శ్రీలలితా సహస్రనామ భాష్యము*

 *శ్రీమాత్రేనమః*

*శ్రీలలితా సహస్రనామ భాష్యము*

*384వ నామ మంత్రము* 13.8.2021

*ఓం విశ్వసాక్షిణ్యై నమః*

సకల జగత్తుకును తానే సాక్షిగా విరాజిల్లు పరమేశ్వరికి నమస్కారము.

శ్రీలలితా సహస్ర నామావళి యందలి *విశ్వసాక్షిణీ* యను ఐదక్షరముల (పంచాక్షరీ) నామ మంత్రమును *ఓం విశ్వసాక్షిణ్యై నమః* అని ఉచ్చరించుచూ, ఆ జగన్మాతను అత్యంత భక్తి శ్రద్ధలతో ఆరాధించు భక్తులకు ఆ తల్లి సర్వశుభములు సంప్రాప్తింపజేయును మరియు అభీష్ట సిద్ధిని అనుగ్రహించును.

పరమేశ్వరి పంచభూతాత్మిక. పంచభూతముల ద్వారా సమస్త జీవకోటియొక్క కర్మలకు సాక్షీభూతురాలిగా ఉన్నది.. ఆ తల్లి నేత్రములు ఒకటి సూర్యుడు. మరియొక నేత్రము చంద్రుడు. ఫాలనేత్రము అగ్ని. సూర్యచంద్రాగ్నులద్వారా జగత్తునంతటినీ పరిశీలిస్తూ, విశ్వమందలి జీవుల దినచర్యలకు సాక్షిగా ఉన్నది. గనుకనే అమ్మవారు *విశ్వసాక్షిణీ* యని అనబడినది. నిరంతరము అంతర్యాగ నిమగ్నుడైన సాధకుడు, విశ్వసాక్షిగా నిలచిన పరమేశ్వరి వీక్షణముతో ఆత్మజ్ఞానము పొందును. పంచభూతములలోను, అష్టదిక్కులయందును, సూర్యచంద్రాగ్నులలోను - విశ్వమంతయు తానుగా, కోటానుకోట్ల నేత్రములతో అనుక్షణము ప్రవర్తిల్లే పరమేశ్వరి జీవులకర్మలకు సాక్షీభూతమై నిలుస్తున్నది గనుకనే అమ్మవారు *విశ్వసాక్షిణీ* యని అనబడినది. ఆ తల్లి మూడు నేత్రములు సూర్యచంద్రాగ్నులు మాత్రమే కాదు. భూతభవిష్యద్వర్తమానములు అనెడి మూడుకాలమములు కూడా. ఆ తల్లి ఎల్లవేళలా అనంతకోటి జీవరాశుల దినచర్యలకు సాక్షీభూతము గనుకనే *విశ్వసాక్షిణీ* యని అనబడినది. 

జగన్మాతకు నమస్కరించునపుడు *ఓం విశ్వసాక్షిణ్యై నమః* అని యనవలెను.

🌹🌹🌹🌹🌹🌹🌹🌹🌹🌹🌹🌹

మహాగణపతి, బాల, శక్తిపంచాక్షరీ, పంచదశీ మంత్రోపదేశము, ఆంగ్లభాషలో అనర్గళ వాక్పటిమ ప్రదాతలు, నా జీవన వృత్తికి, ప్రవృత్తికి మార్గదర్శకులైన, కుర్తాళం మౌనస్వామి వారి ప్రియశిష్యులు, నాతొలిగురువర్యులు, కీ.శే కొండాకోటయ్య మహనీయుల అనుగ్రహముతోను, ఎనిమిది నెలలు(1977లో) తన పాదసేవాభాగ్యంతో నన్ను పునీతులను చేసిన జిల్లెళ్ళమూడి అమ్మ అనుగ్రహముతోను భాస్కరరాయలు వారి సౌభాగ్యభాస్కరము, మరియు కొందరు ఆధ్యాత్మికవేత్తల వ్యాఖ్యానముల పరిశీలనతోను అక్కడక్కడ భాస్కరరాయలు వారి శ్లోకములు మరియు ఆది శంకరాచార్యుల సౌందర్యలహరి శ్లోకములు తీసుకుంటూ, నా స్వీయ వివరణతో ఈ వ్యాఖ్యాన పుష్పాన్ని జగజ్జనని ఇచ్చిన ప్రసాదంగా భావిస్తూ అందరికీ పంచుతున్నాను. ఇచ్చిన పేరాలు, శ్లోకాలు జగజ్జనని ప్రసాదపుష్పంగా భావిస్తున్నాను. ఇందులో వ్యాఖ్యాన పంక్తులు గాని, శ్లోకాలు మొదలైనవన్నియు అమ్మవారి నుండి లభించిన ప్రసాద పుష్పము యొక్క దళములుగా భావించుచున్నాను. అట్టి పుష్పమునుండి ఏమి తొలగించిననూ ఆయా దళములు త్రుంచిన దోషమవుతుంది. జగన్మాత భక్తులయిన వారు యథాతథముగా ఎంతమందికి ఈ పుష్పాన్ని పంపిననూ సంతోషమే.

🌹🌹🌹🌹🌹🌹🌹🌹🌹🌹🌹🌹

 *పసుమర్తి వేంకట దుర్గా సుబ్రహ్మణ్యం* 7702090319, 9505813235

🌹🌹🌹🌹🌹🌹🌹🌹🌹🌹🌹🌹

మీకు, మీకుటుంబ సభ్యులకు శుభోదయ శుభాభి వందనములు🌹🌹🌹🌹🌹🌻🌻🌻🌻🌸🌸🌸🌸💐💐💐