రామాయణమ్ 340
....
ప్రాతఃకాలము లో విభీషణుడు గొప్ప తేజస్సుగలసూర్యుడు మేఘమండలములో ప్రవేశించినట్లు అన్నమందిరములోనికి ప్రవేశించెను.
.
రాక్షససార్వభౌమునికి జయజయధ్వానములతో అభివాదము చేసి నమస్కరించి నిలిచెను .కనుసైగచేసి అక్కడ ఉన్న ఒక ఉన్నత ఆసనము రావణుడు తమ్మునకు చూపించి కూర్చొమ్మని చెప్పగా రావణసహోదరుడు సుఖాసీనుడాయెను.
.
మంచి మాటలతో అన్నగారిని ప్రసన్నుడిని చేసుకొని దేశకాలప్రయోజనమునకు అనువైన మాటలు పలికెను.
.
అన్నా ! సీత లంకలో పాదము మోపినది మొదలు మనకు అశుభ శకునములు గోచరించుచున్నవి.
.
హోమాగ్ని ప్రజ్వరిల్లుట లేదు
జ్వాలను పొగ ఆవరించుచున్నది
సర్పసంచారము సర్వప్రదేశములలో ఎక్కువ అయినది
ఆవు పాలు విరిగిపోవుచున్నవి
ఉత్తమోత్తమమయిన గజములు కూడా మదజలములు స్రవించుట లేదు
.
గుఱ్ఱపు సకిలింపుల దీనముగాయుండి అవి పచ్చగడ్డి కూడా మేయుటలేదు
గాడిదలు,ఒంటెలు,కంచరగాడిదలు తమ కన్నులనుండి జలజలా నీరుకార్చుచున్నవి.
.
గ్రద్దలు మండలాకారముగా తిరుగుచూ వ్రాలుచున్నవి .
.
సంధ్యాసమయములో నక్కల ఊళలు అమంగళముగా కూయుచున్నవి.
.
మహారాజా నేనీమాటలు అజ్ఞానము వలనను ,లోభము వలనను పలుకుచున్నను నీవు మరొక విధముగా భావింపకుము.
.
ఈ దుర్నిమిత్తములు నాకే కాదు సమస్త లంకాపురవాసులకు కూడా కనిపించుచున్నవి.నీకు చెప్పుటకు ఎవరికీ ధైర్యము సరిపోవడం లేదు.
.
విభీషణుని ఈ మాటలు విని రావణుడు కోపముతో జేవురించిన ముఖము కలవాడై ,విభీషణా !!, రాముడు ఇక ఎన్నటికీ సీతను పొందజాలడు.ఇంద్రాది దేవతలతో కలిసి నాపై దండెత్తి వచ్చినా రాముడు యుద్ధములో నా ఎదుట నిలువలేడు ! .
.
చెప్పినది చాలు ఇకనీవు వెళ్ళవచ్చును అని విభీషణుని పంపివేసెను.
.
వూటుకూరు జానకిరామారావు
కామెంట్‌లు లేవు:
కామెంట్‌ను పోస్ట్ చేయండి