సుప్రభాతం

 శుభోదయం🙏

శుభోదయం🙏

-----సుప్రభాతం------

భీష్మస్తుతి-రూపచిత్రణము

మ: త్రిజగ న్మోహన నీలకాంతి తనువుద్దీపింపఁ బ్రాభాత నీ

రజ బంధుప్రభమైన చేలము పయిన్ రంజిల్ల నీలాలక

వ్రజసంయుక్త ముఖారవింద మతిసేవ్యంబై విజృభింప మా

విజయుం జేరెడు వన్నెలాఁడు మది నావేశించు నెల్లప్పుడున్.

భాగవతం- ప్రథమ స్కంథం- 217 పద్యము. బమ్మెఱపోతన మహాకవి!

ఆంధ్ర సాహిత్య క్షేత్రమును సుసంపన్న మొనరించిన కవులలో నొక్కొక్కరి దొక్కొక్క మార్గము. పోతన గారిది యద్భుతమైన రూప చిత్రణామార్గము. తాను వర్ణించు పాత్రను పాఠకుల కట్టెదుట నిలుపుట పోతన ప్రత్యేకత..

భీష్మ స్తుతిలోని యీపద్యము అతని రూప చిత్రణకు చక్కని యుదాహరణము.

ముల్లోకాలనూ పరవశింపఁ జేసే నల్లని మేనికాంతితో నొప్పారుచు. ప్రభాత కాలమున సంధ్యాకాంతుల నుపమించు బంగరు వస్త్రమును ధరించి. నల్లని ముంగురులతోనొప్పు ముఖారవిందము చూపరులకు విందుచేయ ,మాయర్జునుని సమీపమున దిరుగాడు సొగసుగాడగు కృష్ణుడు నామదిలో నెల్లవేళలా నిలచియుండు గాక !

యని పద్యభావము!

విశేషాంశములు : కృషణుడు నల్లనివాడే,! కానీ ఆనీలమేఘశరీరకాంతి ముల్లోకాలనూ పరవశింపజేసేదట.! ఆపరవశంలో

భీష్ముడుగూడా భాగస్వామియేగదా! కృష్ణుని దర్శించినవారందరూ ఆరూప వీక్షణంతో పరవశులౌతారని భావం. చేలము నీరజబంధుప్రభమైనది. బంగరు చేలము; దానికాంతులు బాలసూర్యకాంతులతో సమానము.సూర్యుడు లోకబాంధవుడు. కృష్ణుడు

సకల విశ్వబాంధవుడని సూచన చేయుట.

ముఖమా అరవింద సమానము. అదియు నీలాలక యుక్తము. అలకలనగా ముంగురులు. అవి కొదమతుమ్మెదల గుంపులనుబోలి ముఖారవిందమునకు మరింత యందమును కలిగించుచున్నవని భావము. ఆయన వన్నెలాడట! ఎన్నివేషములో !

యెన్నిషోకులో! చెప్పతరముగానివాడని సూచన!

ఆయన చేరునది విజయుని కడకు. అనగా కృష్ణుని పయనము విజయము వైపునకే యనిసూచన!

ఇంతటి మనోభావనతో పోతనగారు భాగవతంలో యీపద్యాన్ని చిత్రించారు.

స్వస్తి!🙏🙏🌷🌷🌷🌷🌷🌷🌷🌷🌷🌷🌷🌷🌷🌷🌷🌷🌷🌷🌷🌾