*శ్రీలలితా సహస్రనామ భాష్యము*

 *శ్రీమాత్రేనమః*

*శ్రీలలితా సహస్రనామ భాష్యము*

*984వ నామ మంత్రము* 30.8.2021

*ఓం త్రిగుణాయై నమః*

సత్త్వరజస్తమో గుణ స్వరూపిణి అయిన జగన్మాతకు నమస్కారము.

శ్రీలలితా సహస్ర నామావళి యందలి *త్రిగుణా* యను మూడక్షరముల (త్ర్యక్షరీ) నామ మంత్రమును *ఓం త్రిగుణాయై నమః* అని ఉచ్చరించుచూ, ఆ పరమేశ్వరిని అత్యంత భక్తిశ్రద్ధలతో ఆరాధించు సాధకులకు ఆ పరమేశ్వరి వారికి ఆయురారోగ్యసంపదలు, శాంతిసౌఖ్యములు ప్రసాదించును.

పరమేశ్వరి సత్త్వరజస్తమస్సులనెడు త్రిగుణములకు ఆశ్రయముగా కొందరు చెప్పగా, 

*యోగీశ్వరీ శరీరాణి కరోతి వికరోతి చ| నానాకృతి క్రియారూపా నానావృత్తిః స్వలీలయా| త్రిథా య ద్వర్తతే లోకే తస్మా త్సా త్రిగుణోచ్యతే॥* (సౌభాగ్యభాస్కరం, 1074వ పుట)

'యోగీశ్వరి (శ్రీమాత) తన లీలచే సకల శరీరములను సృష్టించుచున్నది మరియు లయింపజేయుచున్నది. కాని ఆ తల్లి మాత్రము నామ, రూప, క్రియాత్మకములై మూడువిధములుగా విలసిల్లుచున్నది. ఈ నామ, రూప, క్రియ అనునవియే త్రిగుణములు' అను భావమతో వాయుపురాణమునందు చెప్ఫబడినది. కనుక ఎలా భావించినను పరమేశ్వరి *త్రిగుణా* యని అనబడుచున్నదని చెప్పక తప్పదు.

విష్ణుపురాణంలో ఈ విధంగా చెప్పబడినది.

*సర్వభూతేషు సర్వాత్మన్ యా శక్తిరపరా| తవ గుణాశ్రయా నమస్తస్యై శాశ్వతాయై సురేశ్వరి॥* (సౌభాగ్యభాస్కరం, 1075వ పుట)

"అమ్మా పరమేశ్వరీ! అన్నిభూతములయందును, అనంతకోటి జీవరాశుల యందును నిక్షిప్తమై యుండు నీ శక్తి త్రిగుణాత్మకము. త్రిగుణాశ్రయురాలైన ఓ సురేశ్వరీ! నీకు వందనము.

సృష్టి, స్థితి, లయలు అను మూడును పరమేశ్వరి నిర్వహించు పంచకృత్యములలోనివే. ఈ మూడును ఉత్తత్తి, స్థితి, నాశనము అను మూడు గుణములను కలిగినది యగుటచే, జగన్మాత *త్రిగుణా* యని అనబడుచున్నది.

పరమేశ్వరికి నమస్కరించునపుడు *ఓం త్రిగుణాయై నమః* అని యనవలెన.

🌹🌹🌹🌹🌹🌹🌹🌹🌹🌹🌹🌹

మహాగణపతి, బాల, శక్తిపంచాక్షరీ, పంచదశీ మంత్రోపదేశము, ఆంగ్లభాషలో అనర్గళ వాక్పటిమ ప్రదాతలు, నా జీవన వృత్తికి, ప్రవృత్తికి మార్గదర్శకులైన, కుర్తాళం మౌనస్వామి వారి ప్రియశిష్యులు, నాతొలిగురువర్యులు, కీ.శే కొండాకోటయ్య మహనీయుల అనుగ్రహముతోను, ఎనిమిది నెలలు(1977లో) తన పాదసేవాభాగ్యంతో నన్ను పునీతులను చేసిన జిల్లెళ్ళమూడి అమ్మ అనుగ్రహముతోను భాస్కరరాయలు వారి సౌభాగ్యభాస్కరము, మరియు కొందరు ఆధ్యాత్మికవేత్తల వ్యాఖ్యానముల పరిశీలనతోను అక్కడక్కడ భాస్కరరాయలు వారి శ్లోకములు మరియు ఆది శంకరాచార్యుల సౌందర్యలహరి శ్లోకములు తీసుకుంటూ, నా స్వీయ వివరణతో ఈ వ్యాఖ్యాన పుష్పాన్ని జగజ్జనని ఇచ్చిన ప్రసాదంగా భావిస్తూ అందరికీ పంచుతున్నాను. ఇచ్చిన పేరాలు, శ్లోకాలు జగజ్జనని ప్రసాదపుష్పంగా భావిస్తున్నాను. ఇందులో వ్యాఖ్యాన పంక్తులు గాని, శ్లోకాలు మొదలైనవన్నియు అమ్మవారి నుండి లభించిన ప్రసాద పుష్పము యొక్క దళములుగా భావించుచున్నాను. అట్టి పుష్పమునుండి ఏమి తొలగించిననూ ఆయా దళములు త్రుంచిన దోషమవుతుంది. జగన్మాత భక్తులయిన వారు యథాతథముగా ఎంతమందికి ఈ పుష్పాన్ని పంపిననూ సంతోషమే.

🌹🌹🌹🌹🌹🌹🌹🌹🌹🌹🌹🌹

 *పసుమర్తి వేంకట దుర్గా సుబ్రహ్మణ్యం* 7702090319, 9505813235

🌹🌹🌹🌹🌹🌹🌹🌹🌹🌹🌹🌹

మీకు, మీకుటుంబ సభ్యులకు శుభోదయ శుభాభి వందనములు🌹🌹🌹🌹🌹🌻🌻🌻🌻🌸🌸🌸🌸💐💐💐