వ్యాసభగవానుడు

 Srimadhandhra Bhagavatham -- 1 by Pujya Guruvulu "Pravachana Chakravarthy" , "Vachaspathy" Brahmasri Chaganti Koteswara Rao Garu

వ్యాసభగవానుడు ఈ దేశమునకు చేసిన సేవ సామాన్యమయినది కాదు. ఆయన మహోత్కృష్టమయిన సేవ చేశారు. చేసి అంతటితో ఊరుకోలేదు. అల్పాయుర్దాయం కలిగి అనారోగ్యంతో ఉంటూ బుద్ధి ఎప్పుడూ కూడా అర్ధకామములయందు మాత్రమే తగిలి ఉండే సామాన్య జనులు కలియుగంలో వేదములను నాలుగింటిని చదవడం దుస్సాధ్యమనే బుద్ధిచేత వ్యాసభగవానుడు వేదరాశిని నాలుగుగా విభాగం చేశారు. ఆయన వేదరాశినంతటినీ ఋగ్వేదము, యజుర్వేదము, సామవేదము, అధర్వణవేదము అని నాలుగు భాగములుగా విభాగం చేశారు.

వేదంలో పూర్వభాగం అంతా మనం ఆచరించవలసిన విధి విదానములను గురించి, మనం ఆచరించిన విధివిధానముల వలన మనం పొందే ఇహలౌకిక పారలౌకిక సౌఖ్యములను గూర్చి వివరిస్తుంది. ఉత్తరభాగం అంతాకూడా మళ్ళీ మనం ఒక అమ్మ కడుపులో ప్రవేశించవలసిన అవసరం లేకుండా ఇదే తుట్టతుద జన్మ చేసుకోవడం కోసమని ఏ జ్ఞాన సముపార్జన చేయడం చేత మనకు కైవల్యం లభిస్తుందో దానిని గురించి తెలియజేస్తుంది. ‘జ్ఞానాత్ కేవల కైవల్యం’ జ్ఞానం చేత మాత్రమే కైవల్యం లభిస్తుంది.

పునరావృత్తిరహిత శాశ్వత శివసాయుజ్య సిద్ధి కొరకు ఏ జ్ఞానమును మనం పొందాలో అటువంటి జ్ఞానమును వేదము ఉత్తరభాగం ప్రతిపాదన చేస్తుంది. ఆయన తన శిష్యుడయిన జైమినిచేత వేదమునకు పూర్వభాగమయిన కర్మకు సంబంధించిన, విషయములన్నిటికి వ్యాఖ్యానం చేయించారు. దానిని ‘పూర్వమీమాంస’ అంటారు. ఉత్తరభాగమంతా జ్ఞానమునకు సంబంధించినది. వ్యాసమహర్షియే స్వయంగా బ్రహ్మసూత్రములను రచించారు. ఈ బ్రహ్మసూత్రములనే ‘ఉత్తరమీమాంస’ అని కూడా అంటారు. మరల ఆయన పదునెనిమిది పురాణములను రచించారు. పురాణములను రచించడం అంటే తేలికయిన పనికాదు.

‘సర్గశ్చ ప్రతిసర్గశ్చ వంశో మన్వంతరాణి చ!

వంశానుచరితంచైవ పురాణం పంచలక్షణం!!

పురాణమునకు ఐదు లక్షణములు ఉండాలి. సర్గ, ప్రతిసర్గ అని విభాగం ఉండాలి. గొప్పగొప్ప వంశములను గురించి ప్రస్తావన చేయాలి. అనేక మన్వంతరములలో జరిగిన విశేషములను చెప్పాలి. అది భగవత్సంబంధముగా దానిని ప్రతిపాదన చేయకలిగిన శక్తి ఉండాలి. అటువంటి వాడు తప్ప పురాణమును చెప్పలేదు. అటువంటి పురాణములను రచించిన మహానుభావుడు వేదవ్యాసుడు. మనకి జ్ఞాపకం ఉండడము కోసమని తేలిక సూత్రమునొక దానిని పెద్దలు ప్రతిపాదించారు.

‘మ’ద్వయం ‘భ’ద్వయం చైవ ‘బ్ర’త్రయం ‘వ’చతుష్టయం!

‘అ’ ‘నా’ ‘ప’ ‘లిం’ ‘గ’ ‘కూ’ స్కా’ని పురాణాని పృథక్ పృథక్!! (దేవీభాగవతం 1-3-21)

మద్వయం – మకారముతో రెండు పురాణములు ప్రారంభము అవుతాయి. అందులో ఒకటి మార్కండేయ పురాణము, రెండవది మత్స్య పురాణము.

భద్వయం – భ తో రెండు పురాణములు ప్రారంభమవుతాయి. అవి భాగవత పురాణము, భవిష్య పురాణము.

బ్రత్రయం – బ్ర’ తో మూడు పురాణములు ప్రారంభమవుతాయి. అవి బ్రహ్మ పురాణము, బ్రహ్మాండ పురాణము, బ్రహ్మవైవర్త పురాణము.

వచతుష్టయం – ‘వ’కారంతో నాలుగు పురాణములు ప్రారంభమవుతాయి. అవి వరాహపురాణము, విష్ణు పురాణము, వామన పురాణము, వాయు పురాణము.

అనాపలింగకూస్కాని – అన్నప్పుడు ఒక్కొక్క అక్షరమునకు ఒక్కొక్క పురాణము వస్తుంది.

అ – అగ్నిపురాణం, నా – నారద పురాణం, ప – పద్మ పురాణం, లిం – లింగపురాణం, గ – గరుడ పురాణం, కూ – కూర్మపురాణం, స్కా – స్కాందపురాణం.

వ్యాసభగవానులు వేదములను విభాగం చేసినప్పుడు ఒక్కొక్క వేదమును ఒక్కక్క శిష్యుడికి అప్పచెప్పారు. వ్యాసుడు చేసిన సేవ అంతా ఇంతా కాదు.

https://www.facebook.com/SriChagantiGuruvuGaariFollowersUnofficialPage

instagram.com/pravachana_chakravarthy

గణేషుడిని 21 రకాల ఆకులతో ఎందుకు పూజిస్తారు ?

 🌸🫐🌸🫐🌸🫐🌸🫐🌸

_*వినాయక చవితి రోజున , గణేషుడిని 21 రకాల ఆకులతో ఎందుకు పూజిస్తారు ?*

వినాయక చవితి పూజలో కూడా ఎంతో వైద్య రహస్యాలున్నాయి. నిజానికి వినాయక చవితి పూజ అనేది సమాజాన్ని మేల్కొలిపి , అందరూ ఒక్కటిగా ఉంటే కలిగే లాభాలేమిటో చెప్పడానికై ఏర్పడిందని చెప్పవచ్చు. మరి 'మతం' అంటే 'మానవత్వా'న్ని పెంచేదే కదా ! మత విశ్వాసాల పేరున కొన్ని మంచిపనులు చేయవచ్చని చెప్పడమే వినాయక చవితి పూజా విధి. వినాయకుని ప్రతిమను రూపొందించడానికి కేవలం 'కొత్త'మట్టినే ఎంచుకోవాలి. దానికి 21 పత్రాలతో పూజచేయాలి. గణపతిని నవరాత్రులు పూజించాక జలంలో నిమజ్జనం చేయాలి. ఇదీ పద్ధతి.

