🌲🌲🌲🌲🌲🌲🌲🌲🌲🌲🌲🌲
*ధార్మికగీత - 85*
*****
*శ్లో:- దర్శనే స్పర్శనే వా౽పి౹*
*భాషణే భావనే తథా ౹*
*యత్ర ద్రవ త్యంతరంగం ౹*
*స స్స్నేహ: ఇతి కధ్యతే ౹౹*
*****
*భా:- భగవంతుడు సృష్టిలో మనకు ప్రసాదించిన అమూల్య రత్నం మిత్రుడు. తల్లీ, తండ్రీ తరువాత మన హితోభిలాషి చెలికాడే. అతని స్నేహ మాధురీమహిమ నాలుగు విధాలు. 1. "దర్శనం":- బాల్య స్నేహితుడైన కృష్ణుణ్ణి చూడగానే కుచేలుని ఉల్లం పల్లవించింది. హృదయం పరవశించింది. ఆపదలో ఆదుకోమని అడగడం కూడా మరిచిపోయేలా చేసింది. అదీ స్నేహమంటే. 2. "స్పర్శనం" :- ఆర్ఘ్యపాద్యాల సమర్పణలో మిత్ర కరస్పర్శనం వల్ల కలిగిన అనిర్వచనీయమైన ఆనందం వల్ల అంతరంగం ద్రవీభూతమైంది. జన్మ తరించిందనుకొన్నాడు కుచేలుడు. అదీ స్నేహం అంటే. 3. "భాషణం" :- పోరులో నీరుకారిపోతున్న సఖుడైన పార్థునికి శ్రీకృష్ణుని గీతాభాషణం పునరుత్తేజితుణ్ణి చేసింది. భీరువుని వీరునిగా మార్చి, అమేయబలంతో వీరోచితంగా పోరాడేలాచేసి, ధన్యుణ్ణి చేసింది. అదీ స్నేహమంటే. 4. "భావన":- విపత్తులు, ఆపదలలో ఉన్నా సత్య ధర్మనిరతులై, సత్కార్యాలు నిర్వహిస్తున్న పాండవులకు బంధువుగా కాక "మిత్రుడు" గానే అనుక్షణం కొండంత అండగా ఉండి, ఆదుకోవాలనే పవిత్ర భావన కలిగియుండడమే శ్రీకృష్ణుని ఉదాత్తత. అదీ స్నేహమంటే. ఈ విధంగా దర్శన, స్పర్శన, భాషణ, భావనల వల్ల హితుని మదిని, హృదిని ఆర్ద్రతతో ద్రవింపజేయగలగడమే స్నేహ మనే పదానికి నిజమైన అర్థము,పరమార్థమని సారాంశము*.
*****
*సమర్పణ : పీసపాటి*
🌲🌲🌲🌲🌲🌲🌲🌲🌲🌲🌲🌲
కామెంట్‌లు లేవు:
కామెంట్‌ను పోస్ట్ చేయండి