నరసింహాపాసన అంటే సంధ్యోపాసనే )

 శ్రీరామ (131)

        (నరసింహాపాసన అంటే సంధ్యోపాసనే )

శ్లో//ఆపదామపహర్తారం దాతారం సర్వ సంపదామ్/

లోకాభిరామం శ్రీరామం భూయో భూయో నమామ్యహమ్//

(సమస్తమైన ఆపదలూ పోగొట్టేవాడు, సమస్త సంపదలూ ఇచ్చేవాడు, సమస్త జీవులను ఆనందపెట్టేవాడు,అయిన శ్రీరామచంద్ర ప్రభువునకు నమస్కరిస్తున్నాను, మరల మరల నమస్కరిస్తున్నాను).

                        -----------------------  

అన్ని ఉపాసనల కంటే "సంధ్యోపాసన" చాలా గొప్పది.

సంధ్యోపాసన అనగా రెండు సమయముల మధ్య సంధి, 

రెండు ప్రాంతముల మధ్య సంధి,

రెండు ఆలోచనల మధ్య సంధి,

రెండు అక్షరముల మధ్య సంధి,

ఉచ్ఛ్వాస, నిశ్శ్వాసల మధ్య సంధి,

మొదలైనవి.

ఆ "సంధుల" మధ్య ఉన్నదానిని (సత్) "సంధ్య" అంటారు.

అదే ఆత్మ.

దానిని గమనించడమే సంధ్యోపాసన.

సంధ్యలో మహత్తరమైన "ఉత్పాదన" శక్తి ఉంటుంది.

ఆ శక్తిని "సవిత" అంటారు.

ఆ శక్తిని ఉపాసించి తరించడానికే మనకు "సంధ్యోపాసన" చెప్పబడింది.

ఈ శక్తికి ప్రతీక అయిన సూర్యుని అగస్త్య మహర్షి ఉపదేశించిన ' ఆదిత్య హృదయము ' ను పఠించి, శ్రీరాముడు ఉపాసించాడు.

ఆవిధంగా ఉపాసించిన తరువాత "శ్రీ రాముడు" రావణాసురుని అవలీలగా సంహరించగలిగాడు.

సీతాదేవి కూడా " సంధ్యోపాసన" చేసినట్లు వాల్మీకి రామాయణం లోని "సుందరకాండ" లో చెప్పారు.

చెరుకు గడ యొక్క "కణుపు" లో విత్తనం లేకుండా 

"చెరుకు మొక్క" ను పుట్టించే శక్తి ఉన్నది.

ఆ కణుపును "పర్వం" అంటారు.

"ఉదయ సంధ్య", "సాయం సంధ్య"  

గ్రహణములు,పుష్కరములు, మొదలైనవి కాల పర్వములు.

కాశీ మొదలైన పుణ్యక్షేత్రములు దేశ పర్వములు.

ఈ దేశ, కాల, పర్వములు అత్యంత శక్తివంతమైనవి.

 ఆ యా పర్వములలో చేసే జప, ధ్యాన, పూజాదులు,ఇతర సమయములలో చేసే జపాదుల కంటే ఎన్నో రెట్లు అధిక ఫలాన్ని ఇస్తాయి.

నరసింహ స్వామి పగలు, రాత్రి, మధ్య ఉండే సంధ్యాసమయంలో ఆవిర్భవించాడు.

ఆ "సంధ్య" లో ఉన్న మహాశక్తే నరసింహ స్వామి రూపంలో మహాబలుడైన హిరణ్యకశిపుని అవలీలగా సంహరించింది.

ఆ శక్తే "అహో బలం" అని దేవతలచే స్తుతింపబడి, 

"అహోబిలం" లో వేంచేసి ఉన్నది.

శక్తికి ప్రతీక అయిన ఆ నరసింహస్వామిని ఉపాసిస్తే "సంధ్యోపాసన" ఫలితం సిద్ధిస్తుంది.

విశేషించి సంధ్యా సమయములలో చేసే నరసింహోపాసన సర్వ శ్రేయస్సులను ప్రసాదిస్తుంది.

శ్లో//శ్రీమన్నృసింహ విభవే గరుడధ్వజాయ/

తాపత్రయోపశమనాయ భవౌషధాయ/

తృష్ణాది వృశ్చిక జలాగ్ని భుజంగ రోగ/

క్లేశవ్యయాయ హరయే గురవే నమస్తే//.

శుభమస్తు,

తూములూరి మధుసూదనరావు,

1-5-'26.