..
తలచుకుంటూ ఉంటే హృదయం బరువెక్కిపోతున్నది కౌసల్యకు.
తన పుణ్యాలప్రోవు ,తన వరాలమూట జగదేకవీరుడైన రాముడు చేయని తప్పుకు శిక్ష అనుభవిస్తున్నాడనే ఆలోచన ఆవిడ గుండెల్ని పిండివేస్తున్నది !
దీనికి కారణం దశరథుడు !
.
తన భర్తయొక్క అనాలోచిత చర్య !
.
ఆవిడ బాధ అంతా దశరథుడి మీద కోపంగా మారిపోయింది..
.
రాజా నీకు మూడులోకాలలో కీర్తి ఉండిన ఉండవచ్చు కానీ నీవు చేసిన ఈ తెలివితక్కవ పనివలన అది అంతా తుడిచి పెట్టుకు పోయింది..
.
నీ కొడుకులిద్దరూ నీ పనికిమాలిన కోరిక వలన అడవులపాలైనారే !
కష్టమంటే ఏమిటో తెలియని రాకుమారులు అడవులలో క్లేశాలను ఎలా భరించగలరనుకొని పంపావయ్యా!
.
ఇంత వరకు భక్ష్య,భోజ్య,లేహ్య,చోష్య,పానీయాదులతో బహుపసందైన భోజనమారగించే ఆ జనకుడికూతురు అడవులలో దొరికే నివ్వరిధాన్యాలు,వెదురుబియ్యాలతో ఆకలి ఎలా తీర్చుకుంటుంది?
.
సుప్రభాతవేళలో మంగళవాయిద్యములను శ్రవణానందకరంగా వింటూ నిదురలేచే ఆ రాకుమారి నేడు అడవి అంతా ప్రతిధ్వనించే సింహశార్దూల గర్జనల భయంకరధ్వనికి ఉలిక్కిపడి నిదురలేవాలికదయ్యా!
ఎంతటి దయమాలినవాడవయ్యా నీవు !
.
పట్టుపరుపులమీద మెత్తని దిండ్లు తలగడగా పెట్టుకొని హాయిగా నిదురించే నా కుమారుడు నేడు పరిఘవంటి తన బాహువులనే తలగడగా పెట్టుకొని నిదురించాలి గదయ్యా!
ఎంత తెలివిమాలినపనిచేశావయ్యా!.
.
నీవు సుఖం అనుభవించటానికి నాకొడుకులను సుఖానికి దూరంచేశావు కదా!.
.
రాముడు తిరిగి వచ్చినప్పుడు తన తమ్ముడు అనుభవించిన రాజ్యలక్ష్మిని తాను తిరిగి చేపడతాడా?
.
ఇంకొక మృగము ముట్టిన ఆహారము పెద్దపులి తాను ముట్టదు .
నరశార్దూలము నా రాముడు!
వాడు ఇంకొకరిచేత ఎంగిలి చేయబడ్డ కూడు ఆశించడు.
.
ఆత్మాభిమానము కల రాముడు ఈ అవమానం సహించడు.
.
కేవలము తండ్రి అనే గౌరవముతో నిన్ను ఏమీ చేయలేదు.
వాడికోపము ముల్లోకాలను ముంచెత్తగలదు !
వాడి బంగరు బాణములు సకలభూతములను ప్రళయకాలములోని అగ్ని లాగా దహించివేయగలవు.
వాడి శస్త్రాస్త్రాలు మహాసముద్రాలనే ఇంకింపచేయగలవు,
వాడు కన్నెర్ర చేస్తే నీవెక్కడ ఉండే వాడివి?.
.
పెద్దపులి తోకను తాకితేనే తాకినవారిని నిలువునా చీల్చివేస్తుంది! ఈ అవమానము నా రాముడు భరింపగలడా?
.
చేపలు తమపిల్లలను తామే తింటాయి అలాగే నీ పిల్లల సౌభాగ్యాన్ని నీవే నాశనం చేశావుకదయ్యా!
.
వాడు ఏ నేరము చేశాడో చెప్పు ?
ధర్మానికి కట్టుబడి నడుచుకోవటమే వాడి బలహీనత అయ్యింది నేడు !
ధర్మమూర్తికి ఉత్తపుణ్యానికి రాజ్యబహిష్కరణ విధించి బికారిలాగ ఇంటినుండి వెడలగోట్టావు కదా!
ఇది శాస్త్ర సమ్మతమేనా?!
సనాతన ధర్మమేనా? !
.
పడతికి పతి,పుత్రుడు,జ్ఞాతి ఈ ముగ్గురే గతి !
మొదటి గతి, నీవా ఉండీ నాకు లేనట్లే
నా కొడుకును చూసుకొని ఉందామంటే వాడిని అడవులపాలుచేశావు!
అన్ని విధాలుగా నన్ను గతిలేని దానిని చేశావు కదయ్యా అంటూ తన హృదయవేదనను బహిర్గతం చేసింది కౌసల్యామాత!
.
వూటుకూరు జానకిరామారావు
.
కామెంట్‌లు లేవు:
కామెంట్‌ను పోస్ట్ చేయండి