*శ్రీమాత్రేనమః*
*శ్రీలలితా సహస్రనామ భాష్యము*
*419వ నామ మంత్రము* 27.9.2021
*ఓం జడాత్మికాయై నమః*
నామరూపాత్మక జగత్తే తన స్వరూపమై అలరారే పరమేశ్వరికి నమస్కారము.
శ్రీలలితా సహస్ర నామావళి యందలి *జడాత్మికా* యను నాలుగక్షరముల (చతురక్షరీ) నామ మంత్రమును *ఓం జడాత్మికాయై నమః* అని ఉచ్చరించుచూ, ఆ జగన్మాతను భక్తిశ్రద్ధలతో ఆరాధించు భక్తజనులను ఆ తల్లి వారిని భౌతికముగా సిరిసంపదలతోను, శాంతిసౌఖ్యములతోను జీవనము కొనసాగింపజేయును. మరియు పరమపదసోపానములకు మార్గము సుగమము చేయును.
జగన్మాత నామరూపాత్మకమైన ఈ దృశ్యజగత్తంతయును తనస్వరూపమై, తనను ఆరాధించు భక్తజనుల మనోనేత్రములందు సుస్ఫష్టముగా గోచరించుచూ, తన మందస్మితవదనారవిందమునుండి కరుణాకటాక్షవీక్షణములను ప్రసరింపజేయును. ఈ నామరూపాత్మకమైన జగత్తునందలి వస్తుసముదాయమంతయునూ (పదార్థములన్నియునూ) తన ఆత్మగా అలరారుచూ *జడాత్మికా* యని అనబడుచున్నది. చిచ్ఛక్తిః చేతనారూపా (చైతన్యమే తన స్వరూపము) ఎలా అయినదో, జడశక్తిః జడాత్మికగా (జడశక్తియే తనస్వరూపమై) తేజరిల్లుచున్నది. నామరూపాత్మకమైన జగత్తుకు చేతనాచేతనములు (చైతన్య శక్తి, జడశక్తులు) రెండునూ అవసరమే. అప్పుడు ఆ సృష్టి పరిపూర్ణమైన సృష్టియని అనిపించుకుంటుంది. ఈ సంగతి పరమేశ్వరికి తెలియును గనుకనే ఆ తల్లి చేతనా రూపిణిగాను, జడాత్మికగాను అలరారుచున్నది. వ్యక్తము, అవ్యక్తము ఏవిధముగా తనస్వరూపములయినవో, చేతనాచేతన రూపములుకూడా తనవే అయినవి. గనుకనే ఈ నామ మంత్రములో ఆ పరమేశ్వరి *జడాత్మికా* యని అనబడుచున్నది. అమ్మ సచ్చిదానంద స్వరూపిణి. అది పరబ్రహ్మతత్త్వము. అటువంటి జగన్మాతకు నమస్కరించునపుడు *ఓం జడాత్మికాయై నమః* అని యనవలెను.
🌹🌹🌹🌹🌹🌹🌹🌹🌹🌹🌹🌹
మహాగణపతి, బాల, శక్తిపంచాక్షరీ, పంచదశీ మంత్రోపదేశము, ఆంగ్లభాషలో అనర్గళ వాక్పటిమ ప్రదాతలు, నా జీవన వృత్తికి, ప్రవృత్తికి మార్గదర్శకులైన, కుర్తాళం మౌనస్వామి వారి ప్రియశిష్యులు, నాతొలిగురువర్యులు, కీ.శే కొండాకోటయ్య మహనీయుల అనుగ్రహముతోను, ఎనిమిది నెలలు(1977లో) తన పాదసేవాభాగ్యంతో నన్ను పునీతులను చేసిన జిల్లెళ్ళమూడి అమ్మ అనుగ్రహముతోను భాస్కరరాయలు వారి సౌభాగ్యభాస్కరము, మరియు కొందరు ఆధ్యాత్మికవేత్తల వ్యాఖ్యానముల పరిశీలనతోను అక్కడక్కడ భాస్కరరాయలు వారి శ్లోకములు మరియు ఆది శంకరాచార్యుల సౌందర్యలహరి శ్లోకములు తీసుకుంటూ, నా స్వీయ వివరణతో ఈ వ్యాఖ్యాన పుష్పాన్ని జగజ్జనని ఇచ్చిన ప్రసాదంగా భావిస్తూ అందరికీ పంచుతున్నాను. ఇచ్చిన పేరాలు, శ్లోకాలు జగజ్జనని ప్రసాదపుష్పంగా భావిస్తున్నాను. ఇందులో వ్యాఖ్యాన పంక్తులు గాని, శ్లోకాలు మొదలైనవన్నియు అమ్మవారి నుండి లభించిన ప్రసాద పుష్పము యొక్క దళములుగా భావించుచున్నాను. అట్టి పుష్పమునుండి ఏమి తొలగించిననూ ఆయా దళములు త్రుంచిన దోషమవుతుంది. జగన్మాత భక్తులయిన వారు యథాతథముగా ఎంతమందికి ఈ పుష్పాన్ని పంపిననూ సంతోషమే.
🌹🌹🌹🌹🌹🌹🌹🌹🌹🌹🌹🌹
*పసుమర్తి వేంకట దుర్గా సుబ్రహ్మణ్యం* 7702090319, 9505813235
🌹🌹🌹🌹🌹🌹🌹🌹🌹🌹🌹🌹
మీకు, మీకుటుంబ సభ్యులకు శుభోదయ శుభాభి వందనములు🌹🌹🌹🌹🌹🌻🌻🌻🌻🌸🌸🌸🌸💐💐💐
కామెంట్‌లు లేవు:
కామెంట్‌ను పోస్ట్ చేయండి