*నా తెలుగుభాష! రతనాల భాష*
సంస్కృతామృతమ్ము నాపోశనంబట్టి
నన్నయ్య చిన్నయ్య సంస్కరించిన భాష
తీయతేనెలకన్న కమ్మనై యలరారి
నయగారములనొలుకు నా తెలుగుభాష
అల కందుకూరి గురజాడ జాడలన్
చిలకమర్తి వారి పల్కులందున కులికి
పిడుగు వంటి గిగుడు గొడుగు ఛాయన జేరి
కడిగిన ముత్యమైన భాష నా తెలుగుభాష
రాజుల కాలన రాజసమ్మొలికించి
చట్టభాషగ తాను మెలగి చెలగి
చుట్టమై ప్రజకెల్ల అలరారిన భాష
కమ్మతేనెల మాధురి నా తెలుగుభాష
భాషోద్యమమునందు వ్యావహారికస్థాయి
నందిబుచ్చుకొని వచ్చి అందివచ్చిన భాష
నా తెలుగుభాష నాదరింపగ రారె!
అధికార వ్యవహార డోలలూపగ రారె!
అందివచ్చును భాష అందగించును భాష
నిర్లక్ష్యమిక వద్దు లక్ష్యమే ఇక ముద్దు
జై తెలుగుభాష! జై తెలుగుభాష!
----------------------------------------------------------
ఈ కవిత నా స్వీయరచన అని, ఇప్పుడే రచించబడినది హామీ ఇస్తున్నాను.
----------------------------------------------------------
రచన:
*కవితాభారతి*
*~శ్రీశర్మద*
8333844664
తెనాలి.
కామెంట్‌లు లేవు:
కామెంట్‌ను పోస్ట్ చేయండి