21 రకాల పత్రులు అనేవి సాధారణమైన ఆకులు కావు. ఇవన్నీ మహాత్కృష్టమైన , శక్తివంతమైన ఔషధులు. వాటితో పూజ చేయడంవల్ల కొత్త మట్టితో చేసిన ప్రతిమతో కలిసి వీచే గాలి మనలో ఉండే అనారోగ్యాలని హరించేస్తుంది. . 9 రోజుల పూజ తర్వాత నిమజ్జనం ఎందుకు చేయాలీ అని సందేహం రావచ్చు. చెరువులు , బావులు , నదులు - వీటిలో వర్షాలవల్ల నీరు కలుషితం కావడం సర్వసాధారణం. వీటిని శుభ్రం చేయడానికి 21 పత్రాలతో చేసిన పత్రియే సమాధానం. అందుకే 9 రోజుల పూజ తర్వాత ఆ పత్రితోబాటు మట్టి విగ్రహాన్ని కూడా నదుల్లో , చెరువుల్లో , బావుల్లో నిమజ్జనం చేయడం , అలా నీటిలో కలిపిన మట్టి , 21 రకాల పత్రి కలిసి 23 గంటలయ్యాక తమలో ఉన్న ఔషధీయుత గుణాల ఆల్కలాయిడ్స్‌ని ఆ జలంలోకి వదిలేస్తాయి. అవి బాక్టీరియాను నిర్మూలించి , జలాల్లో ఆక్సిజన్ శాతాన్ని పెంచుతాయి. ఇదీ వినాయక నిమజ్జనం వెనక ఉండే *'పర్యావరణ పరిరక్షణ'* రహస్యం.

వినాయకునికి చేసే ఏకవింశతి పత్ర (21 ఆకుల) పూజ చాలా విశిష్టమైంది. ఈ 21 పత్రాలు వివిధ గ్రంథాల్లో ప్రస్తావించారు. వినాయకుని పూజలో వాడే 21 పత్రాలు చాలా విశిష్టమైనవి కూడా. వినాయక చవితి నాడు చేసే పూజలో పత్రాలు ప్రధానమైనవి. విఘ్నేశ్వరుని 21 రకాల ఆకులతో పూజించడం ఆనవాయితీ. అయితే ఈ 21 ఆకుల పేర్లేంటని తెలుసుకోవాలంటే ఈ కథనం చదవండి.

*మాచీ పత్రం:*

మాచ పత్రి అనేది తెలుగు పేరు. చేమంతి జాతికి చెందిన దీని ఆకులు సువాసనా భరితంగా ఉంటాయి. చేమంతి ఆకుల మాదిరే ఉంటాయి.

*బృహతీ పత్రం:*

దీనిని ములక అంటారు. దీనిలో చిన్న ములక , పెద్ద ములక అని రెండు రకాలున్నాయి. పత్రాలు వంగ ఆకులు మాదిరి. తెల్లని చారలుండే గుండ్రని పండ్లతో వుంటాయి.

*బిల్వ పత్రం:*

బిల్వ పత్రం అంటే మారేడు ఆకు. మూడు ఆకులుగా , ఒక ఆకుగా ఉంటాయి. ఇవి శివునికి చాలా ఇష్టం. శ్రీ మహాలక్ష్మీదేవికి కూడ ఇష్టమైందిగా చెపుతారు.

*దూర్వా పత్రం:*

దూర్వా పత్రం అంటే గరిక. తెల్ల గరిక , నల్ల గరిక అని రెండు రకాలుంటాయి. గడ్డిజాతి మొక్కలు విఘ్నేశ్వరునికి అత్యంత ప్రీతికరమైనవి.

*దుత్తూర పత్రం:*

దుత్తూర పత్రం అంటే ఉమ్మెత్త. ఇది వంకాయ జాతికి చెందింది. ముళ్ళతో కాయలు వంకాయ రంగు పూలు వుంటాయి.

*బదరీ పత్రం:*

బదరీ పత్రం అంటే రేగు. దీనిలో రేగు , జిట్రేగు , గంగరేగు అని మూడు రకాలు ఉంటాయి.

*అపామార్గ పత్రం:*

తెలుగులో దీనిని ఉత్తరేణి అంటారు. దీని ఆకులు గుండ్రంగా వుంటాయి. గింజలు , ముళ్ళు కలిగి వుండి కాళ్ళకు గుచ్చుకుంటాయి.

*తులసీ పత్రం:*

హిందువులకు తులసి గురించి ప్రత్యేకంగా చెప్పాల్సిన పనిలేదు. తులసీ పత్రాలను దేవతార్చనలో వాడతారు.

*చూత పత్రం:*

చూత పత్రం అంటే మామిడి ఆకు. ఈ ఆకుకు శుభకార్యాల్లో విశిష్ట స్థానం ఉంది. మామిడి తోరణం లేని హైందవ గృహం పండుగ రోజులలో కనిపించదు.

*కరవీర పత్రం:*

దీనినే గన్నేరు అంటారు. తెలుపు , పసుపు , ఎరుపు రంగుల పూలుంటాయి. పూజలో ఈ పూలకు విశిష్ట స్థానం ఉంది.

*విష్ణుక్రాంత పత్రం:*

ఇది నీలం , తెలుపు పువ్వులుండే చిన్న మొక్క. నీలి పువ్వులుండే రకాన్ని విష్ణుక్రాంత అంటారు.

*దాడిమీ పత్రం:*

దాడిమీ అంటె దానిమ్మ ఆకు. శక్తి స్వరూపిణి అంబకు దాడిమీఫల నైవేద్యం ఎంతో ఇష్టం.

*దేవదారు పత్రం:*

దేవతలకు అత్యంత ఇష్టమైన ఆకు దేవదారు. ఇది చాలా ఎత్తుగా పెరుగుతుంది. ఈ మానుతో చెక్కిన విగ్రహాలకు సహజత్వం ఉంటుంది.

*మరువక పత్రం:*

దీనిని మరువం అని కూడా అంటారు. దీన్ని వాడుక భాషలో ధవనం , మరువం అంటారు. ఆకులు ఎండినా మంచి సువాసన వెదజల్లుతుండటం ఈ పత్రం ప్రత్యేకత.

*సింధువార పత్రం:*

సింధువార పత్రాన్నే వాడుకలో వావిలి అనికూడ పిలుస్తుంటారు.

*జాజి పత్రం:*

ఇది సన్నజాజి అనే మల్లిజాతి మొక్క. వీటి పువ్వుల నుంచి సుగంధ తైలం తీస్తారు.

*గండలీ పత్రం:*

దీనినే లతాదూర్వా అనికూడా అంటారు. భూమిపైన తీగమాదిరి పాకి కణుపులలో గడ్డిమాదిరి పెరుగుతుంది.

*శమీ పత్రం:*

జమ్మిచెట్టు ఆకులనే శమీ పత్రం అంటారు. దసరా రోజుల్లో ఈ చెట్టుకు ప్రత్యేక పూజలు నిర్వహిస్తారు.

*అశ్వత్థ పత్రం:*

రావి ఆకులనే అశ్వత్థ పత్ర మంటారు. రావి చెట్టుకు పూజలు చేయటం మనసంప్రదాయం.

*అర్జున పత్రం:*

మద్దిచెట్టు ఆకులనే అర్జున పత్రమంటారు. ఇవి మర్రి ఆకుల్ని పోలి వుంటాయి. అడవులలో పెరిగే పెద్ద వృక్షం ఇది.

*అర్క పత్రం:*

జిల్లేడు ఆకులను అర్క పత్రమంటారు. తెల్లజిల్లేడు పేరుతో తయారుచేసిన వినాయకప్రతిమను పూజించడం వల్ల విశేష ఫలం వుంటుందంటారు. ఈ 21 పత్రాలతో వినాయక చవితి రోజున పూజించే వారికి సకల సంపదలు , అష్టైశ్వర్యాలు , కార్యసిద్ధి చేకూరుతుందని పండితులు అంటున్నారు.

🌸🫐🌸🫐🌸🫐🌸🫐🌸

పాలవెల్లి

 🙏పాలవెల్లి ఎందుకు కడతారు 🙏

వినాయక చవితి రోజున పాలవెల్లి ఎందుకు కడతారో మనలో చాలా మందికి తెలియదు...మన పెద్దలు కట్టారని మనమూ కడుతున్నాం... వాళ్ళు ఎందుకు కట్టారో, వారిని మనం ఎందుకు అనుకరిస్తున్నామో తెలుసుకుందాం.

