ఓం శ్రీ లక్ష్మీ నరసింహాయ నమః

 ఓం శ్రీ లక్ష్మీ నరసింహాయ నమః

🙏🙏🙏

తేదీ 25/03/2025 మంగళవారం ధర్మపురి శేషప్ప (కాకుస్థం శేషాచలదాసు) విరచితం నరసింహ శతకంలోని 79వ పద్యం పారాయణం చేద్దాం.

సీ. హరిదాసులను నింద లాడకుండినఁజాలు   

సకల గ్రంథమ్ములు చదివినట్లు 

భిక్షమియ్యంగఁ దప్పింపకుండినఁజాలు 

జేయెత్తిదానంబు చేసినట్లు 

మించిసజ్జనుల వంచించ కుండినఁజాలు  

నింపుగా బహుమాన మిచ్చినట్లు 

దేవాగ్రహారముల్ దీయకుండినఁజాలు  

కనకంపు గుళ్లను గట్టినట్లు 

తే. ఒకరివర్షాశనము ముంచ కున్నఁజాలు  

బేర్మికీర్తిగ సత్రాలు బెట్టినట్లు 

భూషణవికాస! శ్రీధర్మపురనివాస! 

దుష్టసంహార! నరసింహ! దురితదూర!