*శ్రీలలితా సహస్రనామ భాష్యము*

 *శ్రీమాత్రేనమః*

*శ్రీలలితా సహస్రనామ భాష్యము*

*986వ నామ మంత్రము* 1.9.2021 

*ఓం త్రికోణగాయై నమః*

యోని చక్రమును పొందియున్న శ్రీమాతకు నమస్కారము.

శ్రీలలితా సహస్ర నామావళి యందలి *త్రికోణగా* యను నాలుగక్షరముల నామ మంత్రమును *ఓం త్రికోణగాయై నమః* అని ఉచ్చరించుచూ, ఆ పరమేశ్వరిని ఉపాసించు సాధకుడు, ఆ తల్లి కరుణచే నిర్మలమైన ధ్యాననిమగ్నతతో తన సాధనను మరింత దక్షతతో కొనసాగించి తరించును.

పరమేశ్వరి త్రికోణరూపిణి. త్రికోణము అనగా మూడు భుజములతో ఏర్పడినదని చాలా మందికి తెలుసు. ఆ మూడు భుజాలలో ఒకటి భూలోకము (భూః), రెండవది భువర్లోకము (భువః), మూడవది సువర్లోకము (సువః). అమ్మవారు ఈ మూడు వ్యాహృతులకు అధిపతి. గనుక ఆ పరమేశ్వరి *త్రికోణగా* యని అనబడినది. పరమేశ్వరుడు బిందుస్వరూపుడు అయితే, పరమేశ్వరి త్రికోణరూపిణి. సృష్టిచేయాలనే సంకల్పం పరమేశ్వరునికి రాగానే సత్త్వరజస్తమో గుణములు ముందుగా సృష్టింప బడినవి. ఈ గుణత్రయము త్రికోణములోని మూడుభుజములుగాను, అట్టి త్రికోణము మాయాశక్తిత్రికోణ మనియు, అట్టి మాయాశక్తి త్రికోణమే పరమేశ్వరి యగుటచే, అమ్మవారు *త్రికోణగా* యని అనబడినది. మాయాశక్తి స్వరూపిణియైన పరమేశ్వరి సత్త్వగుణమువలన అవ్యక్తముగాను, రజోగుణమువలన మహత్తత్త్వంగాను, తమోగుణము వలన అహంకారంగాను అగుచున్నది. అవ్యక్తము, మహత్తత్త్వము, అహంకార సంయుతమైన యోనిచక్రము (త్రికోణము) పరమేశ్వరి యగుటచే అమ్మవారు *త్రికోణగా* యని అనబడినది.

పరమేశ్వరికి నమస్కరించునపుడు *ఓం త్రికోణగాయై నమః* అని యనవలెను.

🌹🌹🌹🌹🌹🌹🌹🌹🌹🌹🌹🌹

మహాగణపతి, బాల, శక్తిపంచాక్షరీ, పంచదశీ మంత్రోపదేశము, ఆంగ్లభాషలో అనర్గళ వాక్పటిమ ప్రదాతలు, నా జీవన వృత్తికి, ప్రవృత్తికి మార్గదర్శకులైన, కుర్తాళం మౌనస్వామి వారి ప్రియశిష్యులు, నాతొలిగురువర్యులు, కీ.శే కొండాకోటయ్య మహనీయుల అనుగ్రహముతోను, ఎనిమిది నెలలు(1977లో) తన పాదసేవాభాగ్యంతో నన్ను పునీతులను చేసిన జిల్లెళ్ళమూడి అమ్మ అనుగ్రహముతోను భాస్కరరాయలు వారి సౌభాగ్యభాస్కరము, మరియు కొందరు ఆధ్యాత్మికవేత్తల వ్యాఖ్యానముల పరిశీలనతోను అక్కడక్కడ భాస్కరరాయలు వారి శ్లోకములు మరియు ఆది శంకరాచార్యుల సౌందర్యలహరి శ్లోకములు తీసుకుంటూ, నా స్వీయ వివరణతో ఈ వ్యాఖ్యాన పుష్పాన్ని జగజ్జనని ఇచ్చిన ప్రసాదంగా భావిస్తూ అందరికీ పంచుతున్నాను. ఇచ్చిన పేరాలు, శ్లోకాలు జగజ్జనని ప్రసాదపుష్పంగా భావిస్తున్నాను. ఇందులో వ్యాఖ్యాన పంక్తులు గాని, శ్లోకాలు మొదలైనవన్నియు అమ్మవారి నుండి లభించిన ప్రసాద పుష్పము యొక్క దళములుగా భావించుచున్నాను. అట్టి పుష్పమునుండి ఏమి తొలగించిననూ ఆయా దళములు త్రుంచిన దోషమవుతుంది. జగన్మాత భక్తులయిన వారు యథాతథముగా ఎంతమందికి ఈ పుష్పాన్ని పంపిననూ సంతోషమే.

🌹🌹🌹🌹🌹🌹🌹🌹🌹🌹🌹🌹

 *పసుమర్తి వేంకట దుర్గా సుబ్రహ్మణ్యం* 7702090319, 9505813235

🌹🌹🌹🌹🌹🌹🌹🌹🌹🌹🌹🌹

మీకు, మీకుటుంబ సభ్యులకు శుభోదయ శుభాభి వందనములు🌹🌹🌹🌹🌹🌻🌻🌻🌻🌸🌸🌸🌸💐💐💐