వినాయక చవితి రోజున సాగే ప్రతి ఆచారమూ ఇతర పండుగలకి భిన్నంగానే సాగుతుంది. వాటిలో పాలవెల్లిని కట్టడం కూడా ఒకటి. పాలవెల్లి లేకపోతే గణేశుని పూజకి ఏదో లోటుగానే కనిపిస్తుంది. 

ఇంతకీ పాలవెల్లిని ఎందుకు కడతారంటే...అందుకు ఒకటేంటి చాలా కారణాలే కనిపిస్తాయి.

ఈ అనంత విశ్వంలో భూమి అణువంతే! ఆ భూమి మీద నిలబడి పైకి చూస్తే సూర్యుడిని తలదన్నే నక్షత్రాలు కోటానుకోట్లు కనిపిస్తాయి. ఒక పాలసముద్రాన్నే తలపిస్తాయి. అందుకే వాటిని పాలపుంత లేదా పాలవెల్లి అని అంటాము. ఆ పాలవెల్లికి సంకేతంగా ఒక చతురస్రాన్ని కడతారు.

గణేశుని పూజ అంటే ప్రకృతి ఆరాధనే కదా! ప్రకృతిలో సృష్టి, స్థితి, లయలనే మూడు స్థితులు కనిపిస్తాయి. గణేశుని పూజలో ఈ మూడు స్థితులకూ ప్రతీకలని గమనించవచ్చు. ఈ భూమిని (సృష్టి) సూచించేందుకు మట్టి ప్రతిమను, జీవాన్ని (స్థితి) సూచించేందుకు పత్రినీ, ఆకాశాన్ని (లయం) సూచించేందుకు పాలవెల్లినీ ఉంచి ఆ ఆరాధనకి ఓ పరిపూర్ణతని ఇస్తాము.

 

*గణపతి'* అంటే గణాలకు అధిపతి, తొలిపూజలందుకునే దేవత. మరి ఆ గణపతిని పూజించడం అంటే ముక్కోటి దేవతలనూ పూజించడమే కదా! ఆ దేవతలందరికీ సూచనగా పాలవెల్లిని నిలబెడుతున్నాం అనుకోవచ్చు. అలా పాలవెల్లిని సమస్త దేవతలకూ ప్రతికగా భావించవచ్చు

పాలవెల్లి అంటే పాలపుంతే అని తేలిపోయింది. మరి అందులో నక్షత్రాలు ఏవి! అందుకే వెలగపండుని కడతాము. దాంతో పాటుగా మొక్కజొన్నపొత్తులు, మామిడిపిందెలు, జామ, దానిమ్మలాంటి పండ్లనీ కడతాము. ఇవన్నీ వివిధ ఖగోళవస్తువులకు సూచన అన్నమాట.

 

ఏ దేవతకైనా షోడశోపచార పూజలో భాగంగా ఛత్రాన్ని సమర్పించడం ఆనవాయితీ. కానీ వినాయకుడంటే సాక్షాత్తు ఓంకార స్వరూపుడు కదా! పైగా గాణపత్యం అనే శాఖ ప్రకారం ఆయనే ఈ ప్రపంచానికి అధిపతి. అలాంటి స్వామికి ఛత్రంగా ఆ పాలవెల్లి కాక మరేముంటుంది.

గణపతి పూజ ఆడంబరంగా సాగే క్రతువు కాదు. మనకి అందుబాటులో ఉన్న వస్తువులతో భగవంతుని కొలుచుకునే సందర్భం. బియ్యంతో చేసిన ఉండ్రాళ్లు, చెట్ల మీద పత్రి లాంటి వస్తువులే ఇందులో ప్రధానం. ఏదీ లేకపోతే మట్టి ప్రతిమను చేసి, పైన పాలవెల్లిని వేలాడదీసి, గరికతో పూజిస్తే చాలు....పండగ అంగరంగవైభవంగా సాగిపోయినట్లే! పసుపు రాసి కుంకుమబొట్లు పెట్టిన పాలవెల్లి గణేశుని పూజకి అద్భుతమైన శోభనిస్తుంది.

                   ఓం గం గణపతయే నమః

సందేహం

 *సందేహం (❓):* 💐 *నివృత్తి (✅):*

🌹🌻🌻🌻🌹🙏🙏🌹🌻🌻🌻🌹

       ❓ *సందేహం (?):* ❓

❓ *గణపతి అర్చనకు తులసి పనికి రాదని చాలామంది చెబుతున్నారు. కానీ వినాయకచవితినాడు తులసి వేయవచ్చు - అని కొందరంటారు. అయితే ఆ రోజు కూడా తులసి వేయరాదని చెబుతూ, 'వేయవచ్చు' అనే మాటకు ఎక్కడా ప్రమాణం లేదని ఒక పండితుడు అన్నారు.* 

*గణేశ చతుర్థినాడు తులసి వేయవచ్చా!? వేయరాదా!?* ❓

        ✅ *నివృత్తి (√):* ✅

                        ✍️ బ్రహ్మశ్రీ సామవేదం షణ్ముఖ శర్మగారు. 

💫 గణేశ విధానాలకు పరమ ప్రమాణమైన గ్రంథాలలో ఒకటి *ముద్గల పురాణం.* దానిలో స్పష్టంగా ఇలా చెప్పబడి ఉంది - 

💫 ఒక ప్రత్యేక కారణంగా, తులసి తన అర్చనకు పనికిరాదని గణేశుని శాపం. అటుపై తులసి పశ్చాత్తప్తురాలై గణపతి అనుగ్రహం కోసం తపస్సు నాచరించింది. అప్పుడు గణపతి ప్రత్యక్షమై, తులసీదేవికి ఎన్నో వరాలనిచ్చి, *'వినాయక చవితినాడు మాత్రమే నీ దళాలతో నన్ను పూజించవచ్చు'* అని అనుగ్రహించాడు.

*భాద్రశుక్లచతుర్య్థాం యే మహోత్సవ పరాయణాః ౹*

*పూజయిష్యంతి మాం భక్త్యా తత్ర త్వం ధారయామ్యహం ౹౹*

*ఏకవింశతి పత్రాణి హ్యర్చయిష్యంతి మానవాః ౹*

*తత్ర తే పత్రమేకం మే మాన్యం దేవి భవిష్యతి ||*

*ఉల్లంఘన సమం పాపం న భూతం న భవిష్యతి ||*

- "భాద్రపదమాసంలో వచ్చే నా చవితి మహోత్సవాలలో సమర్పించే 21 పత్రాలలోకెల్లా తులసీపత్రమే అత్యంత గొప్పదిగా నేను స్వీకరిస్తాను. కనుక ఆ రోజున 21 పత్రాలలో తులసి పత్రం కూడా నాకు సమర్పించాలి. ఆ రోజున తులసిని సమర్పించకుండా పూజిస్తే, ఆ ఉల్లంఘన దోషానికి వారు పాపులుగానే పరిగణించబడతారు.” 

పై వృత్తాంత ఆధారంగా వినాయకచవితినాడు మాత్రమే తప్పకుండా తులసిని సమర్పించాలి.

రామాయణానుభవం_ 145*

 🌹 *రామాయణానుభవం_ 145* 

బ్రహ్మ రుద్ర మహర్షులు కాకాసురుడు శరణు వేడాడు, వాళ్ళెవరూ సరమర్థులు కారు.

"ఒక్కసారి దగ్గరకు తీయకపోయినప్పటికి మళ్లీ మళ్లీ వెళ్లి కాళ్లపై పడితే కరుణించక పోతారా?" అని వెళ్లిన వారి దగ్గరకే మళ్లీ వెళ్లాడు. మూడులోకాలలో తిరస్కారమే మళ్లీ మళ్లీ ఎదురైంది.

