వేదవ్యాసుల వారి సంస్కృత మహాభాగవతం*

*అష్టమ స్కంధము - ఇరువది రెండఅధ్యాయము*

*బలిచక్రవర్తి భగవంతుని స్తుతించుట - భగవంతుడు ఆయనయెడ ప్రసన్నుడగుట*

*ఓం నమో భగవతే వాసుదేవాయ*
🕉🕉🕉🕉🕉🕉🕉🕉🕉🕉🕉🕉

*శ్రీశుక ఉవాచ*

*22.1 (ప్రథమ శ్లోకము)*

*ఏవం విప్రకృతో రాజన్ బలిర్భగవతాసురః|*

*భిద్యమానోఽప్యభిన్నాత్మా ప్రత్యాహావిక్లవం వచః॥7129॥*

*శ్రీశుకుడు నుడివెను* పరీక్షిన్మహారాజా! భగవంతుడు దైత్యరాజైన బలిచక్రవర్తిని ఈ విధముగా తిరస్కరించి, అతని ధైర్యమును సడలింపజేయుటకు ప్రయత్నించెను. కాని, బలి ఏమాత్రమూ చలింపక ధైర్యముగా ఇట్లు పలికెను-

*బలిరువాచ*

*22.2 (రెండవ శ్లోకము)*

*యద్యుత్తమశ్లోక భవాన్ మమేరితం వచో వ్యలీకం సురవర్య మన్యతే|*

*కరోమ్యృతం తన్న భవేత్ప్రలంభనం పదం తృతీయం కురు శీర్ష్ణి మే నిజమ్॥7130॥*

*బలిచక్రవర్తి పలికెను* దేవాదిదేవా! నీ కీర్తి మిగుల పవిత్రమైనది. నా మాటలు అసత్యములని భావించుచున్నావా? కాని, అట్లు కాదు. వాటిని నేను సత్యము చేసి, చూపెదను. నిన్ను నేను మోసగింపను. పుణ్యకీర్తీ! *నన్ను నేను* నీకు సమర్పించుకొంటిని. కనుక, దయచేసి నీ మూడవపాదమును నా తలపై ఉంచుము.

*22.3 (మూడవ శ్లోకము)*

*బిభేమి నాహం నిరయాత్పదచ్యుతో న పాశబంధాద్వ్యసనాద్దురత్యయాత్|* .

*నైవార్థకృచ్ఛ్రాద్భవతో వినిగ్రహాదసాధువాదాద్భృశముద్విజే యథా ॥7131॥*

నేను నరకయాతనకుగాని, నా రాజ్య పదవి నష్టమగుట వలనగాని భయపడను. పాశములచే బంధింపబడినను, ఆర్థిక సంకటము ఏర్పడినను నాకు భయము లేదు. అంతకంటె గొప్ప శిక్ష విధించినను నేను భయపడను. నేను కేవలము అపకీర్తికి మాత్రమే భయపడుదును.

*22.4 (నాలుగవ శ్లోకము)*

*పుంసాం శ్లాఘ్యతమం మన్యే దండమర్హత్తమార్పితమ్|*

*యం న మాతా పితా భ్రాతా సుహృదశ్చాదిశంతి హి॥7132॥*

మీవంటి పూజ్యులైన గురుజనుల ద్వారా విధింపబడిన శిక్ష, జీవమాత్రులందరికి కీర్తిని పెంపొందించును. అట్టి శిక్షను తల్లిదండ్రులు, సోదరులు, ఆత్మీయులగువారు మోహవశమున కూడ విధింపజాలరు.

*22.5 (ఐదవ శ్లోకము)*

*త్వం నూనమసురాణాం నః పారోక్ష్యః పరమో గురుః|*

*యో నోఽనేకమదాంధానాం విభ్రంశం చక్షురాదిశత్॥7133॥*

నీవు అసురులకు పరోక్షముగ శ్రేష్ఠమైన శిక్షణను ఇచ్చెదవు. కనుక, నీవు మాకు పరమగురుడవు. మేము ధనము, వంశము, బలము మొదలగు వాటిచే గర్వాంధులము ఐనప్పుడు, నీవు వాటిని మా నుండి లాగికొని, మాకు కనువిప్పు కలిగింతువు. ఈ విధముగా నీవు మమ్ములను సన్మార్గమున నడిపింతువు.

(శ్రీ వేదవ్యాసప్రణీత శ్రీమద్భాగవతమందలి అష్టమస్కంధములోని ఇరువది రెండవ అధ్యాయము ఇంకను కొనసాగును)

🙏🙏సర్వం శ్రీకృష్ణార్పణమస్తుఫ🙏🙏

*పసుమర్తి వేంకట దుర్గా సుబ్రహ్మణ్యం*
7702090319