*ధార్మికగీత*

       
          *శ్లో:- అగ్నిహోత్రం,  గృహక్షేత్రే ౹*
                 *గర్భిణీమ్ వృధ్ధబాలకౌ  ౹*
                 *రక్త హస్తేన నో పేయాత్ ౹*
                 *రాజానం దైవతం గురుమ్ ౹౹*
                                    *
*భా:- లోకంలో మనం ఉత్త చేతులతో  పోకూడని, పోరాని సందర్భాలు,సన్నివేశాలు ఎనిమిది తారసపడుతుంటాయి. అవి.1. "అగ్నిహోత్రము":- మన పరి సరప్రాంతాలలో లోకకళ్యాణార్థం జరిగే యజ్ఞ,యాగాల  సందర్శనకోసం వెళ్ళేటప్పుడు హోమద్రవ్యాలను భక్తితో అర్పించాలి. యాగఫలం మనకు శుభాలనిస్తుంది. 2."గృహక్షేత్రము":- బంధువుల ఇంటికి వెళ్ళేటప్పుడు పండ్లో,మిఠాయిలో తీసికొని వెళ్లడం మర్యాదసూచకము. 3."గర్భిణీ":- గర్భవతియైన స్త్రీ యోగక్షేమాల పరామర్శకై వెళ్ళేటప్పుడు ఫలమో, ఫలాహారామో ఆత్మీయంగా ఇచ్చి'  శుభాకాంక్షలు అందజేయాలి.4."వృద్ధులు":- వయోవృద్ధులను చూడడానికి వెళ్ళినపుడు,  ప్రేమాదరాభిమానాలతో మాట్లాడి' వారు తినగలిగినవి ఇవ్వాలి. 5."బాలలు":- కల్లాకపటం తెలియని దైవస్వరూపులైన బాలల  వద్దకు వెళ్ళేటప్పుడు తప్పనిసరిగా  ఫలాలు, మిఠాయిలు ప్రేమతో ఇవ్వాలి. వారి ఆనందానికి మేర ఉండదు. 6."రాజు":- ప్రజల్ని కన్నబిడ్డలుగా, కంటికి రెప్పలా కాపాడే ప్రభువు దగ్గరికి వెళ్ళేటప్పుడు కృతజ్ఞతగా పండ్లు అర్పించాలి. 7. "దేవుడు" :-దేవుని గుడికి వెళ్ళినప్పుడు టెంకాయ, పండ్లు, పూలు భక్తిగా సమర్పించాలి. 8."గురువు":- జ్ఞానబోధచే జీవాత్మ,పరమాత్మ తత్త్వాన్ని తెలిపి, జీవితనౌకకు చుక్కాని వంటి గురువు సన్నిధికి వెళ్ళేటప్పుడు సముచిత ద్రవ్యాలను వినమ్రంగా అర్పణ చేయాలి. వీరందరి హార్దిక శుభాశీస్సులు, శుభకామనలు, శుభాకాంక్షలు మనకు శుభప్రదములు , మంగళప్రదములై సుఖ జీవనయానానికి రాచబాట వేయగలుగుతాయి. మనశ్శాంతినిచ్చి, ఆధ్యాత్మికపురోగమనానికి  దోహదం చేస్తాయని సారాంశము*.
                               
                *సమర్పణ*   : 
***********************