గజేన్ద్రమోక్షం

 ప్ర _ "గజేన్ద్రమోక్షం"🙏

కథ వింటే అసంగతంగా ఉంటుంది.

అది కేవలం సంకేతంగా కూర్చిన తత్త్వ కథా ? 

లేక నిజంగా జరిగిందా ? ఏనుగు భగవంతుని కీర్తించడమేమిటి ?*

జ _ "గజేన్ద్రమోక్షం"🙏

ఒక అద్భుతమైన తత్త్వ విజ్ఞాన ఘట్టం.

అది 'మన' కథ. అన్నీ అనుకూలించినంత కాలం

తానే గొప్పవాడిననుకొనేవాడికి -

నిజానికి తాను ఏకాకిననీ,

నాదనుకొనేవి ఏవీ నావి కావనీ గ్రహించి,

సర్వవ్యాపక చైతన్యాన్ని ప్రార్థించాడు.

ఆ స్తోత్రం విశ్వజనీన ప్రార్థన.

మనకు అత్యవసరమైన సత్యదర్శనాన్ని

కలిగించడానికి మహర్షి వ్యాసుడు ఈ కథను అందించాడు.

అయితే ఇది జరగలేదని చెప్పడానికి మనమెవరం ?

మనమున్నది వైవస్వత మన్వంతరంలోని 

( ఇది 7వ మన్వంతరం ) 28వ మహాయుగంలోని

కలియుగంలో. గజేన్ద్రమోక్షం కథ జరిగినది

నాల్గవ మన్వంతరమైన తామస మన్వంతరం.

 

ఏ జీవిలో ఏ ఆలోచన రేకెత్తుతుందో మనకేం తెలుసు?

ఎంత వేదవిజ్ఞానం బుద్ధి జీవులమైన

మనముందు ఉన్నా, నిత్యసత్యాలు కనిపిస్తున్నా 

మన బుద్ధికి వివేకం రాకపోవడం ఎంత ఆశ్చర్యమో,

అడవిలో ఉన్న ఏనుగుకి

వివేకం కలగడమూ అంతే ఆశ్చర్యం. 

పైగా ఏనుగుకి ఆ సమయంలో విష్ణుస్ఫూరణ

కలగడం 'పూర్వజన్మలో సంస్కారబలం '

అని స్పష్టంగా భాగవతం వివరించింది.

*" తత్ర తం బుద్ధి సంయోగం లభతే పౌర్వదైహికం "*

అని గీతావచనం.

" పూర్వజన్మల సంస్కారాల వల్ల బుద్దియోగం కలుగుతుందని" అర్థం. ఈ విషయాన్ని స్పష్టం చేస్తూ

"ప్రాగ్జన్మన్యనుశిక్షితం" అన్నాడు వ్యాసదేవుడు.

" గతజన్మల అభ్యాసబలం" వలన -అని.

 యోగమనేది ఒక జన్మలో ప్రారంభిస్తే, అది

తరువాతి జన్మలకు కూడా కొనసాగింపబడి సిద్ధిస్తుంది.

ఈ గజేన్ద్రుడు గత జన్మలో

ఇన్ద్రద్యుమ్నుడనే రాజు. విష్ణుభక్తుడు.

కానీ అగస్త్య  మహర్షిని నిర్లక్ష్యం చేసిన దోషం చేత

దేహాభిమానం కలిగిన గజేన్ద్రుడయ్యాడు.

మొసలితో పోరాటం చేత, గత సంస్కారం మేల్కొని

నాటి విష్ణుస్మరణ కలిగి ఈ జన్మలో మోక్షం పొందాడు.

 అదేవిధంగా - 'హూ హూ'

అనే గంధర్వుడు జలవిహారం చేస్తూ,

తన సఖులను మెప్పించడానికి,

జలంలో దూరి ఒడ్డున ఉన్న దేవరుడు

'దేవలుడ'నే అనే మహర్షి కాళ్లుపట్టుకొని లాగాడు.

ఆ దోషానికి ఫలితంగా మొసలిగా జన్మించి,

తిరిగి మరో భాగవతోత్తముని (గజేన్ద్రుని )

కాలుని పట్టుకొని, విష్ణు చక్ర స్పర్శ వలన

మరల గంధర్వుడయ్యాడు.

ఇవి గతజన్మల సంస్కారవాసనలు.

అందుకే మనం ఉత్తమ సంస్కారాలను

ఏర్పరచుకోవాలనీ, అహంకారం వల్ల దుష్కర్మల

నాచరించకుండా, అప్రమత్తంగా ఉండాలనీ

ఈ కథ బోధిస్తోంది🙏

ఏనాడో జరిగిన కథని...

ఈనాటి మనకు జ్ఞాన బోధకంగా అందించిన

మహర్షుల సునిశిత దృష్టికి జోహారులర్పించాలి.

ఓం నమో నారాయణాయ నమః🙏🙏