*త్రీన్ లోకాన్ సంపరిక్రమ్య తమేవ శరణం గతః*

ఇక ఎవ్వరు తనను దగ్గరకు రానీయరని తెలిసి, లోకాలన్ని తిరిగి తిరిగి విసిగి వేసారి అలసటతో తాళలేక ఆ దుర్మార్గుడు తనను చంపదలిచిన రామప్రభువు పాదాల పైననే పడిపోయాడు.

సీతాదేవి అతని స్థితిని చూచింది. జాలి పడింది. అంత అపచారము చేసిన వానిని కూడ తప్పుచేసే కొడుకులాగే చూచింది ఆ లోకజనని. ఆయనపై ఆ తల్లికి దయ కలిగింది.

కాకాసురుడు రామచంద్రుని కాళ్లపై పడ్డాడు. కాని సక్రమంగా పడిపోలేదు. 

స్వామి కాళ్లవైపు తన కాళ్లు ఉండేట్లు పడిపోయాడు. కావాలని కాదు. చేతగాక పడిపోయాడు.

*పురతః పతితం దృష్ట్వా ధరణ్యాం* *వాయసం తథా తచ్ఛిరః పాదయోస్తస్య* *యోజయామాస జానకీ*

తండ్రి కంటపడకుండా తనయులను కాపాడే తల్లివలె, రామభద్రుడు ఆగ్రహంతో ఉండగానే, ఆయన గమనించకుండా ఆ కాకిని లేవనెత్తి, దాని తలను స్వామి పాదాలపై పడేట్లుగా సవరించింది ఆ దయామయి.

అప్పటికి ఆ కాకిని గమనించని రామచంద్రునితో "స్వామి! ఇంత పిట్టపై అంత కోపమా? అని నన్ను పరిహసించారే గాని మీరు మాత్రము "పిచ్చుకపై బ్రహ్మాస్త్రాన్ని ప్రయోగించాలా?" ఆ అల్పప్రాణి మీ బ్రహ్మాస్త్రాన్ని తట్టుకోగల్గుతుందా?దిక్కు లేక

మీ చరణాలనే ఆశ్రయించింది చూడండి. శరణన్న వారిని సంరక్షించే కరుణామయులే మీరు” అని కాంతా సమ్మితంగాస్వామితో ఆ కాకి విషయంలో పురుషకారం చేసింది.

*వధార్హమపి కాకుతః కృపయా పర్యపాలయత్*

జానకీ దేవి  ప్రార్ధనతో (పురుషకారం) స్వామి ఆగ్రహం మటుమాయ మైంది. చిరునవ్వుతో "కాకీ! బ్రతికి పోయావులే" అని లేపాడు.

అయితే రామబాణానికి తిరుగులేదు కద! అందువలన బ్రహ్మాస్త్రానికి ఏదైనా ఒక అవయవాన్ని ఆహారంగా సమర్పించుమన్నాడు కాకుత్సుడు. (కకుత్సని వంశంలో జన్మించిన శ్రీరాముడు) కాకి తన కుడికన్నును సమర్పించింది.

అందుకే కాకికి ఒకటే కన్ను ఉంటుంది. కాకాసురుడు “కాకః” “కాకః” అని సంతోషంతో అరవసాగాడు.

**

సీతాదేవి హనుమతో రామునికి తన వినతిని అందించాలనుకొంది. అప్పుడు నేరుగా రామునితోనే మాట్లాడుతున్నట్లు ఈ మాటలు అన్నది. "రామచంద్రా! ఆనాడు నా కొరకు ఒక పిచ్చుకపై బ్రహ్మాస వేశావు కదా! ఈనాడు నేనింత ఆపదలో ఉన్నప్పుడు నన్ను కాపాడవా?

నానాధుడివే! జగన్నాధుడివే! ఇప్పుడు నేను అనాథగా అలమటిస్తుంటే కూడ చూచి. ఊరకుండడము న్యాయమా?

ఆనాడు నీతో కలసి ఉన్నప్పుడు "అన్ని ధర్మాలకంటే శ్రేష్టమైన ధర్మమేది?" అని

అడిగినప్పుడు.

*ఆనృశంస్యం పరోధర్మః* పరదుఃఖ దుఃఖిత్వమే  పరమధర్మము అన్నావే? ఇప్పుడు నన్ను నా దుఃఖానికి వదలివేయడం ధర్మమా?

స్వామీ! మీరు మహావీరులే. అసహాయ శూరులే. "ఇక్ష్వాకుడా మియం భూమిః సశైల వనకాననా" అన్నట్లు ఈ భూమి, పర్వతాలు, సముద్రాలు అన్ని మీ ఆధీనంలో ఉన్నవే కదా! మీరు రక్షించాలనుకొంటే సురులు, నరులు, రాక్షసులు, గంధర్వులు ఎవ్వరైనా, సకల లోకాలలో మరెవ్వరైనా మీ ముందు నిలువగలుగుతారా?" అని అడిగానని నా మాటలను హనుమా! నాస్వామికి తెలుపు.

అయినా హనుమా! అసాధారణ సామర్ధ్యము కల్గికూడ, నా స్వామి నన్ను రక్షించడం. లేదంటే ఆయనకు దయలేదని కాదు. ఆయన దయాసముద్రుడు. అయినా నన్ను రక్షించ రాలేదంటే కారణము నా పాపమే.

*మమైన దుష్కృతం కించిత్ మహదస్తి న సంశయః*

 నాదే కొద్దో గొప్పో పాపము తప్పక ఉంటుంది.

సమర్ధులై ఉండి కూడ రామలక్ష్మణులు తనను రక్షించడానికి రాకపోవడానికి తన తప్పులే కారణమని సీతాదేవి బాధపడుతుంటే - హనుమ ఆమెను ఓదార్చసాగాడు.

**

[భగవత్ అపచారం... 

అరణ్యవాసానికి సీతను రాముడు వద్దన్నపుడు 

రామ జామాతరం ప్రాప్య స్త్రీయం పురుష విగ్రహం

రామా నీవు పురుష రూపం లో ఉన్న స్త్రీ వి కాబట్టి నన్ను అరణ్యానికివద్దంటున్నావు అన్నది 

దీనిని భగవత్ అపచారం అని,  

లేడి వెంట  రాముడు వెళ్లినప్పుడు తన పై వేరే ఆలోచనతోనే లక్ష్మణుడు ఉన్నాడని, ఆయన అడవులకు వెంట వచ్చింది కూడ అందుకే అంది. తాను ఆయనకు ఎన్నటికి లొంగవని అంది. 

దీనినీ భాగవత అపచారం గా సంప్రదాయం పరం గా చెబుతారు.....

ఇలాంటి విషయాల ను పెద్దలను  సేవించి తెలుసుకుంటే ఆవగతం అవుతాయి.

రామాయణానుభవం_ 144*

 🌹 *రామాయణానుభవం_ 144* 

సీతాదేవి పలుకులకు హనుమ చిన్నబోయాడు. తన శక్తి సామర్ధ్యాలను సీతాదేవికి చూపాలనుకొన్నాడు. తన శరీరాన్ని పెంచసాగాడు. పెద్ద పెద్ద కొండలే చిన్న చిన్న బండలుగా తగ్గిపోయాయి అప్పుడు హనుమ అగ్నివంటి ఎఱ్ఱని ముఖంతో, వజ్రము వంటి గోళ్లతో భయంకరమైన దంష్ట్రలతో మేరుపర్వతమంత ఎత్తుతో ప్రకాశించాడు. ఆయన అప్పుడు సీతాదేవిని చూచి, "తల్లీ! నా పర్వతాకారాన్ని చూచావుకదా! ఇక అనుమానాన్ని వదలిపెట్టి నిశ్చింతగా నా వీపుపై ఎక్కి వచ్చి రామలక్ష్మణులను దర్శించి, వారి శోకాన్ని తొలగించు"మని కోరాడు.

