🌲🌲🌲🌲🌲🌲🌲🌲🌲🌲🌲🌲
*ధార్మికగీత - 65*
*****
*శ్లో:- శబ్దాదిభిః పంచభి రేవ పంచ ౹*
*పంచత్వ మాపు: స్వగుణేన బద్ధా:౹*
*కురంగ మాతంగ పతంగ మీన ౹*
*భృంగా నరః పంచభి రంచితం కిమ్?*
*****
*భా- మానవ జీవన పురోగతికి, అథోగతికి కారకాలు పంచేంద్రియాలే. ఒక్క ఇంద్రియానికి వశమైతేనే ప్రాణాన్ని పోగొట్టుకొంటున్న సందర్భాలు కోకొల్లలు. 1. "శబ్దము"(చెవి):- "లేడి" శ్రవణపేయమైన మృదుమధుర వేణుగానామృతరసాస్వాదనలో పడి, వేటగానికి చిక్కి బలైపోతోంది.2. "స్పర్శ"(చర్మము):- "మదపుటేనుగు" ఆడయేనుగు యొక్క శారీరక తాకిడి సుఖానికి ఆశపడి, వేటగాడు ఏర్పాటుచేసిన కందకంలో కూరుకుపోయి బందీ అవుతోంది.3. "రూపము"(కన్ను):- "మిడత" భగభగ మండే మంటల కాంతి సొబగులకు ప్రలోభపడి, మోహంతో వాటిలోకి దూకి తనకు తానే అంతరించిపోతోంది.4."రసము"(నాలుక):- "చేప" జిహ్వచాపల్యంతో "ఎర " కోసం ఆశపడి, జాలరివాని గాలానికి చిక్కి, జీవితాన్ని అర్పణ చేసికొంటోంది.5. "గంధము"(ముక్కు):- "తుమ్మెద" పరిమళ భరితమైన పుష్పాలలోని మకరందానికి ఆశపడి, సూర్యాస్తమయసమయంలో ముకుళితపుష్పంలో చిక్కుపడి, అంతమౌతున్నది. ఈ విధంగా ఒక్క ఇంద్రియానికి లోబడితేనే పరిస్థితి ఇలా ఉంటే , ఇక పంచేంద్రియాలన్నింటికి దాసానుదాసుడై, బ్రహ్మానంద, పరమానందపరవశు డౌతున్న "పాపం మానవుని" గతి యేమి కానున్నదోగదా! ఇంద్రియాలను ఆధీనంలో పెట్టుకొని, గెలువజాలిన "జితేంద్రియుడ"వడానికి యమ నియమాలతో సాధన చేయాలని సారాంశము.*
*****
*సమర్పణ : పీసపాటి*
🌲🌲🌲🌲🌲🌲🌲🌲🌲🌲🌲🌲
కామెంట్‌లు లేవు:
కామెంట్‌ను పోస్ట్ చేయండి