*శ్రీ కృష్ణదేవరాయల వైభవ గాథ..*
ఆంధ్ర భోజ! శ్రీకృష్ణదేవరాయా!
నీ పరిపాలన ఓ చరిత్ర, నీ వంశం రాజసానికి చిహ్నం,
విదేశీయులు సైతం కొనియాడిన అసమాన వంశం.
హంపి నగరపు సౌరభానికి నీవే నిత్య నిదర్శనం.
కవిత్వ కథన రంగ విన్యాస చరితా!
అష్టదిగ్గజాల సరసన వెలిగే రాజమార్తాండా!
'ఆముక్తమాల్యద'తో విరిసిన సాహిత్య పారిజాతమా!
నీవు తెలుగు తల్లి ముద్దుల రాజకుమారుడవు.
రణరంగ విన్యాస శత్రు భయంకరా!
గజపతులకు నీవు గజసింహ స్వప్నానివి.
చేతిలో కత్తి పడితే విజయం నీ చెంతనే..
రణరంగంలోనూ కవిత్వాన్ని పండించిన సాహితీ శిఖరమా!
లాలిత్య సౌందర్య సంపద వృక్షమా!
సంస్కృతాంధ్ర భాషలలో ఆరితేరిన ప్రవీణా!
అష్టాదశ వర్ణనలలో మేటి అనుభవజ్ఞుడా!
కవన రంగంలో నీవు సాహితీ సార్వభౌముడివి.
'మూరురాయరగండ' బిరుదాంకితుడా!
సకల ఆంధ్ర రాజ్య పరిపాలన విజేతవు నీవు.
నీ చరితం సువర్ణ హిమ శిఖరం..
దేశ చరిత్రలో నీది సుమధుర, సుస్థిర స్థానం.
మత సామరస్య పర్యవేక్షక సార్వభౌమా!
హిందూ-ముస్లిం ఐక్యతను చాటిన బోధకుడా!
హైందవ ధర్మ రాజ్య పరిరక్షకా..
ఆంధ్ర వైభవ పరంపరలో నీ నామం చిరస్థాయి.
శిల్ప సౌందర్య కళాపోషకా!
సకల కళా సమ్మేళనానికి నీవే రూపానివి.
విజయ నగర వైభవ సంస్కృతికి నీవే నిదర్శనం.
భావి తరాలకు నీ పరిపాలనే ఆదర్శం.
గొప్ప ఆలయాలను నిర్మించిన నిర్మాతవు,
శైవ, వైష్ణవ క్షేత్రాలను పునరుద్ధరించిన పుణ్యమూర్తివి.
కలియుగ దైవానికి మణి మాణిక్యాలర్పించిన భక్తుడివి,
సిరులను కురిపించే సువర్ణ హస్తం నీది.
అద్భుత చెరువులెన్నో తవ్వించావు,
రైతుల ఇంట సిరులను సాక్షాత్కరించావు.
భూమిపుత్రుడిని ఆదరించి..
ధాన్యలక్ష్మిని సగర్వంగా నిలిపిన అన్నదాతవు.
నలుదిక్కులా వ్యాపార వృద్ధిని పెంచావు,
రత్నరాసులు వీధుల్లో రాశులుగా పోయించావు.
అంతర్జాతీయ స్థాయిలో ఖ్యాతిని గడించి,
నేటి ఆర్థిక వ్యవస్థకు నీ పరిపాలనే అసలైన దర్పణం!
కొప్పుల ప్రసాద్
నంద్యాల
9885066235
కామెంట్లు లేవు:
కామెంట్ను పోస్ట్ చేయండి