ఆ భీమరూపం చూసిన సీత కళ్ళు ఆశ్చర్యంతో పెద్దవయ్యాయి. "మహాకపీ! నీ శక్తిసామర్థ్యాలు నాకు తెలుసు. నువ్వు యింతటి వాడివి కాకపోతేఊహించడమే సాధ్యంకాని సముద్రలంఘనానికి పూనుకోవు. 

నువ్వు నన్ను అవలీలగా తీసుకువెళ్ళగలవనీ తెలుసు. అయితే మనం రాముడి కార్యం చెడిపోకుండా ఏమి చెయ్యాలో నిర్ణయించాలి.  నేను నీతో వెళ్ళకూడదు.

అంత ఎత్తులో, ఎంతో వేగంతో నువ్వు వెడుతూంటే భయపడి (కళ్ళు తిరిగి) నేను పడిపోవచ్చు. నన్ను తీసుకు వెడుతుంటే చూసిన రాక్షసులు చుట్టుముట్టి నీమీద దాడి చెయ్యవచ్చు. వాళ్ళందరివద్ద గొప్ప ఆయుధాలు ఉంటాయి. నువ్వు ఏ ఆయుధాలూ లేకుండా, ఒక పక్కన నన్ను రక్షిస్తూ వేరొకపక్కన నిన్ను రక్షించుకోవాలి. ఆ మహాయుద్ధం చూసి భయంతో నేను సముద్రంలో పడిపోవచ్చు.

*న చ శక్ష్యే త్వయా సార్ధం గన్తుం శత్రువినాశన*

*కలత్రవతి సన్దేహస్త్వయ్యపి స్యాదసంశయః*

అయితే, నువ్వు మహాపరాక్రమవంతుడివి కనుక ఆ రాక్షసులందర్నీ సంహరించగలవు. కాని, దానివలన రాముడి కీర్తి దెబ్బతింటుంది.

లేదా, ఏదో రకంగా నీనుంచి నన్ను ఎత్తుకుపోయి రాక్షసులు ఎవరికీ కనపడనిచోట దాచెయ్యవచ్చు. అప్పుడు నువ్వు చేసిన యీ మహాప్రయత్నమంతా వృథా అవుతుంది.

ఇవన్నీ అలా ఉంచి.....

రాముడు ఇక్కడికి వచ్చి సబాంధవంగా రావణుణ్ణి సంహరించి నన్ను తీసుకువెడితే-అది అతడికి తగిన పద్ధతి. రాముడి పరాక్రమం ముందు యీ రాక్షసులు నిలువలేరు. ఆ పరాక్రమం విన్నాను. కళ్ళారా చూసాను. ఆ రాముడి రాకకోసం ఎదురుచూస్తున్నాను. నువ్వు రామలక్ష్మణులనూ, వానరసేనానాయకులనూ వెంటనే తీసుకువచ్చి నాకు సంతోషం కలిగించు.”.....

*స మే హరిశ్రేష్ఠ సలక్ష్మణం పతిం సయూథపం క్షిప్రమిహోపపాదయ*

*చిరాయ రామం ప్రతి శోకకర్శితాం కురుష్వ మాం వానరముఖ్య హర్షితామ్*

**

సీతాదేవి పరిశుద్ధమైన పలుకులను విని హనుము సంతృప్తితో ఇలా అన్నాడు: "తల్లీ! పురుషులు ఆవేశంతో తొందరపడితే, స్త్రీలు నెమ్మదిగా ఆలోచించి, ఆ పురుషులు ఆలోచనలలోని మంచి చెడులను వారికి తెలిపి, వారిని శాంతపరుస్తారు.

అలాగే నీవు ఒక స్త్రీ రత్నంగా నా ఆవేశానికి మంచి చెడులు చెప్పి అడ్డుకట్ట వేశావు. ఒక వీర పత్నిగా నీ పతికి కలిగే అవమానాన్ని నివారించావు. ఒక పతివ్రతగా నీ స్వభావాన్ని నీ మహిమను నిరూపించుకొన్నావు. ఇంతటి స్థిరత్వము, ఇంతటి వీరత్వము, ఇంతటి పాతివ్రత్యము రామభద్రుని ధర్మపత్నివైన నీకు తప్ప మరొకరికి సాధ్యమా?

నేను నీ కష్టాలకు తొందరలో ముగింపు పలుకాలని నాతో రమ్మని పిలిచానే తప్ప

వేరే ఉద్దేశ్యంతో కాదు.

నీకు నా వెంట రావడం ఇష్టము కాకుంటే, నేను నిన్ను కలిసి మాట్లాడానని రాముడు నన్ను నమ్మే విధంగా ఏదైనా ఒక ముఖ్యమైన గుర్తు తెలుపుమని కోరాడు. అప్పుడు సీతాదేవి తనకు, రామునికి తప్ప వేరెవ్వరికి తెలియని కాకాసుర

వృత్తాంతాన్ని హనుమకు తెలిపింది.

*ఏవముక్తా హనుమతా సీతా సురసుతోపమా*

*ఉవాచ వచనం మన్దం బాష్పప్రగ్రథితాక్షరమ్*

*ఇదం శ్రేష్ఠమభిజ్ఞానం బ్రూయాస్త్వం తు మమ ప్రియమ్*

"రామభక్తా! మేము చిత్రకూట పర్వతముపై ఒక తాపసాశ్రమాన్ని నిర్మించుకొని అందులో నివసించాము. మందాకినీ నదీతీరంలోని, ఆ ఆశ్రమ పరిసరాలలోని ఒక తోటలో భార్యాభర్తలు ఒక తూరి విహరించాము. ఆ ఆటలో నేను తొందరగా అలసిపోయి విశ్రాంతి తీసికోవాలనుకొన్నాను. నా భర్త తొడపై పడుకొన్నాను. అప్పుడు అక్కడికి మాంసముపై ఆశతో ఒక పాడు కాకి వచ్చి నా చుట్టు తిరుగుతూ రొద చేయసాగింది. కొంచెము సమయం తరువాత నా గుండెలపైకి ఎగిరి పొడవ సాగింది.

దగ్గరలో ఎండు మాంసము ముద్ద ఉన్నా, దాని జోలికి పోక నా గుండెలనే గీర సాగింది. నేను నా మొలత్రాడును తీసి దానిని కొట్టబోయాను. అప్పుడు నా నాథుడు "ఇంత చిన్న పిట్టపై అంత కోపమా" అని పరిహసించాడు. నాకు అంత బాధలో కూడ నా భర్త మాటలకు సిగ్గు కలిగింది. రాముడు నన్ను దగ్గరకు తీసికొని ఓదార్చాడు. నా కన్నీటిని తుడిచాడు.

అప్పుడు నా ప్రాణవిభుడు నా తొడపై పడుకొన్నాడు. నేను కాకి బాధను భరిస్తున్నాను.

నా భర్తకు నిద్రా భంగము కలుగుతుందని ఆ కాకిని కొట్టే ప్రయత్నాన్ని మానుకొన్నాను.

"స్వామి నిద్రా సౌందర్యాన్ని కనులారా సేవిస్తున్నాను. ఆ స్వామి సహజంగానే సుందరుడు. నిద్రలో ఆయన సౌందర్యము మరింత అధికమైంది. రెప్పపాటు కూడ లేక తదేకంగా తన్మయంగా ఆ స్వామినే చూస్తూ ఉండిపోయాను. ఆ ఆనందంలో నా గుండెల నుండి కారే రక్తాన్ని కూడ గమనించలేదు.

