ॐ వినాయక చవితి సందేశాలు
-----------------------
సందేశం - 1
"తుండము నేకదంతమును తోరపు బొజ్జయు వామహస్తమన్
మెండుగ మ్రోయు గజ్జెలును మెల్లని చుాపులు మందహాసమున్
కొండొక గుజ్జురూపమును కోరిన విద్యల కెల్ల నొజ్జయై
యుండెడి పార్వతీతనయ! యోయి గణాధిప! నీకు మ్రొక్కెదన్"
-- తుండము,ఏకదంతము,పెద్ద బొజ్జ,బాగా మ్రోగే గజ్జలు, విచిత్రమైన చూపులు-నవ్వు,మరుగుజ్జు రూపమూ గల ఓ పార్వతీ తనయా! గణాధిపా! నేను ఏ విద్య కావాలనుకొంటే దాన్ని నాకు బోధించేవాడా! నీకు మ్రొక్కుతున్నానయ్యా!అనుగ్రహించు!
---------------------------------------------------------
వివరణ
1. ముఖము - ఆహారము - ఇబ్బంది
*తుండం,ఒకే దంతం,గాదెతో సమానమైన పెద్దబొజ్జా, పొట్టిచేయీ కలిగిన వాడు.
ఆహారం విషయంలో —
*తినేందుకు తొండం అడ్డం,
*పోనీ ఏదోవిధంగా ఆహారం తీసుకుందామంటే,ఆ ఒక్క దంతమూ అడ్డం.
*నెమ్మదిగా తిందామంటే,ఎక్కువ నిలువచేయదగిన పెద్ద పొట్ట.
2. నాట్యం - అసౌకర్యం
* కాళ్ళు పొడుగువి కానందున, గజ్జలు మాత్రం శీఘ్రంగా ధ్వనిస్తూ ఉంటాయి.
* ఆ ధ్వనికి అనుగుణంగా చూడడానికి మెల్లని చూపులు ఒక అడ్డంకి.
*ఆకర్షణీయమైన నవ్వు కాక, మంద(అజ్ఞాని వెర్రి)హాసము(నవ్వు).
3. రూపము - అందవిహీనం
* అదొకతీరు మరుగుజ్జు ( కొండొక గుజ్జురూపము).
ఇలా పరిహాసం చేయదగిన విధంగా ఉన్న తన పుత్రుణ్ణి లోకంలో అందఱూ పూజించేలా, "కోరిన విద్యల కెల్ల ఒజ్జ" గా జ్ఞానప్రదాతను చేసింది జగన్మాత పార్వతీదేవి.
అందుకనే "వినాయకుడు" - "పార్వతీ తనయ!" అని మనచేత పిలిపించుకుంటున్నాడు.
అజ్ఞానాంధకారాన్ని పోగొట్టేది విద్యే కదా!
4. విద్యా ప్రదాత
ఎవరు ఏ చదువు కావాలని కోరుకుంటే,వారికి ఆ చదువులన్నింటినీ ఇచ్చే ఉపాధ్యాయుడు ( కోరిన విద్యల కెల్ల ఒజ్జ).
-------------------------------------------------------
విశేషం
* విద్య పొందాలంటే,మనకి దాన్ని అందించగలిగే వానికి,
అ)విషయ పరిజ్ఞానం కలిగియుండాలి.
ఆ)దాన్ని బోధించే సంకల్పం ఉండాలి.
ఇ)అర్ఠమయ్యేలాగు చెప్పగలగాలి.
* బాహ్య సౌందర్యం( ఉదా॥ అష్టావక్రుడు) ఎలా ఉన్నా, అంతస్సౌందర్యం ముఖ్యం.
* కళల ప్రాధాన్యతకన్నా, పశుపతి పుత్రుడుగా,అజ్ఞానాంధకారాన్ని తొలగించి,జ్ఞానాన్ని అందజేయగలడు "వినాయకుడు"
ఒజ్జ:
గురువు - ఉపాధ్యాయుడు - ఆచార్యుడు
-------------------------------------------
1. గురువు
గురుర్బన్ధురబన్ధూనాం గురుశ్చక్షు రచక్షుషామ్ I
గురుః పితాచ మాతాచ సర్వేషా న్యాయాయవర్తినామ్ II
----బంధువులెవరూ లేనివారికి గురువే బంధువు.కళ్ళు లేని వారికి గురువే కంటి చూపు.గురువే తల్లి, గురువే తండ్రి. యదార్థజ్ఞాన ప్రదర్శకుడు.న్యాయమార్గంలో ప్రవర్తింపచేయువాడు "గురువు"
2. ఉపాధ్యాయుడు
ఏకదేశం తు వేదస్య వేదాఙ్గాన్యపి వా పునః I
యో2ధ్యాపయతి వృత్యర్థమ్ ఉపాధ్యాయస్య ఉచ్యతే II
----వృత్యర్థం వేదాన్నీ వేదాంగాలనీ ఎవరైతే అధ్యాపనం (బోధన) చేస్తారో వారు "ఉపాధ్యాయులు"
3. ఆచార్యుడు
ఆచినోతి హి శాస్త్రార్థాన్ ఆచారే స్థాపయత్యపి I
స్వయమాచరతే యస్మాత్ తస్మాదాచార్య ఉచ్యతే II
----కేవలం శాస్తార్థాలను బోధించడమే కాక, తాను వాటిని ఆచరిస్తూ, సమాజ హితం కోసం ఆదర్శంగా ఆచరింప చేసేవాడు "ఆచార్యుడు"
--------------------------------------------------------
రామాయణం శర్మ
భద్రాచలం
కామెంట్‌లు లేవు:
కామెంట్‌ను పోస్ట్ చేయండి