శ్రీ సత్యనారాయణ స్వామి వ్రతమహాత్మ్యము

 శ్రీ సత్యనారాయణ స్వామి వ్రతమహాత్మ్యము 

సర్వ సంపద లారీతి సమసిపోయి 

కూర్మి పుత్రులు యందఱు గూలిపోగ 

యధిపు కవగత మయ్యెను యంత నపుడు 

సత్యదేవుని ఘోరమౌ శాపఫలము    171

                                      

"గొల్లవాళ్ళిచ్చి రనియును కోపగించి 

దివ్యమైన ప్రసాదంబు తీసికొనక 

దైవద్రోహంబు జేసితి దర్పమునను"

యనుచు పరితాప మొందెను యధిపు డపుడు 172

అంత తుంగధ్వజునృపుడు యడవికరగి 

గొల్లలను గూడి తనయొక్క గోడు దెలిపి 

సత్యనారాయణస్వామి సద్వ్రతంబు 

చేయ వేడెను తానును చేరి చేయ       173

పిదప భూపతి గొల్లల పిలుచు కొనియు

సత్యనారాయణస్వామి సద్వ్రతంబు 

చేసి సద్భక్తి తోడను చేతులార 

దివ్యమైన ప్రసాదంబు స్వీకరించె .     174

తనదు తప్పు లెఱిగి ధరణీశు డారీతి 

సత్యవ్రతము జేసి సన్నుతించ 

సకల వరదు డంత సంతుష్టు డయ్యును 

కామితములు దీర్చి కాచె నతని         175

శత సుతులను బ్రతికించెను 

యతి సంపద లిచ్చి మఱల యధిపతి జేసెన్ 

వెత లన్నియు దీర్చి యతని 

గతియించిన యశము గూర్చి  కాపాడెనిలన్ 176

ధరణిపతి సత్యదేవుని దయను పొంది 

వఱలుభక్తితొ ప్రతినెల వ్రతము జేసి 

యవని సౌఖ్యంబు లెల్లను యనుభవించి 

సాగె నంత్యంబునందున సత్యపురికి"      177

                                       సశేషము …. 

✍️గోపాలుని మధుసూదన రావు 🙏