శ్రీ సత్యనారాయణ స్వామి వ్రత మహాత్మ్యము

 శ్రీ సత్యనారాయణ స్వామి వ్రత మహాత్మ్యము

భగవానుడు యారీతిగ 

యగుపించియు స్వప్నమందు యానతి నీయన్ 

సగమగు రేయిని భూపతి 

ఖగవాహను దలచుకొనుచు క్షణమున లేచెన్   113

ఉదయ మైనంత వెంటనె నుర్విరేడు 

సభను గావించి తెల్పెను స్వప్న విధము 

సభికు లత్యంత విస్మయ సంభ్రమమున 

సాధు సాధంచు బల్కిరి సంతసమున       114

వసుధేసు డంతట  వర్తకు లిర్వుర 

            బంధముక్తుల జేయ భటుల బంపె 

సభలోని కొచ్చిన సాధువు యల్లుడు 

            భయముతో నుండిరి ప్రభును గాంచి 

అంత నభయమిచ్చి యా వర్తకులతోడ 

            యాప్యాయతంబుగా ననియెనిట్లు 

“వణిజప్రముఖులార ! వగచగా వలదింక 

            కారణంబులు లేక కలుగవేవి 

దైవ ప్రాతికూల్య తరుణంబు నందునే 

సకల యిడుము లెల్ల సంభవించు 

పరమ దైవ కరుణ ప్రసరించి నంతట 

సకల యిడుములెల్ల సమసిపోవు             115

జరిగిన దానికి వగచక 

పరమాత్ముని నమ్ముకొనియు పావన మదితోన్ 

సరగున వెళ్ళుడు నెలవుకు 

సిరితోడను యింక మీరు చింతలు లేకన్ "     116

అంతట భూపతి యా వర్తకులకును 

                ధైర్యంబు జెప్పియు దయను జూపె 

క్షురకర్మ చేయించి కొత్త దుస్తులు బెట్టి 

                భూషణంబుల నిచ్చె భూరిగాను 

రాజాన్నమును బెట్టి రాగంబు జూపించి 

                దయతోడ  రెట్టింపు ధనము  నిచ్చె 

మర్యాద చేసియు మన్నన జూపించి 

                మంచి మాటలు జెప్పె మధురముగను 

పిదప వారల తోడను ప్రియము గాను 

"మదిలొ యెటువంటి దిగులులు మసలనీక 

సొంత గృహమున కెళ్ళుడు సంతసమున "

యనుచు పలికెను కూర్మితొ యనుమతిచ్చి     117

అంత వర్తకు లిర్వురు సంతసిల్లి 

వందనంబులు యర్పించి వసుధపతికి

ధరణినాథుండు యిచ్చిన ధనముపొంది 

వెడలి రటనుండి నెలవుకు వేడ్కతోడ          118

 

               మూడవ అధ్యాయము 

                       సమాప్తము 

                                     సశేషము…

      ✍️గోపాలుని మధుసూదన రావు🙏