శ్రీ సత్యనారాయణ స్వామి వ్రత మహాత్మ్యము

 శ్రీ సత్యనారాయణ స్వామి వ్రత మహాత్మ్యము

సుత మాటలు వినినంతనె 

వ్రత విషయము గుర్తు కొచ్చె వర్తకు సతికిన్ 

పతి జేసిన తప్పిదముకు 

మతి యందున నొచ్చు కొనియు మఱి యిటు దలచెన్ 

                                                          101

"సత్యనారాయణస్వామి సద్వ్రతంబు 

సల్పె దనునేను వెనువెంట సత్య ముగను "

యనుచు సంకల్ప మొందియు యను క్షణంబు 

వలయు సామాగ్రి సమకూర్చె వణిజు పత్ని    102

"గతమందున నా నాథుడు 

వ్రతమును తా జేతునంచు వరుసగ బలికీ 

మతిచెడి వ్రతమును మానెను 

గతినీవె సత్యదేవ ! కరుణించు మమున్     103

నా నాథుడు నా యల్లుడు 

నానా విధ బాధలందు నలుగుచు నుండన్ 

నే నీ పేదరికంబున 

నీ నామము దలచు చుంటి నిక్కము స్వామీ ! 104

ఎన్నో పర్యాయంబులు 

నిన్నును నీ వ్రతము మఱచి నిలచితి మకటా !

యెన్నక మాయీ తప్పులు 

సన్నుత రక్షించు మమ్ము సత్యస్వరూపా " 105

అనియు పరిపరి విధముల యార్తి తోడ 

"సత్యనారాయణస్వామి సద్వ్రతంబు" 

భక్తి యపరాధ భావంబు పరిఢ విల్ల 

సల్పె కూతురు తోడను సాధుపత్ని.        106

వ్రతమును సల్పియు దుహితతొ 

పతి తప్పులు కావుమనుచు ప్రార్ధించి మదిన్ 

సతతము తమ్మిక బ్రోవగ 

శతవందన మాచరించె సత్యప్రభుకున్       107

బంధు మిత్రుల తోడను  భక్తి తోడ 

సల్పగా నట్లు  వ్రతమును సాధుపత్ని 

సత్యనారాయణస్వామి స్వాన్త మందు  

యంత సంతుష్టు డయ్యెను సాంతముగను  108

వసుధ భక్తుల పాలిటి వరదుడైన 

సత్యనారాయణస్వామి సత్వరంబె 

చంద్రకేతుమహారాజు స్వప్న మందు 

భవ్య దర్శన మిచ్చియు పల్కె నిట్లు        109

"ఓయి రాజేంద్ర! నీ చఱ నుండినట్టి 

సాధు వాతని యల్లుడు సత్త్వగుణులు 

నిరపరాధులు వారలు నిక్కముగను 

వదలి పెట్టుము వారల వలదు శిక్ష        110

విడువుము వారల వెంటనె 

యిడుముల నున్నట్టి వారి కివ్వుము ధనముల్ 

యుడుపులు బెట్టియు వారికి 

కడు మన్నన జేసి పంపు కామిత పురికిన్    111

అట్లు సేయక నీవున్న యవనినాథ!

నీదు రాజ్యంబు పుత్రుల నిఖిల సిరుల 

లిప్త కాలంబు నందునే లీల గాను 

సర్వమును నాశ మొనరింతు సత్య మిదియె " 112

                                              సశేషము

✍️గోపాలుని మధుసూదన రావు 🙏