శ్రీగృహిణ్యష్టోత్తరశతనామావళీస్తోత్రమ్

 

*(శ్రీగృహిణీ అష్టోత్తర శతనామావళి స్తోత్రం)*

             *కర్తా* - *ఆచార్య రాణి సదాశివ మూర్తి:*

గృహిణీ గృహవాచ్యేయం గృహరక్షైకదీక్షితా।

భర్తృసంతోషసంతుష్టా వంశోద్ధారణతత్పరా।।1।।

బంధుమిత్రహితప్రీతా సంక్షేమాలాపనందినీ।

సంతతగృహకార్యస్థా సేవికాపరివేష్టితా।।2।।

ఆలస్యదైత్యశమనీ తిమిరాసురభంజనీ।

కాఫీపానసమాయత్తశక్త్యుత్సాహసమన్వితా।।3।।

మహానసమహారాజ్ఞీ సర్వపాత్రాభివందితా।

చమసాద్యాయుధసంపన్నా దర్వీగర్వవిమర్దినీ।।4।।

గృహాగ్నికుండసంధాత్రీ  క్షుదగ్నిపరితోషిణీ।

శాకకర్తననిష్ణాతా పాకశాసనశాలినీ।।5।। (20)

సూపాపూపాన్నచిత్రాన్ననానాభక్ష్యవిధాయినీ।

సారక్వాథవినిర్మాత్రీ తంండులౌదనపండితా।।6।।

భోజ్యలేహ్యాదికర్త్రీ సా సూదవిద్యావిశారదా।

సమదర్వీకరా ధీరా వేల్లన్యాయుధధారిణీ।।7।।

దేవతార్చాసమాసక్తా వ్రతానువ్రతపాలినీ।

పర్వోపవాససంసక్తా సదోత్సవమతిశ్శుభా।।8।।

గృహాంగణవికాసజ్ఞా పుత్రపుత్రీసుఖప్రదా।

పత్యుః ప్రీతికరీ సౌమ్యా భర్త్రైవ జ్ఞాత రోషిణీ।।9।।

సదాచారా మితాలాపా యుక్తచేష్టా సుహాసినీ।

శ్లాఘనీయగుణోపేతా వంద్యేయం వంద్యచాతురీ ।।10।। (44)

లౌకికజ్ఞా కళాభిజ్ఞా విద్యావిజ్ఞానశోభితా।

కార్యక్షేత్రమహామాత్యా కృత్యదక్షా యశస్వినీ।।11।।

శ్వసురాసేవనే నమ్రా శ్వశ్రూననందృతోషిణీ।

భావదేవరసంమాన్యా యాతృమాన్యా  కుటుంబినీ।।।।

మాతాపితృహితారక్తా భగినీసంగలోలినీ।

భ్రాతృభూతికరీ భద్రా భ్రాతృజాయేష్టదా వరా ।।12।।

స్వాపత్యవిహితశ్రద్ధా విద్యారోగ్యప్రదాయినీ।

పుత్రీసంవర్థనాలంబా సా హ్యంబా లోక పూజితా।।13।। (65)

సుశీలా సరళోదారా మంజులా మంజుభాషిణీ।

కోమలా మధురాకారా శాంతా గృహధురంధరా।।14।।

ఉదారోజ్జ్వలభావజ్ఞా చంచలాऽచంచలా ఘనా।

దృఢవ్రతా దృఢాకాంక్షా దృఢచిత్తా దృఢాశయా।।15।।

గృహలక్ష్మీ శుభారంభా శుభాంగీ గృహవల్లభా।

గృహస్థహృదయజ్ఞేయం గృహాలంకారశిల్పినీ।।16।।

అలంకారప్రియా రమ్యా నానాభూషావిభూషితా।

సాడంబరా సుసంస్కారా నిరాడంబరజీవనా।।17।।

సేవికాడంబరవతీ దంభదర్పవివర్జితా। 

క్వచిద్దర్పవతీ సైవ  క్వచిద్దంభాతిశాయినీ।।18।।

సత్కాకావ్యనాయికైవైషా హేలాలీలావిలాసినీ। (100)

ఆదౌ ముగ్ధా తథా మధ్యా మధ్యేऽన్తే ప్రౌఢజీవనా।।19।।

ఆర్యా సుమంగళీ దీప్తా సుసౌభాగ్యప్రకాశినీ

భాసతే భారతే దేశే భారతాంబార్చనారతా।।20।।  (108)

*ఫలశ్రుతిః*

యత్రేదం పఠ్యతే నిత్యం నామ్నామష్టోత్తరం శతమ్।

గృహిణీ తత్ర సంతుష్టా సర్వాభీష్టాన్ ప్రయచ్ఛతి।।21।।

పతయస్సుఖినస్తత్ర సదా నందన్తి సూరయః।

సిద్ధ్యన్తి సర్వకార్యాణి రమన్తే తత్ర దేవతాః।।22।।

*ఇతి శ్రీగృహిణ్యష్టోత్తరశతనామస్తోత్రం సంపూర్ణమ్*

                00000