సంస్కృత మహాభాగవతం*

 *20.10.2021 సాయం కాల సందేశము*

*వేదవ్యాసుల వారి సంస్కృత మహాభాగవతం*

*ఏకాదశస్కంధము - పదిహేడవ అధ్యాయము*

*వర్ణాశ్రమ ధర్మ నిరూపణము*

🕉🕉🕉🕉🕉🕉🕉🕉🕉🕉🕉🕉

*17.25 (ఇరువది ఐదవ శ్లోకము)*

*రేతో నావకిరేజ్జాతు బ్రహ్మవ్రతధరః స్వయమ్|*

*అవకీర్ణేఽవగాహ్యాప్సు యతాసుస్త్రిపదీం జపేత్॥12879॥*

ఏవిధముగను రేతఃపతనమును కానీయరాదు. పూర్తిగా బ్రహ్మచర్యవ్రతమును పాటించవలెను. స్వప్నస్ఖలనము జరిగినచో స్నానమాచరించి, ప్రాణాయామ పూర్వకముగా గాయత్రీ జపమును చేయవలెను.

*17.26 (ఇరువది ఆరవ శ్లోకము)*

*అగ్న్యర్కాచార్యగోవిప్రగురువృద్ధసురాఞ్శుచిః|*

*సమాహిత ఉపాసీత సంధ్యే చ యతవాగ్జపన్॥12880॥*

బ్రహ్మచారి ఏకాగ్రచిత్తుడై ఉభయ సంధ్యాసమయముల యందును అగ్నికార్యములను చేయవలెను. సూర్యమండల మధ్యవర్తియగు భగవంతుని ఉపాసించవలెను. ఆచార్యులను, గోవులను, బ్రాహ్మణోత్తములను, గురువులను, వృద్ధులను, దేవతలను సేవింపవలెను. త్రిసంధ్యలయందును మౌనముగా గాయత్రిని జపింపవలయును.

*17.27 (ఇరువది ఏడవ శ్లోకము)*

*ఆచార్యం మాం విజానీయాన్నావన్మన్యేత కర్హిచిత్|*

*న మర్త్యబుద్ధ్యాసూయేత సర్వదేవమయో గురుః॥12881॥*

ఆచార్యుని నా స్వరూపముగా (భగవత్స్వరూపునిగా) ఎఱుంగవలెను. ఆయనను కించపరచరాదు. గురువు సర్వదేవతాస్వరూపుడు. ఆయనను సాధారణ మానవునిగా భావించి, దోషములెంచరాదు.

*17.28 (ఇరువది ఎనిమిదవ శ్లోకము)*

*సాయం ప్రాతరుపానీయ భైక్ష్యం తస్మై నివేదయేత్|*

*యచ్చాన్యదప్యనుజ్ఞాతముపయుంజీత సంయతః॥12882॥*

కావున, ప్రాతఃకాలమునందును, సాయంకాలమునందును లభించిన భిక్షాన్నమును, నిషిద్ధములుగాని ఇతర పదార్థములను మొదట గురుసమక్షమున ఉంచవలెను. ఆయన ఆజ్ఞయైన పిదప వినయముతో వాటిని స్వీకరింపవలెను.

*17.29 (ఇరువది తొమ్మిదవ శ్లోకము)*

*శుశ్రూషమాణ ఆచార్యం సదోపాసీత నీచవత్|*

*యానశయ్యాసనస్థానైర్నాతిదూరే కృతాంజలిః॥12883॥*

ఆచార్యుడు ఎచటికైనను వెళ్ళుచున్నప్పుడు శిష్యుడు ఆయనవెంట నడువవలెను. శయనించునప్పుడు అప్రమత్తతో ఆయనకు చేరువగా శయనింపవలెను. విశ్రాంతి తీసికొనుచున్నప్పుడు పాదసేవలు చేయవలెను. కూర్చొని యున్నప్పుడు భృత్యునివలె కృతాంజలియై ఆయన ఆజ్ఞకొరకు నిరీక్షించుచుండవలెను. ఈ విధముగా వినమ్రతతో సర్వదా గురుశుశ్రూషలయందే నిరతుడై యుండవలెను.

*17.30 (ముప్పదియవ శ్లోకము)*

*ఏవంవృత్తో గురుకులే వసేద్భోగవివర్జితః|*

*విద్యా సమాప్యతే యావద్బిభ్రద్వ్రతమఖండితమ్॥12884॥*

విద్యాభ్యాసము ముగియునంత వరకును శిష్యుడు సకల భోగములను విసర్జించి, బ్రహ్మచర్యవ్రత దీక్షతో గురుకులము నందే నివసింపవలెను.

(శ్రీ వేదవ్యాసప్రణీత శ్రీమద్భాగవతమందలి ఏకాదశ స్కంధములోని పదిహేడవ అధ్యాయము ఇంకను కొనసాగును)

🙏🙏సర్వం శ్రీకృష్ణార్పణమస్తుi🙏🙏

*పసుమర్తి వేంకట దుర్గా సుబ్రహ్మణ్యం*

7702090319, 9505813235