శ్రీసరస్వతీధ్యానం

 శ్రీసరస్వతీధ్యానం 

వాణీం పూర్ణనిశాకరోజ్జ్వలముఖీం కర్పూరకుందప్రభాం

చంద్రార్కాంకితమస్తకాం నిజకరైః సంబిభ్రతీమాదరాత్ .

వీణామక్షగుణాం సుధాఢ్యకలశం విద్యాం చ తుంగస్తనీం

దివ్యైరాభరణైర్విభూషితతనుం హంసాధిరూఢాం భజే .. 1..

ఆసీనా కమలే కరైర్జపవటీం పద్మద్వయం పుస్తకం

బిభ్రాణా తరుణేందుబద్ధమకుటా ముక్తేందుకుందప్రభా .

భాలోన్మీలితలోచనా కుచభరాక్రాంతా భవద్భూతయే .

భూయాద్వాగధిదేవతా మునిగణైరాసేవ్యమానాఽనిశం .. 2..

యా కుందేందుతుషారహారధవలా యా శుభ్రవస్త్రావృతా

యా వీణావరదండమండితకరా యా శ్వేతపద్మాసనా .

యా బ్రహ్మాచ్యుతశంకరప్రభృతిభిర్దేవైస్సదా పూజితా

సా మాం పాతు సరస్వతీ భగవతీ నిశ్శేషజాడ్యాపహా .. 3..

దోర్భిర్యుక్తా చతుర్భిః స్ఫటికమణినిభైరక్షమాలాం దధానా

హస్తేనైకేన పద్మం సితమపి చ శుకం పుస్తకం చాపరేణ .

భాసా కుందేందుశంఖస్ఫటికమణినిభా భాసమానాఽసమానా .

సా మే వాగ్దేవతేయం నివసతు వదనే సర్వదా సుప్రసన్నా .. 4..

సురాసురాసేవితపాదపంకజా కరే విరాజత్కమనీయపుస్తకా

విరించిపత్నీ కమలాసనస్థితా సరస్వతీ నృత్యతు వాచి మే సదా .. 5..

సరస్వతీ సరసిజకేసరప్రభా తపస్వినీ సితకమలాసనప్రియా .

ఘనస్తనీ కమలవిలోలలోచనా మనస్వినీ భవతు వరప్రసాదినీ .. 6..

సరస్వతి నమస్తుభ్యం వరదే కామరూపిణి .

విద్యారంభం కరిష్యామి సిద్ధిర్భవతు మే సదా .. 7..

శ్రీమచ్చందనచర్చితోజ్జ్వలవపుః శుక్లాంబరా మల్లికా-

మాలాలాలితకుంతలా ప్రవిలసన్ముక్తావలీశోభనా ..

సర్వజ్ఞాననిధానపుస్తకధరా రుద్రాక్షమాలాంకితా .

వాగ్దేవీ వదనాంబుజే వసతు మే త్రైలోక్యమాతా శుభా .. 8..

.. శ్రీరస్తు ..

ఇతి శ్రీసరస్వతీధ్యానం ..