అన్నమాచార్యకీర్తనకు ద్విపదానుసరణ *

 *అన్నమాచార్యకీర్తనకు ద్విపదానుసరణ *

నిఖిల జీవులలోన  నే నెంత వాడ

కడగి యా యీశుండె కాపాడు చుండె

చెప్పినా రెవ్వ రా చిట్టి చీమలకు

పుట్టలో దాన్యమున్ బెట్టుకొండనుచు,

అంతరంగంబులో నాది నుండియునె

సంసార భ్రాంతి  నా సర్వేశ్వరుండె

కల్గించి బ్రతుకును కల్గించు చుండె

చెప్పి రెవ్వరు బుద్ధి చెట్టుల కిలను

అదనులో మొలకెత్తి యభివృద్ధి నొంది

కొమ్మలన్ పూవులన్ గూర్చు కొమ్మనుచు,

కూడి చైతన్యమై గుట్టుగా నుండి

అనుగుణ గుణముల న్నందించు నతడె

పుట్టిన మెకముకు బుద్ధెట్లు గలిగె

చనుబాలు వెంటనే చప్పరించుటకు

మృదువైన పచ్చికన్ మెసవుచుండుటకు,

అంతరంగంబులో ననునిత్య ముండి

ప్రాణుల కనువైన పనులను నేర్పి

శ్రీవేంకటేశుండె చేయు సర్వంబు

✍️గోపాలుని మధుసూదన రావు 🙏