అయితే నా రక్తపు బిందువులు కొన్ని నా భర్త కపోలము పై పడ్డాయి. ఆ వేడికి వెంటనే సుఖంగా నిద్రించే పరంతపుడు నా స్వామి మేలుకొన్నాడు. "అయ్యో నా మూలంగా నా స్వామికి నిద్రాభంగమైందే?" అని నేనెంతో బాధపడ్డాను. ఆయన ఆగ్రహ పరవశుడయ్యాడు. "ఐదు తలలుగల భయంకర సర్పముతో ఆటలాడే ఆ నీచుడెవ్వడు? నిన్ను ఇంత క్రూరంగా హింసిస్తున్న ఆ అథముడెవ్వడు?" అని కోపంతో లేచి చుట్టు ప్రక్కల పరిశీలించాడు. అప్పటికి విడువకుండా నా గుండెలను పొడుస్తున్న అసురు స్వభావం గల ఆ పాడు కాకి రాముని కంటబడింది.

అరులను అణచడానికి ఆ అసహాయ శూరుడైన రామునికి ప్రత్యేకంగా ఒక ఆయుధము కావాలా? ప్రక్కలో ఉన్న ఒక గడ్డిపోచను తీసికొన్నాడు. బ్రహ్మాస్త్రాన్ని దానిలో సంధించి వదిలాడు. ఆ బ్రహ్మాసము ఆ కాకిని తరుమసాగింది......

*స తం ప్రదీప్తం చిక్షేప దర్భం తం వాయసం ప్రతి*

*తతస్తం వాయసం దర్భస్సోమ్బరేనుజగామ హ*

రామాయణానుభవం_ 143*

 🌹 *రామాయణానుభవం_ 143* 

హనుమ సీత సంవాదం కొనసాగుతోంది....

"తల్లీ! రామునికి ఇంతవరకు నీవెక్కడ ఉన్నావో  తెలియదు. తెలిశాక తక్షణమే మహేంద్రుడు శచీదేవిని తీసికువెళ్లినట్లు నిన్ను తీసుక వెళ్తాడు.

నీ వార్త తెలిసిన వెంటనే వానర మహాసైన్యంతో శ్రీరాముడు బయలుదేరి తన బాణాలతో సముద్రాన్ని బంధించి, లంకలోనికి ప్రవేశించి, సమస్త రాక్షస కోటిని సంహరిస్తాడు. ఆయనకు సురులు, అసురులు ఎవ్వరు అడ్డుకారు.

సింహముచే బాధింపబడిన మహాగజమువలె నీ విరహ బాధతో శ్రీరాముడు నలిగి పోతున్నాడు.

మేము నివసించే మహా పర్వతములపై, మేము భక్షించే కందమూల ఫలములపై

ఒట్టుపెట్టుకొని నిజమే చెప్పుతున్నాను. స్వర్గంలో ఉన్న మహేంద్రునివలె ప్రస్రవణ పర్వతముపై అందమైన కన్నులు, సుందరములైన కుండలములు గల శ్రీరాముని నీవు అతి త్వరలో చూడగలవు.

శ్రీరామునికి నీకు దూరమైన నాటి నుండి అన్నము, రుచించడం లేదు. నిద్రపోవడం

లేదు. ఒకవేళ నిద్రపట్టితే, వెంటనే "సీతా" అని నీ మధుర నామాన్ని ఉచ్చరిస్తూ వెంటనే మేల్కొంటాడు.

ఆయనకు ఆయన శరీరముపై స్పృహే లేదు. ఆయన నిన్నే ధ్యానిస్తూ నీ గురించే పలవరిస్తూ, నిన్ను పొందడానికే ప్రయత్నిస్తున్నాడు" అని హనుమ తెలిపాడు. 

సీతాదేవికి రామ వార్త విన్నందువలన శోకము తొలగింది. కాని ఆయన తన కొరకే శోకిస్తున్నాడని తెలిసి మళ్లీ శోకము కలిగింది. మబ్బులు కొద్దిగా మిగిలిన శరద్రాత్రి వలె సీతాదేవి శోక హర్షాలను కలిగి ఉంది.

హనుమంతుడు సీతాదేవితో "అమ్మా! రాముడు క్షేమంగా ఉన్నాడు. కాని నీ విరహ దుఃఖముతో కృంగిపోతున్నాడ”ని చెప్పాడు. ఆ మాటలు సీతకు అమృతమువలె, విషము వలె అనిపించాయి.

*అమృతం విషసంసృష్టం త్వయా వానర భాషితమ్*

*యచ్చ నాన్యమనా రామో యచ్చ శోకపరాయణః*

"హనుమా! రాముని క్షేమవార్త అమృతము వలె నాకు ప్రాణం పోసింది. అయితే ఆయన అమితమైన దుఃఖంతో ఉన్నాడు" అన్న మాట నాకు విషమువలె భరించరానిదిగా ఉంది.

సుఖదుఃఖాలు మనిషిని త్రాటితో కట్టి లాగినట్లు దైవములాగి వేస్తుంది. దైవాన్ని ఎవ్వరు ఎదిరించజాలరు. *లేకపోతే సజ్జనులు, శక్తి సంపన్నులైన రామలక్ష్మణులు, నేను ఇంత ఆపదల వలయంలో చిక్కుకోవడమేమిటి?*

*విధిర్నూనమసంహార్యః ప్రాణినాం ప్లవగోత్తమ*

*సౌమిత్రిం మాం చ రామం చ వ్యసనై: పశ్య మోహితాన్*

శ్రీరామచంద్రస్వామి లంకకెప్పుడు వస్తాడో? రావణుని సంహరించి నన్నెప్పుడు స్వీకరిస్తాడో? అయితే ఆయన ఆలస్యం చేస్తే ప్రయోజనము లేదు. రావణుడు నన్ను తీసుకొని వచ్చాక, తనను వరించడానికి ఒక సంవత్సరము గడువిచ్చాడు. ఆ గడువు పూర్తి కావడానికి ఇంకా రెండు నెలలు మాత్రమే మిగిలాయి.....

**

సీత హనుమ సంభాషణ...

హనుమా రావణుడు మూర్ఖుడు. చండ స్వభావుడు. ఆయన ఎవ్వరి మాటను వినడు. ఇంతకు ముందు ఎన్నోసార్లు “రాఘవునికి నన్ను అప్పగించి లంకా సామ్రాజ్య వైభవాన్ని, ఆనందోత్సాహాలను పదిలంగా కాపాడుమని" విభీషణాదులు హితము పలికారని విభీషణుని పెద్ద కూతురు నల నాతో స్వయంగా చెప్పింది. అయితే అంత్యకాలము దాపురించిన వానికి దీపము మలిగిపోయేప్పటి వాసన రానట్లే రావణునికి ఈ సలహాలు రుచించడం లేదు.

అయినా రావణుడెంత కాలము ప్రయత్నించినా నన్ను దక్కించుకోలేడు. నా ప్రభువు అతులిత పరాక్రమ సంపన్నుడు. ఆశ్రిత రక్షాదక్షుడు. నన్ను రావణుని బారి నుండి తప్పక కాపాడగలడు.

రాముడు రావణుని జయించుటకు తగిన బలము, పరాక్రమము, ఉత్సాహము, ప్రభావము మొదలైన గుణాలన్ని కలవాడు.

పదునాల్గు వేల మంది భయంకర రాక్షసులను “ఒంటి చేతితో” గెలిచిన శ్రీరామ భద్రుని ముందు రావణుడు నిలువగలుగుతాడా?

రాముడనే సూర్యుడు తన బాణాలనే కిరణాలతో శత్రుసైన్యమనే జలాన్ని తప్పక "ఇంకింప జేస్తాడు" అని పలికి ఊరుకుంది.

