ఓ చిన్న కధ.

 *ఓ చిన్న కధ. 

*అమ్మాయి పెళ్ళికై నిశ్చయ తాంబూలాలు పుచ్చుకున్నారు, ఆరోజున..!*

*అది మంచి సంబంధం కావడంతో కుటుంబం మొత్తం ఎంతో సంతోషించింది.*

*తండ్రి అయిన శర్మగారు ఎంతగానో ఆనందించారు. అబ్బాయి , అతని తల్లిదండ్రులు చాల మంచివారు. దాంతో శర్మగారికి ఎంతో భారం తగ్గినట్లనిపించింది.*

*పెళ్ళికి ముందు ఒక  రోజు  పెళ్ళికూతురు తండ్రి శర్మగారు వియ్యంకుడు వాళ్ళింటికి వెళ్ళాల్సి వస్తుంది.*

*అయితే ఆరోజు శర్మగారి ఆరోగ్యం బాగాలేదు. మొదటిసారి కావడం తో కాదనలేకపోయాడు.*

*వరుని తరఫువాళ్ళు ఎంతో సాదరంగా ఇంటిలోనికి ఆహ్వానించారు.*

*కొద్దిసేపు వచ్చినపని విషయమై మాట్లాడుతుండగానే టీ తీసుకొచ్చారు. శర్మగారికి మధుమేహం ఉండడంతో కొన్ని సంవత్సరాల నుండి చక్కెర పదార్ధాలకు దూరంగా ఉంటున్నారాయన.*

*అయితే మగపెళ్ళివారింటిలో శర్మగారు మొహమాటంతో ఇచ్చిన టీ కప్పును చేతిలోనికి తీసుకున్నారు తాగడానికై...*

*మొదటి గుటక వేస్తూనే ఒకింత ఆశ్చర్యానికి గురయ్యారు.*

*అందులో పంచదార లేదు సరికదా, తనకిష్టమైన యాల కుల పొడి వేశారు.*

*మాఇంటిపధ్ధతిలోనే చేసిన టీ ని... వీరింటిలోనూ తాగుతున్నారే అని అనుకున్నారాయన.*

*మధ్యాహ్నం భోజనం చేశారు, అదీ అచ్చు తమ ఇంటివంట లాగానేఉంది.*

*వెంటనే ఏం బయలు దేరుతారు, కొంచెం విశ్రాంతి తీసుకోండి... అంటూ పడకగదికి తీసుకెళ్ళారు. అచ్చటి దుప్పటి తను కప్పుకునే దుప్పటి లాగ పలచటిది... కునుకుతీసి లేచేటప్పటికి రాగిచెంబులో నీరిచ్చారు తాగడానికి...*

*బయలుదేరేముందు ఇక అడగకుండా ఉండలేకపోయేరు శర్మగారు... " నేను ఏం తింటాను... ఎలా తాగుతాను... నా ఆరోగ్యానికి ఏది మంచిది... ఇవన్నీ మీకెలాతెలుసు?' అని.*

*అమ్మాయి అత్త గారు ఇలా అంది...*

*'నిన్నరాత్రి మీఅమ్మాయిఫోన్ చేసి మీగురించి అన్నీ చెప్పింది... మా నాన్నగారు మొహమాట పడతారు... వారి గురించి మీరే శ్రధ్ధ తీసుకోవాలనికోరింది.'*

*శర్మగారి కళ్ళల్లో నీరు తిరిగాయి ...*

*శర్మగారు ఇంటికి రావడంతోనే భార్యను పిలిచి ఇలా అన్నారు...*

*'లక్ష్మీ..! మా అమ్మ చనిపోలేదు.'*

*'ఏవిటండీ మీరు మాటాడుతున్నది'*

*'అవును లక్ష్మీ ... నన్ను కంటికి రెప్పలా చూసుకొనే నా తల్లి బతికేఉంది... నాకూతురు రూపంలో' అని జరిగిందంతా పూసగుచ్చినట్లు చెప్పారు శర్మగారు కన్నీరు నిండిన కళ్ళతో.*

*అమ్మాయి 'ఆడ'పిల్ల అనుకొంటాము, మన ఇల్లు వదిలి పోతుందని.*

*తను ఎక్కడికీ పోదు...*

*తల్లిదండ్రుల హృదయాలలోనే ఉంటుంది. తన మనస్సులో తనవారి జ్ఞాపకాలను నింపుకుని.*