*కౌసల్యానందనరామ కమలాప్తకులరామ* పాట

ఓం నమో వేంకటేశాయా 
   
                     
*పాడిన వారు: నేదునూరి కృష్ణ మూర్తి*
రాగము: సాళంగనాట
రేకు: 0157-06
సంపుటము: 2-275
॥పల్లవి॥
కౌసల్యానందనరామ కమలాప్తకులరామ
భాసురవరద జయ పరిపూర్ణరామ

మునుప దశరథరాముఁడవై తమ్ములు నీవు
జనించి తాటకఁ జంపి జన్నము గాచి
వెనుకొని హరువిల్లు విరిచి సీతఁ బెండ్లాడి
అనుమతి పరశురామునిచేఁ గైకొంటివి

సుప్పనాతి శిక్షించి సొరిది రుషులఁ గాచి
అప్పుడే ఖరదూషణాదులఁ గొట్టి
చొప్పుతో మాయమృగము సోదించి హరియించి
కప్పి హనుమంతు బంటుఁగా నేలుకొంటివి

సొలసి వాలి నడఁచి సుగ్రీవుఁ గూడుక
జలధి బంధించి లంక సాధించి
వెలయ రావణు గెల్చి విభీషణుని మన్నించి
చెలఁగితి వయోధ్యలో శ్రీవేంకటేశుఁడా

*ఓం నమో వేంకటేశాయా*

*సేకరణ: సూర్య ప్రకాష్.*