రమణీయములైన చంద్రకాంతులు,

 శ్రీరామ (113)

                             శుభోదయం.

🙏 శ్రీరామ జయరామ జయజయరామ 🙏 సర్వే జనాః సుఖినో భవన్తు 🙏

రమణీయములైన చంద్రకాంతులు,

మనోహరమైన పచ్చికబయళ్లతోకూడిన వనములలో విహారములు,

మొదలైన వన్నీ తాత్కాలికములే.

వాటివల్ల వచ్చే ఆనందం కూడా క్షణికమే, శాశ్వతం కాదు.

 ఆ ఆనందం జనన, మరణములను తప్పించలేదు అని గ్రహించడం విషయ వైముఖ్యానికి దారి తీస్తుంది, అన్న భర్తృహరి బోధను ఇంతకు ముందు చెప్పుకున్నాము.

శ్రీ భర్తృహరి మహాయోగి ఇంకా ఇలా అంటున్నారు.

శ్లో //రమ్యం హర్మ్యతలం న కిం వసతయే శ్రావ్యం న గేయాదికం/

కింవా ప్రాణసమా సమాగత సుఖం నైవాధిక ప్రీతయే/

కింతు భ్రాన్త పతంగ పక్ష పవన వ్యాలోల దీపాంకుర/

చ్ఛాయా చంచల మాకలయ్య సకలం సన్తో వనాన్తం గతాః//

(సకల సదుపాయములతో కూడిన విలాస భవనములలో (ఇప్పటి ఫైవ్ స్టార్ హోటళ్లు) నివాసం ఎంతో ఆనందాన్ని ఇస్తుంది.

శ్రవణానందకరమైన సంగీతం మనస్సును పరవశంచేసి అద్భుతమైన ఆహ్లాదాన్ని ఇస్తుంది.

ప్రాణసమానురాలైన ప్రియురాలి సాంగత్యం ఎక్కడలేని ప్రీతిని కలిగిస్తుంది.

ఇవన్నీ ఆనందాన్ని ఇచ్చేవే.

కానీ ఇవన్నీ తాత్కాలికంగా మాత్రమే ఆనందాన్ని ఇస్తాయి.

ఇవేవీ వార్ధక్యాన్ని, జనన, మరణములను తప్పించలేవు.

దీపం చుట్టూ తిరిగే మిడత యొక్క రెక్కల గాలిచేత, కదులుతున్న దీపకాంతి, ఎంత చంచలమో ఈ భోగాలన్నీ అంత చంచలములు.

ఈ విషయం గ్రహించిన మహనీయులు శాశ్వతమైన ఆనందం (మోక్షం) పొందుట కొరకు, సాధన చేసే ఉద్దేశంతో విజనప్రదేశములకు వెళ్తున్నారు).

మానవ జన్మ వచ్చింది శాశ్వతానందం సాధించడానికి గాని, క్షణికానందాల వెంట పరుగులు తీసి సంసారంలో పరిభ్రమించడానికి కాదని భర్తృహరి బోధల సారాంశం.

 

శుభమస్తు.

తూములూరి మధుసూదనరావు.

16-3-'26