేమిస్తూ చక్కగా స్థిరముగా నా యెడల ఉండు *కృష్ణా !*🙏
🌹🙏🌹
*గుట్టుగ నుండెడి దానను,*
*బట్టనురా పంత మెపుడుఁ బదుగురి యెదుటన్ !*
*దట్టముగ నిను బొగడుటకె*
*కట్టుబడి మసలుచు నుండు , గాంతను కృష్ణా !*
( 66 )
🌹🙏🌹( భావము )
సడి సేయక మౌనంగా ఉండే దానను !
నీ మీద బాహాటముగా పదుగురి ఎదుటా ఏ పంతములకూ పోను ! 🙏
బహువిధముల సారముగా నిన్నే పొగుడుచూ ఉండెడి దానను ! 🙏
ఈ విధముగానే నేను నీకు కట్టుబడి , జీవనము సాగించుచున్న కాంతను *కృష్ణా !*🙏
🌹🙏🌹
*పొగడంగ నుబ్బిపోదువు*
*మగువలు నిన్నెరిగితిరయ , మల్లడవన్చున్*
*దెగపొగడి రతులు సల్పిరి !*
*తగునైన వనితను విడువ దగునా కృష్ణా !!*
( 67 )
🌹🙏🌹( భావము )
కొద్దిగా పొగిడితే చాలు ఉబ్బిపోతావు !
ఈ కిటుకు ఎరిగి అదిగో అ నెరజాణలందరూ ,
నిన్ను మల్లడవని ( గట్టి పట్టు కలవాడవని ) బాగుగా పొగిడి,
వారి వాంఛలన్నీ తీర్చుకుంటున్నారు .🙏
అటువంటి నేర్పులు నేర్వని తగునైన గుణవంతురాలిని నేను . నన్ను విడచుట నీకు తగునా *కృష్ణా ??*🙏
🌹🙏🌹
*ఎన్నడు దెలియునురా? నీ-*
*కెన్నడు నా మనసు తెలియు నింపుగ కృష్ణా ?*
*మన్నన నుండిన యింతిని*
*మన్నించగ నది కరుగని మనసా కృష్ణా ??*
( 68 )
🌹🙏🌹( భావము )
ఏనాటికి తెలుస్తుందిరా నీకు ?
ఎప్పటికి నా మనసును నీవు అందముగా అర్థము చేసుకుంటావు *కృష్ణా ?*🙏
మర్యాదగా నిన్ను తలచుకునే ఆడదానిని ,
ఆదరించలేక పోతున్నావు ! నీది రాయి వంటి కరుగని మనసా *కృష్ణా ??*
🌹🙏🌹
*తెగువను జూపగ లేనయ ,*
*తగుమర్యాదలు గలిగిన తరుణిని కృష్ణా !*
*జగడము లాడగ లేనయ*
*తెగడనని యలుసు తగదయ తెలియుము కృష్ణా !*
( 69 )
🌹🙏🌹( భావము )
తెగించి ధైర్యముగా బయటపడలేని దానను .🙏
సరియైన మర్యాదలు గలిగిన భయస్తురాలనైన కోమలిని *కృష్ణా !*🙏
నీతో తగవులు పడలేను అస్సలు .
నిన్ను ఏమీ చెడ్దమాటలు అననని ,నన్ను అలుసుగా చూచుట నీకు తగని పని ! ఇది తెలుసుకో *కృష్ణా !!*🙏
🌹🙏🌹
*కోతులకు బంచ వెన్నను ,*
*నీ తీరది చిన్న నాడె నిజముగ దెలిసెన్*
*నాతిని నీకై యుండగ,*
*బ్రీతిగ గోకుల వనితలె ప్రియమయె కృష్ణా !!*
( 70 )
🌹🙏🌹( భావము )
అవునులే నీ సుద్దులేమిటో నీ చిన్ననాడే తెలిసిపోయాయి .🙏
కోతులన్నిటినీ పిలిచి మరీ ముద్దుగా వెన్న పంచావటకదా !🙏
చక్కనైన దానిని నేనుండగా గొల్లభామలే నీకు , ఇష్టసఖులగుటలో ఆశ్యర్యమేమునదిలేవయ్యా *కృష్ణా !*
🌹🙏🌹
*హరే కృష్ణ ! హరే కృష్ణ !!*🙏
పద్యములు 71 to 80 రేపటి శీర్షికలో .....
మీ ఆశీర్వాదములను కోరుకొనుచూ ..
మీ సూచనలు అభిప్రాయములు సదా స్వాగతిస్తూ ...
భవదీయుడు
✍ *-- వేణుగోపాల్ యెల్లేపెద్ది*
కామెంట్‌లు లేవు:
కామెంట్‌ను పోస్ట్ చేయండి