బుజ్జి చమక్కులు

 🌹🌹🌹🌹🌷🌷🌷🌹🌹🌹🌹

    *🥰 బుజ్జి చమక్కులు 🥰* 

                 🌷🌷🌷

మొన్నీమధ్య, మా పెద్ద ఆడపడుచు కూతురు సింగపూర్ నుండి వచ్చింది. వాళ్ళ కో చిన్న పాప. తన పేరు శ్రీహిత. పిట్ట కొంచెం, కూత ఘనం టైప్.

ఆ పాప లాజిక్కులు, చమక్కులకి మా ఇంట్లో అందరం ఫ్లాట్. తెలుగెంత చక్కగా మాట్లాడుతోందో. వాళ్ళు మా ఇంట్లో రెండురోజులు ఉన్నారు. అందరం కలిసి కార్లో బయటకు వెళ్ళాం. దారిలో హోటల్ సుప్రభాత్.. SUPRABHAT, కనబడింది. వెంటనే ఈ పాప, సూప్రా భట్...అంటే పూజాభట్ సిస్టరా మామ్? అంది. ఈ పిల్లకి పూజాభట్ ఎలా తెలుసు ..అని అడిగా. 

వాళ్ళమ్మ, నా వేపు చూసి ..మొన్న టీవీలో పూజాభట్ హిందీ మూవీ వచ్చిందిలే అత్తయ్యా ..అంది.

అందరం నవ్వాం.

 ఆ రాత్రి, మంచం మీద పడుకుని, దుప్పటి కప్పుకోవడానికి నానా అవస్థ పడుతున్న శ్రీహిత ను చూసి, పోనీ నేను కప్పనా? అని అడిగాను. నువ్వు కప్పవా? అని కిచకిచ నవ్వింది. నువ్వు టైగర్..అంది.

ఏం చెప్పాలబ్బా..అని తికమక పడుతూ, పోనీ నేను దుప్పటి పరవనా...అని మాట మార్చాను.

మళ్ళీ నవ్వింది. ఈ సారేం సెటైర్ వేస్తుందోనని, దాని మైండ్ డైవర్ట్ చేయడానికి , నాకేం..దుప్పటి తో సరిగా కవర్ చేసుకోకుంటే,దోమలు కుడతాయి. అన్నాను. 

అంటే రెండమ్మలు....టైలరింగ్ చేస్తాయా..? అని అడిగింది. ఇదో..ఇలానే ..చంపుతుంది అత్తా. క్షణం కూడా నోరు మూయదు.

దోమలు అంటే... తెలుగు లో రెండు అమ్మలు గా ఆవిడ సొంత ట్రాన్స్ లేషన్.

కుడతాయి...అంటే అవి stitching చేస్తాయా..అంటుంది...అని వాళ్ళమ్మ explain చేయగానే , మా పిల్లలు, నేను నవ్వులు.  

ఇంకో సందర్భంలో దానికి బొద్దింక కనబడింది మా ఇంట్లో. బొద్దింకా..ఇటు రావద్దింక...అని అరిచింది. ఇంత తెలుగు నేర్పిస్తున్నారు పాపకి. చాలా బాగుంది. అన్నాను. 

అది, మేము మాట్లాడుకునే మాటలు వింటుంది. ఇదో ..ఎప్పుడో ..ఢామ్మంటూ పేలుస్తుంది. మొన్న ఈ ట్రిప్ లోనే మా ఆయన ఊరు వైజాగ్ వెళ్ళాం అత్తా. ఆయన, అరకు వెళ్దామన్నారు. వెడుతుంటే, దానికి మధ్యలో బస్సులమీద "పాడేరు" ...అని కనిపించింది. అమ్మా! ఎవరు పాడేరు ..?

సింగర్ నేమ్ నాట్ రిటెన్...అంది బస్ పై బోర్డు చదివి. అది ఊరు పేరు తల్లీ..అని వాళ్ళ నాన్న మురిసి పోయారు.

ఒకసారి, మేమంతా

గుడికి వెళ్ళాం. పూజారిగారు దీనికి శఠగోపం పెట్టలేదట. వెంటనే నాకూ "ముచ్చు టోపీ" పెట్టండీ...అని అరుపులు అక్కడ. "ముచ్చు" ఏంటి ? అడిగాను. అదీ...వెండిని , సిల్వర్ ఫాయిల్ నీ తేడా తెలియడానికి దానికలా చెప్పాం లే. చస్తున్నాం అనుకో ఈవిడ అడిగే ప్రశ్నలకు, వెదుక్కుని మరీ సమాధానాలు చెప్పాల్సివస్తోంది. అంది వాళ్ళమ్మ.

బాగుంది.మొత్తానికి గొప్ప చమత్కారం పిల్లే...అని అందరం నవ్వుకున్నాం.