తిమిరంతో పయనం
కోటి రతనాల వీణ
తెగిన తంత్రులతో వికృత రాగాలాలపిస్తోంది.
సమసమాజ భారతికి దారులు వేసిన నేల
విప్లవోద్యమాల పురిటిగడ్డ
అభ్యుదయ భావజ్వాల
నేడు మరుభూమిగా మారిపోయింది!
తిరిగొచ్చిన గడీల పాలన
పల్లె పల్లెలో ఫ్యూడల్ భావజాలాన్ని
పునఃప్రతిష్ఠ చేస్తోంది .
కులం మతం కవల రాక్షసుల్లా
జనాలను కబళిస్తున్నాయి !
కన్నబిడ్డలనే తెగనరుక్కునే కసాయితనం
నుదిటికుంకుమ చెరిపేసి రాక్షసత్వం
తలకెక్కిన కులోన్మాదం వికట్టహాసం చేస్తోంది!
అమరుల నెత్తుటితో తడిసిన నేలలో
కుక్కమూతి పిందెలు,పిచ్చిమొక్కలు మొలుస్తున్నాయి.
అంధకారం ఆక్రమించుకుంటున్న నేల
తిరోగమం లో పురోగమిస్తోంది!
కామెంట్‌లు లేవు:
కామెంట్‌ను పోస్ట్ చేయండి