*శ్రీమాత్రేనమః*
*శ్రీలలితా సహస్రనామ భాష్యము*
*998వ నామ మంత్రము* 23.9.2021
*ఓం శ్రీశివాయై నమః*
శ్రీతో కూడిన పార్వతియైన జగన్మాతకు నమస్కారము.
*శివా* యను నామముతో కూడిన పరమేశ్వరికి నమస్కారము.
శ్రీలలితా సహస్ర నామావళి యందలి *శ్రీశివా* యను మూడక్షరముల నామ మంత్రమును *ఓం శ్రీశివాయై నమః* అని ఉచ్చరించుచూ, ఆ పరమేశ్వరిని అత్యంత భక్తిశ్రద్ధలతో ఆరాధించు భక్తులను ఆ పరమేశ్వరి జన్మరాహిత్యమైన కైవల్యపదమునకు మార్గము సుగమము చేసి తరింపజేయును.
శ్రీ యనగా శోభస్కరమైనది. శ్రీ యను శబ్దమునకు అనేక అర్థములు ఉన్నవి. లక్ష్మీ స్వరూపిణి, శోభతో కూడినది (శోభతో కూడిన పార్వతి). మంగళకరమైనది. సర్వమంగళ స్వరూపిణి. *శివా* యనగా శివశక్త్యైక్యము వలన పరమేశ్వరుడే పరమేశ్వరి, పరమేశ్వరియే శివుడు అని, ఆ పార్వతీపరమేశ్వరులు, లేదా కామేశ్వరీ కామేశ్వరులకు అభేదమును తెలియజేయబడుటచే అమ్మవారు *శివా* యనియు, శోభ (శ్రీ) తో కూడిన *శ్రీశివా* యనియు అనబడినది. *శ్రీయుక్తా శివా శ్రీశివా* అని భాస్కరాచార్యులవారు అన్నారు (సౌభాగ్యభాస్కరం, 1083వ పుట). అవును! అమ్మవారు, అయ్యవారు ఒకటే. వారిద్దరూ శ్రీచక్రరాజమునకు ప్రతీకలు. అమ్మవారు సాక్షాత్తు శివునియర్ధాంగి యగుటచే *శివా* యనియు, మంగళస్వరూపిణియైన ఆ అమ్మ *శ్రీశివా* యనియు అనబడినది. అమ్మవారిని *శివా* యని లలితా సహస్రమందలి ఏబది మూడవ నామ మంత్రమందు పరమేశ్వరుని శక్తియే, అర్ధాంగియై అభేదముగా అలరారుచున్నదని కీర్తించియున్నాము. ఇప్పుడు ఈ నామ మంత్రమునందు ఆ అమ్మను శోభతో (శ్రీతో) కూడిన *శివా* *(శ్రీశివా)* యని భక్తిప్రపత్తులతో కీర్తించుచున్నాము.
అమ్మవారికి నమస్కరించునపుడు *ఓం శ్రీశివాయై నమః* అని యనవలెను.
🌹🌹🌹🌹🌹🌹🌹🌹🌹🌹🌹🌹
మహాగణపతి, బాల, శక్తిపంచాక్షరీ, పంచదశీ మంత్రోపదేశము, ఆంగ్లభాషలో అనర్గళ వాక్పటిమ ప్రదాతలు, నా జీవన వృత్తికి, ప్రవృత్తికి మార్గదర్శకులైన, కుర్తాళం మౌనస్వామి వారి ప్రియశిష్యులు, నాతొలిగురువర్యులు, కీ.శే కొండాకోటయ్య మహనీయుల అనుగ్రహముతోను, ఎనిమిది నెలలు(1977లో) తన పాదసేవాభాగ్యంతో నన్ను పునీతులను చేసిన జిల్లెళ్ళమూడి అమ్మ అనుగ్రహముతోను భాస్కరరాయలు వారి సౌభాగ్యభాస్కరము, మరియు కొందరు ఆధ్యాత్మికవేత్తల వ్యాఖ్యానముల పరిశీలనతోను అక్కడక్కడ భాస్కరరాయలు వారి శ్లోకములు మరియు ఆది శంకరాచార్యుల సౌందర్యలహరి శ్లోకములు తీసుకుంటూ, నా స్వీయ వివరణతో ఈ వ్యాఖ్యాన పుష్పాన్ని జగజ్జనని ఇచ్చిన ప్రసాదంగా భావిస్తూ అందరికీ పంచుతున్నాను. ఇచ్చిన పేరాలు, శ్లోకాలు జగజ్జనని ప్రసాదపుష్పంగా భావిస్తున్నాను. ఇందులో వ్యాఖ్యాన పంక్తులు గాని, శ్లోకాలు మొదలైనవన్నియు అమ్మవారి నుండి లభించిన ప్రసాద పుష్పము యొక్క దళములుగా భావించుచున్నాను. అట్టి పుష్పమునుండి ఏమి తొలగించిననూ ఆయా దళములు త్రుంచిన దోషమవుతుంది. జగన్మాత భక్తులయిన వారు యథాతథముగా ఎంతమందికి ఈ పుష్పాన్ని పంపిననూ సంతోషమే.
🌹🌹🌹🌹🌹🌹🌹🌹🌹🌹🌹🌹
*పసుమర్తి వేంకట దుర్గా సుబ్రహ్మణ్యం* 7702090319, 9505813235
🌹🌹🌹🌹🌹🌹🌹🌹🌹🌹🌹🌹
మీకు, మీకుటుంబ సభ్యులకు శుభోదయ శుభాభి వందనములు🌹🌹🌹🌹🌹🌻🌻🌻🌻🌸🌸🌸🌸💐💐💐
కామెంట్‌లు లేవు:
కామెంట్‌ను పోస్ట్ చేయండి