ॐ శ్రీమద్వాల్మీకి రామాయణం - ప్రస్తుత విద్యావిషయాలకి ఆదర్శం
( ప్రభుత్వ డిగ్రీ కళాశాల భద్రాచలం - 2007లో "రామాయణం"పై నిర్వహించిన సదస్సులో సమర్పించిన,
"శ్రీమద్వాల్మీకి రామాయణం - ప్రస్తుత విద్యావిషయాలకి ఆదర్శం"
అనే పత్రంలోని ఒక అంశం)
-----------------------
6. గణితం - సంఖ్యాశాస్త్రం
మానవజీవితంలో గణన అనేది అతి ముఖ్యమైనది. గణితం అనేది ఒక శాస్త్రంగా అందఱికీ తెలిసిన విషయమే కదా!
ద్రవ్యరాశి, పొడుగు, కాలాలకి సంబంధించి వివిధ మానాలని మనం ఉపయోగిస్తూ ఉంటాం. వీటన్నిటికీ మౌలికంగా అంకెలు ప్రధానమైనవి.
ఏవి గణించాలన్నా అవుసరమయ్యేవి సున్న నుంచి తొమ్మిది వరకు గల అంకెలు.
ఆ సంఖ్యలకి సంబంధించి
- లక్షలు - కోట్లు అని ఒక విధంగా లెక్కపెడితే,
- మిలియన్లు - బిలియన్లు - ట్రిలియన్లు అనే మరొక పద్ధతిలో మరొక విధంగా లెక్కపెడతాము.
శ్రీమద్వాల్మీకి రామాయణంలో వివిధ దేశాలలో వివిధ సంఖ్యామానాలు, దీనికి దాదాపు భంగం కలుగకుండా కనిపిస్తాయి.
సుగ్రీవుడు చెప్పిన లెక్కింపు
సుగ్రీవుడు తన వద్దకు చేరుకునే వానరుల సంఖ్య శ్రీరామునికి వివరించాడు.
దానిలో
- వందమంది
- లక్ష
- కోటి
- అయుతము
- శంకువు
- అర్బుదము
- నూరు అర్బుదములు
- మధ్య
- అంతము అనే సంఖ్యలతో లెక్కపెట్టేంతమంది వానరులు నాయకులతో దారిలో వస్తున్నారని తెలిపాడు.
సముద్ర
- పరార్థ సంఖ్యలలోఉన్న వానరులు తనవద్దకు చేరుకుంటున్నారని చెప్పాడు.
లంకలో
రావణుని గూఢచారులైన శుకసారణులు, ఇదే వానర సైన్యాన్ని చూసి, రావణునికి వివరించారు.
లక్ష కోట్లు ఒక శంఖము అనీ,
లక్ష శంఖములు ఒక మహా శంఖమనీ,
లక్ష మహా శంఖములు ఒక బృందమనీ,
లక్ష బృందముల ఒక మహా బృందమనీ,
లక్ష మహా బృందములు ఒక పద్మమనీ,
లక్ష పద్మములు ఒక మహా పద్మమనీ,
లక్ష మహా పద్మములు ఒక ఖర్వమనీ,
లక్ష ఖర్వములు ఒక మహా ఖర్వమనీ,
లక్ష మహా ఖర్వములు ఒక సముద్రమనీ,
లక్ష సముద్రములు ఒక ఓఘమనీ,
లక్ష ఓఘములు ఒక మహౌఘమనీ వివరిస్తూ లెక్క చెప్పారు.
ఈ విధంగా సుగ్రీవ సైన్యాన్ని వారి మానంలోకి మార్చి రావణునికి తెలిపారు.
జ్యోతిష్య శాస్త్రంలో ఏకం దశ శతంత్వస్మాత్ సహస్రమ్ .... అని తెలిపిన విధంగా ఒకటి నుంచి పరార్థము అనేవి సంఖ్యలుగా ఒకదానికన్న దాని తరువాతది పదిరెట్లు ఉండే విధంగా పేర్లు చెప్పబడ్డాయి.
వివిధ దేశాలలో వివిధ సంఖ్యామానాలు మౌలికంగా ఉండి, పరివర్తనకి వీలైనవిగా ఉండడం ఆదర్శం కదా!
=x=x=x=
— రామాయణం శర్మ
భద్రాచలం
కామెంట్‌లు లేవు:
కామెంట్‌ను పోస్ట్ చేయండి