విష్ణుం నారాయణం

 వందేమాతరం 

*విష్ణుం నారాయణం కృష్ణం మాధవం మధుసూదనం!*

*హరిం నరహరిం రామం గోవిందం దధివామనమ్!!*

యావత్ ప్రపంచం కరోనా మహమ్మారి కరాళ నృత్యంలో విలవిలలాడుతున్న ఆ కాలంలో, భక్తులను ఆ విపత్తు దాండం నుంచి కాపాడటానికి ప్రముఖ వేద పండితులు, బ్రహ్మశ్రీ గుళ్ళపల్లి శివశర్మ ఘనపాఠీగారు పరిచయం చేసిన ఈ మహా మంత్రం భక్తుల హృదయాల్లో అమృత ధారగా ప్రవాహించింది. ఎన్నో అవాంతరాలు, వ్యయప్రయాసాలు ఎదురైనా, అకుంఠ దీక్షతో నిర్విరామంగా ఆయన చేస్తున్న ఈ భక్తయజ్ఞం అద్వితీయమైనది. ఆయన కఠోర శ్రమకు హృదయపూర్వక నమస్సుమాంజలి!

గత ఆరు సంవత్సరాలుగా లక్షలాది భక్తులను సుప్రభాత వేళ భక్తపారవశ్యంలో ముంచి తరింప చేస్తున్న ఈ అద్భుతమైన మహా మంత్రం మహాభారతంలోని అనుశాసన పర్వంలో వ్యాస మహర్షి రచించిన విష్ణు సహస్రనామ స్తోత్రం నుండి ప్రేరణ పొందిన అమృత ధార. భీష్మాచార్యుడు యుధిష్ఠిరునికి బోధించినట్లుగా, భక్తులు హృదయాల్లో భగవద్కృపా వర్షాలు కురిపించి, సృష్టి స్థితి లయాలను కాపాడే భగవద్విష్ణువు ప్రధాన రూపాల సంగ్రహ స్వరూపం. 

దీని మూలానికి స్ఫూర్తి ఋగ్వేద మంత్రం (1.154.1) 

“విష్ణోర్ను కం వీర్యాణి ప్రవోచం

యః పార్ధివాని విమమేథ భువనాని విశ్వా ।

యో అశ్తభి: పిప్రయోనాభి: ప్రథంయాందే

యత్ర భూయః శయాయ ॥” 

లోని "విష్ణోర్ణుకం వీర్యాణి ప్రవోచం" అన్న భావమే. ఇది వీర్య, భక్తి, శాంతి త్రయాన్ని ప్రసాదిస్తుంది. ఈ మంత్ర జపం భక్తి గంగలో మునిగిన ఆత్మలను మోక్ష ద్వారాలకు చేర్చి ధర్మ రక్షణకు దైవిక కవచంగా తేజస్సెలుపుతుంది.‌ ఈ మంత్రం భక్త హృదయంలో భగవదానుభూతిని, విశ్వాసాన్ని, శరణాగతిని పుష్టి చేస్తూ, విష్ణువు సృష్టి-స్థితి-లయాలలో వ్యాపించే పరబ్రహ్మ స్వరూపుడనే వేదోక్తిని ప్రభోదించుతుంది. ఈ మంత్రం జపిస్తే మనసు పవిత్రమవుతుంది, పాపాలు ధ్వంసమవుతాయి, మోక్ష మార్గాలు వెలుగొంటాయి. ఇటువంటి భగవద్విష్ణువు అనంత రూపాల సంగ్రహ స్తోత్రమైన ఈ దశనామ స్తోత్రంలో, ఒక్కొక్క నామం విశిష్టతను హృదయస్పర్శిగా స్పృశిద్దాం.

శ్రీ మహా విష్ణు దశనామ సంగ్రహంలో ఒక్కొక్క నామం హృదయకమలాలను వికసింపజేసే దైవిక తేజస్సు. 

*విష్ణుః*

"విష్ణుం" అంటే సర్వ వ్యాప్తి, సర్వాంతర్యామి. ఋగ్వేదంలో "విష్ణోర్ను కం వీర్యాణి ప్రవోచం" అని స్తోత్రించినట్లు. భగవద్గీత (10.21)లో 

ఆదిత్యానమహః విష్ణు: జ్యోతిషాం రవిరంశుమాన్....

అని ప్రకాశించినట్లు, విష్ణువు సృష్టి, స్థితి, లయాలలో వ్యాపించి ఉంటాడు. ఈ నామ జపం చేస్తే భక్త జీవితాన్ని ఆత్మ విశాలత్వాన్ని ఆందిస్తూ సమస్తలోకాల విస్తరణంలా మహోన్నతం చేస్తుంది.

*నారాయణః*

నారాయణం అంటే "నారా (జలాలు) + అయన (నివసించేవాడు).‌ తైత్తిరీయోపనిషత్ (2.1)లో "స యత్కిం చ దృశ్యతే తత్పరస్మాదాత్మన్యేవ" అని వర్ణించారు. ఈ నామం భగవంతుని యొక్క ప్రకృతి స్వరూపాన్ని తెలియజేస్తుంది. భాగవత పురాణంలో (1.2.11) "వాగీశ యశచా శ్రీవిష్ణోర్మూలనిహాస్త్వితి" అని ప్రశంసించారు. ఈ నామ ధ్యానం జీవిత సముద్రంలో డోలాయమాన పరిస్థితులను శాంతి తీరాలతో నింపి, భగవంతుని ప్రకృతి స్వరూపాన్ని హృదయంలో చిరస్థాయిగా భావింపజేస్తుంది.