హనుమకు సీతాదేవి ఇంకా లంకలో శత్రువుల మధ్య బాధపడడం మంచిది

కాదనిపించింది. అప్పుడు హనుమ సీతాదేవి భయాన్ని, బాధను పోగొట్టడానికి ఆమెతో

ఈ విధంగా అన్నాడు. 

"అమ్మా! నేను తిరిగి వెళ్ళి శ్రీరామచంద్రునికి నీ వార్తను వివరించగానే, ఆయన ససైన్యంగా వచ్చి, రావణుని సంహరించి, నిన్ను తీసికొని వెళ్తాడు.

కాని నీకంత వరకు ఓర్చుకొనే ఓపిక లేక పోతే, నిన్ను నా వీపుఎక్కించుకొని ఇప్పుడే

వెళ్లి స్వామి సన్నిధిలో సమర్పిస్తాను.

నేను సముద్రమును దాటడం, నిన్ను దాటించడం నాకు ఒక లెక్క కాదు. అవసరమైతే రావణునితో పాటు, ఆయన పరివారంతో పాటు మొత్తము లంకనే పెల్లగించి, తీసికొని వెళ్లి రాముని ముందు ఉంచుతాను.

అగ్నిదేవుడు హోమంలో అర్పించిన హవిస్సును ఇంద్రునికి అప్పగించినట్లే నిన్ను నేను రామునికి అప్పగిస్తాను.

*అహం ప్రస్రవణస్థాయ రాఘవాయాద్య మైథిలి*

*ప్రాపయిష్యామి శక్రాయ హవ్యం హుతమివానలః*

 నీవు సందేహించకు. నా వీపుపై కూచో. ఆకాశమార్గంలో సూర్యచంద్రులతో సంభాషిస్తూ నా వీపుపై కూచొని సముద్రాన్ని దాటి ఇప్పుడే రామలక్ష్మణులను చూడగలవు. నన్నెదిరించుటకు రావణునికి శక్తి చాలదు. నేనెంత సులభంగా సముద్రం దాటి వచ్చానో అంత సులభంగా తిరిగి నిన్ను తీసికొని సముద్రం దాటి వెళ్లగలను".

హనుమ మాటలు సీతాదేవికి ఆశ్చర్యాన్ని కలిగించాయి. " చిన్న శరీరము ఉన్న నీవు నన్ను సముద్రం దాటిస్తావా?" అని ప్రశ్నించింది......

*కథం వాల్పశరీరస్త్వం మామితో నేతుమిచ్ఛసి*

*సకాశం మానవేన్ద్రస్య భర్తుర్మే ప్లవగర్షభ*

రామాయణానుభవం_ 141*

 🌹 *రామాయణానుభవం_ 141* 

*రామః కమల పత్రాక్ష స్సర్వ సత్త్వ మనోహరః* ।

*రూప దాక్షిణ్య సంపన్నః*

*ప్రసూతో జనకాత్మజే* ॥

సీతమ్మా! శ్రీ రాముడు కమల పత్రముల వంటి కన్నులు గలవాడు; సకల ప్రాణుల మనస్సును ఆకర్షించువాడు, రూపముతో దయతో కూడిన వాడై పుట్టిన వాడు;

ఈ శ్లోకమునందు హనుమంతుడు శ్రీరాముని పరతత్త్వమును సూచించుచున్నాడు,

రామః = ఆనంద స్వరూపుడు, ఆనందము గుణముగా గల వాడు; ఆనందమునొసంగువాడు; అయిన జగత్కారణ తత్త్వమే దశరథుని కుమారుడగు శ్రీరాముడు, 

ఆనందో బ్రహ్మేతి వ్యజానాత్ ఆనందమే, 

ఆనందము కలవాడే; పరబ్రహ్మ అని తెలిసికొనెను, 

తైత్తి రీయోపనిషత్తు, భృగువల్లి, 

ఏషహ్యేవా ఽనందయాతి, 

ఈ పరబ్రహ్మమే సకల ప్రాణులను ఆనందింపచేయును; తైత్తిరీయోపనిషత్తు, ఆనందవల్లి అని శ్రుతి వాక్యము.

 కమల పత్రాక్షః = ఆ పరబ్రహ్మమే ఉపాసకుల సౌలభ్యము కొరకై సూర్య మండలమున నున్నాడు; అతడే పుండరీకముల వంటి కన్నులు గల శ్రీ మన్నారాయణుడు అని 

యఏషోఽంతరాదిత్య హిరణ్మయః పురుషోదృశ్యతే | హిరణ్యశ్మశ్రు ర్హిరణ్యకేశ ఆ ప్రణఖాత్సర్వ ఏవ సువర్ణః, తస్య యథాకప్యాసం పుండరీక మేవ మక్షిణీ సూర్యమండలము నందు హిరణ్మయస్వరూపుడగు పురుషుడు కనబడుచున్నాడు; బంగారు వెంట్రుకలు కలవాడు, బంగారు గడ్డము గల వాడు; గోళ్ళు మొదలుకొని అంతయు బంగారుమయమే; గంభీరమైన నీటిలో మొలచిన, లావైన దృఢమైన కాడపై నిలిచిన, అప్పుడే ఉదయించిన సూర్యుని కిరణములచే వికసించిన, తామర పూవుల వంటివి అతని యొక్క రెండు నేత్రములు - ఛాందోగ్యోపనిషత్తు, అని చెప్పిన ప్రకారముగా పుండరీకాక్షుడు; 

సర్వసత్వ మనోహరః = సకల ప్రాణుల చిత్తమునందున్న వాడు; రూపదాక్షిణ్య సంపన్నః = దివ్య మంగళ విగ్రహముతో, చేతనాచేతనములందు సంపూర్ణమైన దయతో కూడిన వాడు, అయిన ఆ పరమాత్మయే, 

ప్రసూతః = దశరథుని పుత్రుడైన శ్రీరాముడుగా అందరికీ కనబడునట్లు జనించినవాడు; జన్మ లేని వాడు. జన్మించినాడు; 

జనకాత్మజే = ఓ సీతమ్మా!; శ్రీరాముడు శ్రీమన్నారాయణుడేయని హనుమంతునిచే సూచింపబడినట్లు.....

**

హనుమ రామకథాగానం చేస్తున్నాడు...

రాముడు తేజస్సులో సూర్యునితోనూ, ఓర్పులో భూమితోనూ, బుద్ధిలో బృహస్పతితోనూ, కీర్తిలో దేవేంద్రుడితోనూ సమానమైనవాడు. సమస్తజీవజాలాన్నీ రక్షిస్తాడు. ధర్మాన్ని రక్షిస్తాడు. లోకంలో మర్యాదని (కట్టుబాట్ల) ను రక్షిస్తాడు..

రాముడు విద్వాంసుడు. శాస్త్రాభ్యాసం చేసాడు. రాజవిద్యలు నేర్చాడు. పండితుల మన్ననలు పొందాడు. వినీతుడు (వినయవంతుడు) శీలసంపన్నుడు. వేదవేదాంగాలలో నిష్ణాతుడు, వేదవేత్తలు ప్రశంసించే పండితుడు. స్వశాఖ అయిన యజుర్వేదం చక్కగా అభ్యసించాడు.

అతని రూపం ఎలా ఉంటుందని అడిగావు. రాముడిది నీలమేఘచ్ఛాయ. ఆరోగ్యంతో మిసమిసలాడుతూ ఉంటాడు. చర్మం ఆరోగ్యంగా నిగనిగలాడుతుంది. అతడి కంఠస్వరం దుందుభినాదంలా ఉంటుంది. కళ్ళు ఎర్రగా ఉంటాయి. భుజాలు విశాలమైనవి. బాహువులు దీర్ఘమైనవి. ముఖం మంగళప్రదం. బలిసిన కండతో మూపున ఎముకలు కనపడవు. త్రిస్థిరః ముంజేయి, పిడికిలి, వక్షఃస్థలం స్థిరంగా ఉంటాయి. త్రిప్రలంబ: కనుబొమలు, ముష్కములు, బాహువులు పొడవుగా ఉంటాయి. (ఇలా సాముద్రికశాస్త్రంలో చెప్పిన చక్రవర్తి లక్షణాలన్నీ వర్ణిస్తాడు) 

దేశకాల విభాగం తెలిసినవాడు. సత్యధర్మాలను ఉపాసించేవాడు. లక్ష్మణుడూ రాముడిలానే ఉంటాడు. రాముడు నీలమేఘశ్యాముడు, లక్ష్మణుడిది బంగారు శరీరచ్చాయి.

