పద్య కవిత

 పద్య కవిత //

ధ్రువకోకిల //

తఱుమ లేనివి కోర్కెలన్నవి తాపముల్ కలిగించురా!

పరుల సొమ్ముల కాశచెందుట పాప కార్యము సోదరా!/

మరలిరానిది కాల మన్నది మంచి దారికి మళ్ళుమా!/

కరుణతో చరియించి లోకుల గౌరవమ్మును బొందుమా!//

 మత్తకోకిల //

తోలుతిత్తియె దేహమన్నది తోసుకెళ్లును మిత్తియున్ /

గాలి పోవును భస్మ రాశిగ గాల మందున నిల్చునా?/

పాలుమాలిక లేక శ్రీహరి పాద సేవలు చేయుమా!/

కూల దోయును పాప శైలము కోరినిన్ దరి జేర్చుచున్ //

మత్తకోకిల //

సంచితంబగు కర్మ వాసన జన్మలన్ కుది పేయగా

పాంచ భౌతిక దేహమే జని పండి రాలుట

ఖాయమౌ!

వంచనన్ విడ నాడి దుర్గుణ భావనల్ నిరసించుచున్

బెంచుకోవలె సద్గుణంబును ప్రేమతో చరియించుచున్ //

మత్తకోకిల //

ధర్మ మార్గము వీడి పోకుమ!దారి తప్పకు మానవా!/

కర్మ పాశము చుట్టు ముట్టిన కాలమే పగ బూనుగా /

మర్మమన్నదెఱుంగ జాలక మాయలో పడ బోకురా!/

నిర్మలాత్ముడు విష్ణువేయని నిశ్చయమ్ముగ

నమ్మురా !//

మత్త కోకిల //

జీవితంబున "గీత "సారము చింతలన్ పరిమార్చు నీ

భావి యంతయు శాంతి నిండగ పావనంబయి సాగు నా 

త్రోవలో భగవానుడే సరి తోడుగా జని బ్రోచు నా

దేవదేవుని చేయి వీడక దీధితిన్ వెలుగొందుమా //