*కృష్ణః*

ఇది దివ్య మోహన రూపుడైన భగవంతుని వర్ణన. "కృష్ణం" అంటే కాళీయ మర్దనుడు, గోపాలుడు. భగవద్గీత (4.7)లో "యదా యదా హి ధర్మస్య గ్లానిర్భవతి భారత" అని ధర్మ రక్షణను ప్రకటించాడు. ఈ నామ జపం భక్తుల హృదయాల్లో శరణాగతి రసాన్ని పెంపొందించి, ఆత్మను ప్రేమ పరవశం చేస్తుంది.

*మాధవః*

"మాధవం" అంటే మాధవీ (పృథ్వీ) అనగా దేవకీ పుత్రుడు. ఈ నామ ప్రస్తావన విష్ణు పురాణంలో(5.1) కనిపిస్తుంది. మాధవుడు సృష్టి రక్షణకు గోవర్ధనాన్ని ఉన్నతం చేశాడు. ఈ నామ ధ్యానం భక్తి గంగను, సంపద సముద్రాన్ని, శాంతి సారస్సును హృదయంలో నింపుతుంది.

*మధుసూదనః*

ఇది మధు అనే రాక్షస వధకారుడైన ఆ స్వామి నామం. భాగవత పురాణం (1.3.6)లో వర్ణించినట్లు, ఇది అధర్మాన్ని నాశనం చేయడానికి వచ్చిన స్వామి అవతారం. ఈ నామం భక్తి హృదయాల్లో అధర్మ దాండీలను తొలగించే తేజస్సును రగిలిస్తుంది.

*హరిః*

"హరిం" అంటే పాపాలను హరించేవాడు (పాపహర్తా). శ్వేతాశ్వతరోపనిషత్ (3.11)లో "హరిస్సర్వం" అని ఉద్ఘాటించారు.‌ హరి నామ జపం భక్తులను మోక్ష పదాలకు చేర్చి, ఆత్మను పవిత్ర దీప్తిలో ముంచుతుంది.

*నరహరిః*

ఇది ఆ స్వామి అర్ధనారీశ్వర తత్వాన్ని సూచిస్తుంది. "నరహరిం" నరసింహ అవతార రూపం. ఈ నామం యొక్క విశిష్టత భాగవతంలో హిరణ్యకశిపుని వధ వర్ణనలో . "ఉగ్రం వీరం మహావిష్ణు" అనే ద్వాదశాక్షర మంత్రంతో ముడిపడి ఉంది. ఈ నామం భక్తి రక్తంలో తేజస్సును ప్రవేశపెడుతుంది.

*రామః*

ధర్మ రక్షణార్థం అవతరించిన మర్యాద పురుషోతముడైన శ్రీరామచంద్రుడుని దివ్య మంగళ నామం హృదయాల్లో మర్యాద రాజ్యాన్ని స్థాపించే ప్రకాశకిరణం.

*గోవిందః*

నామస్మరణతోనే ‌మనసును భక్తి పరవశ్యంలో ప్రసన్నం చేసే గోవులను, ఈ జగత్తును రక్షించడానికి అవతరించిన ఆ లోక రక్షకుని అద్భుత నామం "గోవింద". ఇది హృదయాల్లో గోపాల రసాన్ని పెంపొందిస్తుంది.

*దధివామనం*

 ఈ నామం బలిచక్రవర్తి నుంచి ఈ జగత్తును కాపాడిన వావనాతార విశే‌షాన్ని సూచిస్తుంది.‌ ఈ నామం భక్తి హృదయాల్లో విష్ణు క్రీడలను స్మరింపజేస్తూ, దైవిక విజయాన్ని అందిస్తుంది.

చివరిగా, జయదేవుడు విరచిత గీత గోవిందంలోని 12 శ్లోకాల దశావతార స్తోత్రానికి సమానమైన ఈ దశనామ స్తోత్ర పారాయణం మనస్సును ప్రశాంతి సముద్రంలో ముంచి, పాప నాశనం, ఆరోగ్యం, ధర్మ రక్షణను కలిగిస్తుంది. విష్ణు సహస్రనామ స్తోత్రం సారాంశంగా పనిచేసి, అశ్వమేధ యాగ సమాన పుణ్యఫలితాన్ని ఇస్తుంది. మానసిక బలం పెరిగి ఆందోళనలు, మరణ భయం తొలగి ధ్యాన స్థితి వస్తుంది. భక్తులను చెడు శక్తులు, శత్రువుల నుండి కాపాడే దైవిక కవచంలా పనిచేస్తూ, ఆధ్యాత్మిక వృద్ధి, మోక్ష ప్రాప్తి కలిగి కోటి జన్మల పుణ్యఫలం అందిస్తుంది.

భక్తులందరికీ వినమ్ర పూర్వక నమస్సులతో

మృశి

దశిక ప్రభాకరశాస్త్రి