ఆ అన్నదమ్ములు నిన్ను వెదుకుతూ ఋశ్యమూకపర్వతం వద్దకు వచ్చారు. అక్కడ మేము సుగ్రీవుణ్ణి సేవిస్తూ ఉన్నాము. వీరి రూపాలూ, ఆయుధాలూ చూసి భయపడి వీరెవరో కనుక్కోమని సుగ్రీవుడు నన్ను పంపాడు. సుగ్రీవుడి గురించి విని రామలక్ష్మణులు సంతోషించారు. నేను వారిని వీపుమీద ఎక్కించుకుని సుగ్రీవాదులు ఉన్న చోటికి తీసుకువెళ్ళాను. రామసుగ్రీవులు. అగ్నిసాక్షిగా మిత్రులయ్యారు. ఒకరి కథ ఒకరికి చెప్పుకున్నారు.

సుగ్రీవుడి భార్య రుమ, అతడి అన్న వాలి మహాబలశాలి. పరాక్రమవంతుడు.  "ఒకానొక సంఘటనలో అపోహతో వాలి సుగ్రీవుణ్ణి రాజ్యంనుంచి వెళ్ళగొట్టాడు".

. ఆ కథ విని రాముడు సుగ్రీవుణ్ణి ఓదార్చాడు.

తరువాత తన అరణ్యవాస కథ, రావణుడు నిన్ను అపహరించడం వివరంగా చెప్పాడు. రావణుడు నిన్ను పట్టి వాయుమార్గంలో వెడుతుంటే నువ్వు పడవేసిన ఆభరణాలన్నీ వానరనాయకులు తీసి జాగ్రత్తచేసారు. అవన్నీ తెచ్చి రాముడికి చూపించాము. వాటిని చూస్తూనే రాముడు స్పృహ తప్పి పడిపోయాడు.

స్పృహరాగానే వాటిని ఒడిలో ఉంచుకుని అనేక విధాల విలపించాడు. నీ వియోగంవలన రాముడు  జ్వలిస్తున్న అగ్నివలన అగ్నిపర్వతం తపించినట్లు తపించుకుపోతున్నాడు. రాత్రింబవళ్ళు నిన్నే తలుచుకుంటూ దుఃఖిస్తున్నాడు.......

*

[రాముని యొక్క సౌందర్యాదులను మొల్ల అద్భుతం గా తెలుగు పద్యం గా అందించింది.

నీల మేఘ చ్ఛాయ బోలు దేహమువాఁడు. ధవ ళాబ్జ పత్ర నేత్రములవాఁడు

కంబు సన్నిభ మైన కంఠంబు గలఁవాఁడు చక్కని పీన వక్షంబువాఁడు.

తిన్ననై కనుపట్టు దీర్ఘ బాహులవాఁడు ఘనమైన దుందుభి స్వనమువాఁడు పద్మ రేఖలు గల్గు పద యుగంబులవాఁడు

కపట మెఱుఁగని సత్య వాక్యములవాఁడు ,రమణి! రాముండు శుభ లక్షణములవాఁడు ఇన్ని గుణముల రూపింప నెసఁగువాఁడు వరుస సౌమిత్రి బంగారు వన్నె వాఁడు.]

మాండూక్యోపనిషత్

 శ్లోకం:☝️

  *ఇయం కైవల్యముక్తిస్తు*

*కేనోపాయేన సిద్ధ్యతి ।*

  *మాణ్డూక్యమేకమేవాలం*

*ముముక్షూణాం విముక్తయే ।।*

భావం: ముక్తిని పొందే ఏకైక సాధనం మాండూక్యోపనిషత్ ద్వారా మాత్రమే. మరే ఇతర మార్గాల ద్వారా ముక్తి లభించదని తెలుసుకోండి. సాధకులందరికీ మోక్షానికి ఈ ఒక్క ఉపనిషత్తు సరిపోతుంది అని భావం! అందుకేనేమో శంకరాచార్యుల గురువు గారయిన గౌడపాదాచార్యులు మాండూక్యోపనిషత్ పై మాండూక్య కారిక వ్రాసారు.🙏

బుుణానుబంధ రూపేణా

 ❤️ *పుత్రులు ఏడు రకాలుగా జన్మిస్తారు.*

💕 *గతజన్మలో తన సొమ్మును దాచమని ఒక వ్యక్తికి ఇచ్చి, తన సొమ్మును తిరిగి తీసుకోకుండానే మరణించినవాడు తాను దాచిన సొమ్ము తీసుకోవడానికి ఆ ఇంట్లో పుత్రుడుగా జన్మిస్తాడు.*

💕 *తాను పూర్వ జన్మయందు బాకీపడిన అప్పును (ఋణాన్ని) తిరిగి చెల్లించుటకు పుత్రుడుగా జన్మిస్తాడు.*

💕 *పూర్వ జన్మలోని శత్రుత్వం తీర్చుకోవడానికి ఈ జన్మలో పుత్రునిగా జన్మిస్తాడు.*

💕 *పూర్వ జన్మలో తనకు ఒకడు అపకారం చేసాడు. దానికి ప్రతీకారం తీర్చుకోలేదు. ఈ జన్మలో ప్రతీకారం తీర్చుకోవడానికి అపకారం చేసినవాడికి పుత్రునిగా జన్మిస్తాడు.*

💕 *పూర్వ జన్మలో తాను అనుభవించిన సేవ,సుఖములకు బదులు తీర్చడానికి పుత్రునిగా జన్మించి తల్లిదండ్రులకు సేవ చేస్తాడు.*

💕 *పూర్వ జన్మలో తాను ఏ వ్యక్తి నుండి ఉపకారం పొందుతాడో, ఆ ఉపకారానికి బదులుగా ఉపకారం చేయుటకు పుత్రునిగా జన్మిస్తాడు.*

💕 *ఏమీ ఆపేక్షించనివాడు కూడా పుత్రునిగా జన్మించి, తన విధులను తీరుస్తాడు.*

🌺 *ఇలా పుత్రులుగా జన్మించినవారు కర్మానుసారముగా తమ పనులు పూర్తికాగానే మరణిస్తారు, లేదా దీర్ఘకాలం జీవించి ఉపకారం చేయడమో, ప్రతీకారం తీర్చుకోవడమో చేస్తారు.*

❤️ *కేవలం పుత్రులే కాదు, భార్య - భర్త - సోదరుడు - పనిమనిషి - ఆవు - కుక్క మొదలైన పశువులు కూడా కర్మరుణం తీర్చుకోవడానికి మనతో ఉంటారు.*

💕 *”బుుణానుబంధ రూపేణా పశు పత్నీ సుతాలయాః” అన్నారు కదా ఋణము తీరగానే వదిలి వెళ్ళడమో, పరలోకానికి చేరడమో జరుగుతుంది.*

❤️ *బుుణ సంబంధమే లేనప్పుడు పుత్రులు కలగరు. పుత్రులు లేనివాళ్లు తాము ఎవరికీ బుుణపడిలేమనీ, తమకు ఎవరూ బుుణపడి లేరనీ తృప్తిపడి సంతృప్త జీవనాన్ని సొంతం చేసుకోవాలి.*

❤️ *ॐశ్రీవేంకటేశాయ నమః*