రామాయణమ్ 332
...
వారు వానరులు !
వారి శరీరములు ఒక్కొక్కరిది ఏనుగంత !
.
కోట్లకొలదిగ ఉన్న వానరసైన్యం రివ్వుమంటూ గగనతలంలో మెరిసింది !
.
ఎగిరేవారు కొందరు ,
చెట్లమీద దూకేవారు కొందరు గర్జించెవారుకొందరు !
శత్రువును
నిర్జిస్తామని కొందరు సింహనాదాలు చేసుకుంటూ కోలాహలంగా బయలుదేరారు.
.
పళ్ళగుత్తులతో వున్న చెట్లు పెకిలించి మోసేవారుకొందరు !
.
తేనెటీగలు చెదరగొట్డి పెద్దపెద్దతుట్టెలు మోసేవారు కొందరు!
.
మధుభక్షణం చేస్తూ కొందరు! ఫలభక్షణం చేస్తూ కొందరు!
పరస్పరము పైకి ఎత్తి పడవేస్తూ కొందరు!
భుజస్ఫాలనములు చేసుకుంటూ కొందరు ..
.
అందరూ కదిలారు !
అవనిజ సీతమ్మచెర విడిపించడానికి!
.
పదికోట్ల సైన్యము శతబలి రక్షణలో ఉన్నది!
.
కేసరి,పనసుడు,గజుడు,అర్కుడు వీరు నూరుకోట్ల సైన్యపర్యవేక్షణ చేయుచుండిరి!
.
వలీముఖుడు,ప్రజంఘుడు,
జంభుడు,రభసుడు వీరు నలుదిక్కులా తిరుగుతూ సేనను ఉత్సాహపరుస్తూ తొందరపెట్టుచూ ముందుకు నడిపించుచుండిరి.
.
అది వానర సైన్యమా !
లేక అరణ్యములో చెట్ల పైభాగముమీద కదులుతున్న సముద్రమా !
.
వారి నడక శత్రుభీకరము !
వారు చేసే కోలాహలము సముద్రఘోష!
వారి కదలిక ఉత్తుంగ కడలితరంగం!
.
సేన కదిలేవైపు అనుకూలంగా అనిలుడు వీస్తున్నాడు!
.
పక్షులన్నీ మధురస్వరంతో ధ్వని చేస్తున్నాయి.
.
సూర్యుడు నిర్మలంగా ఉన్నాడు.
.
అనుకూల శకునాలు విజయతీరం చేరుతారు మీరు!
అచిరకాలంలోనే!
అని పలుకుతున్నట్లుగా ఉన్నాయి!
.
వానరులు దారిలో కనపడిన ప్రతిసరస్సులో స్నానమాడారు
ప్రతి చెట్టును పట్టుకొని వేళ్ళాడారు
ప్రతి తేనెతుట్టెనూ లేపారు!
.
కలియదిప్పని సరస్సు గాని
విరగ గొట్టని చెట్టుగానీ
రాళ్ళు పడదోయని గిరులు గానీ
ఎగురగొట్టని కొండగానీ
మిగులలేదు !
.
పిమ్మట వారు మహేంద్ర పర్వత సానువులు సమీపించిరి
.
అక్కడనుండి ప్రళయతరంగ ఘోషలతో ఉన్న అపారపారావారమును కనుగొంటిరి.
.
సుగ్రీవా ! ఇదుగో సముద్రము దీనిని దాటుట ఎట్లా? అని రామచంద్రుడు పలికెను.
.
వూటుకూరు జానకిరామారావు
కామెంట్‌లు లేవు:
కామెంట్‌ను పోస్ట్ చేయండి